Քննարկվել են ՀՀ-ԵՄ Համապարփակ եւ ընդլայնված գործընկերության համաձայնագրով նախատեսված բարեփոխումները շրջակա միջավայրի պահպանության ոլորտում

ՀՀ ԱԺ եվրոպական ինտեգրման հարցերի մշտական հանձնաժողովի նախագահի տեղակալ Մերի Գալստյանի նախաձեռնությամբ մայիսի 14-ին տեղի է ունեցել աշխատանքային քննարկում ՀՀ շրջակա միջավայրի նախարարի տեղակալներ Արամ Մեյմարյանի, Տիգրան Գաբրիելյանի, Արա Մկրտչյանի, ինչպես նաեւ նախարարության աշխատակազմի ներկայացուցիչների մասնակցությամբ:

Քննարկման օրակարգային թեման Հայաստան-ԵՄ Համապարփակ եւ ընդլայնված գործընկերության համաձայնագրի իրագործման շրջանակում շրջակա միջավայրի պահպանության ոլորտում ՀՀ կառավարության կողմից նախանշված բարեփոխումների ուղղությամբ կատարվող աշխատանքներն են:

Մերի Գալստյանի դիտարկմամբ քննարկումների նպատակն է պահպանել հաղորդակցությունն ընթացիկ աշխատանքներում, աջակցել կարիքների գնահատման գործընթացին, ինչպես նաեւ համագործակցել ինստիտուցիոնալ կարողությունների զարգացման ուղղությամբ: Նրա խոսքով, ըստ ճանապարհային քարտեզով նախանշված գործողությունների, շրջակա միջավայրի նախարարությանը վերապահված են ամենածավալուն մասը եւ հավակնոտ բարեփոխումները:

Արա Մկրտչյանը կարեւորել է նման քննարկումների անցկացումը՝ համաձայնագրով նախատեսված ծրագրերի իրականացման շրջանակում առկա ռեսուրսները համատեղելու, միասնական, փոխհամագործակցված, փոխտեղեկացված աշխատելու առումով:

Նշվել է, որ 2024 թվականին Հայաստան-ԵՄ Համապարփակ եւ ընդլայնված գործընկերության համաձայնագրի ճանապարհային քարտեզով նախանշված ծրագրերի ու գործողությունների գրեթե կեսից ավելին կատարվել է:

Ներկայացնելով մանրամասներ համաձայնագրի շրջանակում նախատեսված գործողությունների վերաբերյալ՝ ընդգծվել են վտանգավոր նյութերի եւ թափոնների, մթնոլորտային, կլիմայի քաղաքականության մշակմանն ուղղված աշխատանքները:

Կարեւորվել է «Թափոնների մասին» օրենքում փոփոխությունների եւ «Քիմիական նյութերի մասին» օրենքների նախագծերի մշակումն ու ընդունումը, որոնք քննարկումների փուլում են: «Քիմիական նյութերի մասին» նոր օրենքի նախագծի մշակման գործընթացում հիմնական մարտահրավերները պայմանավորված են խիստ նեղ մասնագիտական եւ տեխնիկական կարողությունների անհրաժեշտությամբ, նախագծի մշակման ընթացքում համակատարող գերատեսչությունների գործառույթների հստակեցմամբ: Համաձայնագրով նախանշված եւ իրագործված բարեփոխումների շարքում էին նաեւ «Շրջակա միջավայրի վրա ազդեցության եւ գնահատման մասին» օրենքում մի շարք փոփոխությունների ընդունումը, որով առավել արդյունավետ եւ ԵՄ համապատասխան դիրեկտիվներին համահունչ կարգավորումներ են սահմանվել: Մշակվել է «Կլիմայի մասին» օրենքի նախագիծ, որն առաջին անգամ իրավական եւ ինստիտուցիոնալ շրջանակ է սահմանելու ՀՀ-ում կլիմայի փոփոխության, մեղմման եւ հարմարվողականության տեսանկյունից:

Կարեւորվել է լքված կամ տիրազուրկ հանքերի պոչամբարների ռեկուլտիվացման աշխատանքների արդյունավետության բարձրացումը՝ համաձայնագրից բխող նպատակներին համահունչ:

Անդրադարձ է կատարվել աշխատանքների ընթացքում առաջացած խնդիրներին, ընդգծվել են աշխատանքներում մասնագիտական կարողությունների վերապատրաստմանը, իրավական ակտերի մոտարկմանը, թվային տիրույթում աշխատանք ծավալելու կարողություններին, լեզվական, թարգմանությունների, տերմինների հստակեցմանը, ռեսուրսների սղությանը վերաբերող հարցերը: