Շամիրամ գյուղում սպանության գործով դատական նիստը հետաձգվեց

Արագածոտնի մարզի Շամիրամ գյուղում 2017 թվականի օգոստոսի 1-ին տեղի ունեցած սպանության գործով երրորդ դատական նիստն այսօր հետաձգվեց: Ամբաստանյալ Թելման Քալաշյանի պաշտպան Կրոմվել Գրիգորյանը չէր ներկայացել և միջնորդություն էր ներկայացրել հետաձգել նաև մարտի 30-ի նիստը, քանի որ այլ «նիստերով ծանրաբեռնված է»: Բացի դրանից՝ պաշտպանը դատարան ուղարկած գրության մեջ նշել էր, թե չեն պայմանավորվել, որ այս գործով նիստերը պետք է տեղի ունենան յուրաքանչյուր ուրբաթ:

Տուժողի իրավահաջորդ Միշա Օզմանյանն ասաց, որ Ռուսաստանից են գալիս և չեն կարող երկար ժամանակ մնալ Հայաստանում: Պետական մեղադրողն ու տուժողի իրավահաջորդի շահերի պաշտպան Բաբկեն Մարտոյանն էլ նշեցին, որ Կրոմվել Գրիգորյանը դիտավորյալ տապալում է նիստերը, և եթե չներկայանա նաև հաջորդ նիստին, դատարանը պետք է դիմի Փաստաբանական պալատ՝ պաշտպանի նկատմամբ  կարգապահական վարույթ հարուցելու համար: Բացի դրանից՝ տուժողի իրավահաջորդի շահերի պաշտպան Բաբկեն Մարտոյանն ասաց, որ իրականությանը չի համապատասխանում այն, թե իբր որոշված չէ դատական նիստերն ամեն ուրբաթ անցկացնելու հարցը: 

Ամբաստանյալ Թելման Քալաշյանն ասաց, որ գիտեր պաշտպանի չգալու մասին, բայց պատճառը չգիտեր: Երկու ամբաստանյալներն էլ՝ Թելման Քալաշյանն ու Քյարամ Քալաշյանը, ասացին, թե առանց պաշտպանի չեն ուզում մասնակցել նիստին:

Դատական նկստը հետաձգվեց երկու շաբաթով:

Հիշեցնենք՝ 4 տարի առաջ՝ 2013 թվականին, Արմավիրի մարզի բնակիչ Թելման Քալաշյանը, տոկոսով 75.000 ԱՄՆ դոլար գումար է տվել Ռուսաստանի Դաշնությունում բնակվող Խուդոյան եղբայրներին: Պայմանավորվածության համաձայն` եղբայրները երկու տարվա ընթացքում Թելման Քալաշյանին մաս-մաս վերադարձրել են  45.000 ԱՄՆ դոլար, սակայն հետագայում բիզնեսում գործունեությունը ձախողվելու պատճառով չեն կարողացել վճարել տոկոսադրույքները և վերադարձնել հիմնական գումարը: Այդ մասին տեղեկացրել են Թելման Քալաշյանին:

Թելման Քալաշյանը չի ընդունել այդ պատճառաբանությունները և պահանջել է իր գումարի մնացած մասը: Պարբերաբար դիմել է հինգ եղբայրների բարեկամներին և ընկերներին, այդ թվում՝ Գերման Քյարամյանին, որպեսզի միջամտեն իր գումարը և տոկոսադրույքները ստանալու համար: Հերթական անգամ՝ 2017 թվականի օգոստոսի 1-ին՝ առավոտյան, Թելման Քալաշյանը գումարային պահանջով հեռախոսազրույց է ունեցել Գերման Քյարամյանի հետ: Խոսակցությունը վերածվել է վիճաբանության, որի ընթացքում հնչել են փոխադարձ հայհոյանքներ։

Տեղեկանալով, որ Գերման Քյարամյանը, Խուդոյան հինգ եղբայրների բարեկամները և ընկերները գտնվում են Արագածոտնի մարզի Շամիրամ համայնքի գերեզմանատանը կից սգո սրահում և մասնակցում են եզդիների՝ «Խեր» կոչվող ազգային ծիսակատարությանը, Թելման Քալաշյանը ավտոմեքենայով գնացել է Շամիրամ համայնք: Հրազենով մուտք է գործել սգո սրահ, հայհոյել, ապա կրակոցներ արձակել սրահում գտնվող բազմաթիվ անձանց ուղղությամբ՝ միաժամանակ փորձելով ամբոխի մեջ գտնել Գերման Քյարամյանին:

4-ը տեղում մահացել են, ևս 7-ը՝ ստացել մարմնական վնասվածքներ։ Դեպքից հետո Թելման Քալաշյանը դիմել է փախուստի, որի ընթացքում կրակոցներ է արձակել նաև բռնելու նպատակով իրեն հետապնդող համագյուղացու նկատմամբ, որն ականատես էր եղել սգո սրահում կատարված ողբերգությանը։ 

Նշենք, որ Թելման Քալաշյանը դատապարտված է, դատվածությունը՝ մարվել է: