Գյումրիի հոգեկան առողջության կենտրոնի ստանդարտներին չհամապատասխանող մասնաշենքը կվերանորոգվի

Գյումրիի հոգեկան առողջության կենտրոնի պայմանները չեն  համապատասխանում պահանջվող չափորոշիչներին: Հիվանդասենյակները գերբեռնված են, լոգարանները՝ քիչ, զբոսանքի համար նախատեսված վայրեր գրեթե չկան: Մի քանի ամիս առաջ կենտրոնում անցկացված ստուգումներով այս թերություններն են հայտնաբերել նաև Մարդու իրավունքների պաշտպանի գրասենյակի մասնագետները: Դրանից հետո լուծվել է միայն խոհանոցի տաք ջրի խնդիրը, իսկ մնացածի համար կենտրոնին ավելի շատ գումարներ էին հարկավոր :

Տղամադկանց բաժանմունքի բոլոր հիվանդների համար կենտրոնում կա ընդամենը մեկ սանհանգույց, նույն վիճակն է նաև կանանց բաժանմունքում: Հոգեկան առողջության կենտրոնում բուժվող հիվանդների համար մի քանի սանհանգույց կառուցելու միակ տարբերակը հիվանդասենյակները ձևափոխելն է:

«Ամեն ինչից մի հատ է․ 45-50 հիվանդներին չի բավականացնում, հիվանդները պիտի հերթ կանգնեն, իրենք էլ անհամբեր են ու այդ պատճառով կարող են վեճեր լինեն»,- իրենց պայմանների ու խնդիրների մասին է խոսել Գյումրիի հոգեկան առողջության կենտրոնի հոգեբուժական բաժանմունքի վարիչ  Գագիկ Մխիթարյանը։

Գյումրիի հոգեկան առողջության կենտրոնի բաժանմունքները գերծանրաբեռնված են աշխատում, հիվանդասենյակներում մահճակալների քանակը մի քանի անգամ ավելի է, քան պահանջում են նորմերը նման հիվանդների ստացիոնար բուժման համար: Ամեն հիվանդասենյակում պետք է լինի առավելագույնը 2-3 հիվանդ, հիմա նրանց թիվը հասնում է մինչև 10-ի։ Հոգեկան առողջության կենտրոնը ագրեսիվ հիվանդների համար նախատեսված զսպման առանձնասենյակ էլ չունի:

Երբ վերանորոգման աշխատանքները սկսվեն , ձևափոխություններ էլ կկատարվեն: Նարկոլոգիական բաժանմունքի սենյակներից մեկն են վերանորոգելու և օգտագործելու որպես զսպման առանձնասենյակ: Համեմատաբար մեծ հիվանդասենյակները միջնապատերով կիսելու հաշվին դրանց թիվը կավելացնեն:

Նախկին ԴՈՈՍԱՖ-ի եռահարկ շենքում հոգեկան առողջության կենտրոնին տասնհինգ տարի է՝ չի հաջողվում անհրաժեշտ հարմարոթյունները ստեղծել, տարածքն ընդլայնելու հնարավորություն չունեն: Կենտրոնի մահճակալները գրեթե չեն դատարկվում, ստացիոնար բուժման դիմող հիվանդների թիվն էլ նախորդ տարվա համեմատ ավելացել է:

Հիվանդասենյակները չունեն օդափոխության համակարգեր, չունեն առանձնացված ծխարան, ուղղակի, օգտագործում են միջանցքի վերջնամասը, իսկ հիվանդասենյակներում առանձին պահարաններ չեն կարող տեղադրել, որոնք պարտադիր են ու պետք է լինեն փակվող :

Հրատապ խնդիրների լուծման ծրագրով  պետբյուջեից հատկացում է կատարվել։ 24 միլիոն դրամ պետական միջոցները ծախսվելու են շենքի վերանորոգման համար։Հիվանդները զրկված են զբոսանքի ու հանգստի վայրերից: Մի քանի տարի առաջ տարածքն ընդամնեը պարսպապատվել է :