Տարօրինակ թույնը, սպանված կատուն և Սկրիպալի գործի ուշագրավ մանրամասները

ՌԴ Գլխավոր հետախուզության վարչության նախկին գնդապետ Սերգեյ Սկրիպալի և նրա դստեր՝ Յուլյայի առեղծվածային թունավորման գործով հետաքրքիր մանրամասներ են բացահայտվում, թեև առեղծվածի բացահայտմանը դրանք չեն նպաստում, հակառակը, ամեն ինչ ավելի է խառնվում:  

Նախորդ  շաբաթվա սենսացիան, իհարկե, Սկրիպալի դստեր՝ Յուլյայի և նրա բարեկամուհու՝ Վիկտորյայի հետ հեռախոսային խոսակցության ձայնագրության հրապարակումն էր: Յուլյան ասել էր, որ իր վիճակը  լավանում է, աստիճանաբար առողջանում է և հույս  ունի շուտով լքել հիվանդանոցը: Նրա խոսքով՝ հայրը նույնպես «նորմալ» է զգում իրեն, «ոչ մի անուղղելի բան չի կատարվել»: Դա  իսկապես սենսացիա էր, քանի որ նախորդ օրն էր աղջիկը գիտակցության եկել, իսկ հոր մասին բժիշկները հայտնել էին, որ դեռ անգիտակից վիճակում է, վիճակը «կայուն ծանր» է:  

Սենսացիա էր նաև այն, որ թույնը, որով թունավորվել են Սկրիպալները, պարզապես ապրելու շանս չի թողնում:

    
Կատուն և ծովախոզուկները

Լոնդոնում ՌԴ դեսպանատունը դիմել էր Մեծ Բրիտանիայի ԱԳՆ-ին՝ խնդրելով տրամադրել Սկրիպալների տան 2 կատվի և 2 ծովախոզուկի մասին տեղեկություններ: Դա կարող էր լույս սփռել այն հարցի վրա, թե արդյոք տանը եղել է թունավոր նյութ: Ուրբաթ օրը The Mirror  թերթը հայտնեց, որ Սկրիպալների տանը հայտնաբերվել են ծարավից սատկող երկու ծովախոզուկներ, իսկ սև պարսկական կատուն եղել է սթրեսային վիճակում: Կատվին տարել են ռազմական քիմիական լաբորատորիա՝ հետազոտելու, սակայն կենդանուն ստիպված են եղել քնեցնել: 

Կորած թվիթը

Պաշտոնական Լոնդոնը մեղադրում է Ռուսաստանին նյարդապարալիտիկ «Նովիչոկ» թույնը օգտագործելու համար: Եզրակացությունը տրվել է ռազմական Պորտոն-Դաուն լաբորատորիայում: Մեծ Բրիտանիայի վարչապետ Թերեզա Մեյը բազմիցս շեշտել է, որ Պորտոն-Դաունի մասնագետները համակարծիք են թույնի ռուսական  ծագման վերաբերյալ: Այդ մասին բրիտանական ԱԳՆ-ն անգամ մարտի 22-ին թվիթ էր հրապարակել: 

Արդեն ապրիլի 3-ին Պորտոն-Դաուն լաբորատորիան Twitter-ում ճշտել էր, որ «հայտնաբերված նյութը երբեք չի եղել և այժմ էլ չի գտնվում իրենց պատասխանատվության շրջանակում»:

 Նույն օրը Sky News հեռուստաընկերությանը տված հարցազրույցում այդ տեղեկությունը ճշտել էր Պորտոն-Դաունի տնօրեն Հարի Էյթքենը: 

Դրանից հետո թվիթը հեռացվել էր: 

Թույնի ստեղծման վայրը

Չնայած հակասություններին՝ բրիտանական ԶԼՄ-ները ոչ միայն պնդում էին, որ թույնը ռուսական է, այլև նշում էին ստեղծման կոնկրետ վայրը: The Sun պարբերականը հայտնել էր, որ Սկրիպալներին թունավորած նյարդապարալիտիկ գազը սինթեզվել է Արտաքին հետախուզական ծառայության լաբորատորիայում, որը գտնվում է Մոսկվայի Յասնևո շրջանում: The Times պարբերականն էլ նշել էր,որ թույնը ստեղծվել է Սարատովի շրջանի ռազմական գիտահետազոտական բազայում: Ապացույցներ առայժմ չկան: