Մորուքը մոդայիկ է, բայց դա ժամանակավոր է

Գեղեցկության չափանիշները փոխվում են, բայց ոչ շատ արագ: Դրա վրա ազդում են թե՜ ԶԼՄ-ները, և թե՜ նորաձևությունն ու ժամանակակից մշակույթը: Մինչդեռ մարդիկ գեղեցկության  մասին իրենց պատկերացումները շատ ավելի  հաճախ են փոխում՝ անգամ ոչ թե  տարիների, այլ ամիսների ընթացքում: Այդ չափանիշները նույնիսկ կարող են պահի ազդեցության տակ փոխվել: Պատճառն այն է, որ անընդհատ փոխվում են մեր հայացքները, համացանցի դարաշրջանում այդ  հայացքներն ու գեղեցկության ընկալումը փոխվում են շատ ավելի արագ՝ նայած, թե ինչ է թելադրվում:

Պատճառն այն հազարավոր լուսանկարներն են, որոնք  մենք թերթում ենք, որոնք, անկախ մեր կամքից, ամեն օր համացանցում մեր աչքի առաջ են հայտնվում:

Օրինակ՝  Սիդնեյի համալսարաններից մեկում հետազոտության ժամանակ կանանց ցույց են տվել 60 տղամարդկանց  լուսանկարներ և խնդրել գնահատել նրանց 3 վայրկյանի ընթացքում:

Պարզվել է,  որ եթե  նախորդ դեմքը համակրելի է  թվում, հաջորդին նույնպես համակրելի են համարում և հակառակը՝  եթե  նախորդը համակրելի չի թվում, հաջորդը նույնպես այդ տպավորությունն է  թողնում: Բացատրությունը շատ պարզ է՝ ուղեղը չի կարողանում շատ արագ գնահատել  հաջորդող ինֆորմացիան ու պարզապես որոշ դեպքերում «ծուլանում» է , կրկնում է  նախկին վիզուալ ինֆորմացիան: Դա կոչվում է սերիական կախվածություն:

Գեղեցկությունն, այսպիսով , փոփոխական  հասկացոթյուն է, որը ստիպում է անընդհատ նոր չափանիշներ ընտրել:  Գուցե  հենց դա է պատճառը՝ մարդիկ նոր զուգընկերներ են անընդհատ փնտրում:

ԱՐԱԳ ՀԱՅԱՑՔԻ ԷՖԵԿՏԸ

Եթե ձեզ թվում է, թե համացանցում շատ ավելի համակրելի մարդիկ կան, քան իրական կյանքում, ապա  պատճառն արագությունն է, որով դուք թերթում եք նկարները:  Գիտնականները պարզել են , որ եթե շատ ուշադիր ու երկար չենք նայում դիմացինի դիմագծերին՝  ապա նա համակրելի է թվում:

Նույն արագ հայացքի պատճառով մենք կարող ենք չնկատել իսկապես գեղեցիկ մարդուն  ու բաց թողնել նրա հետ շփվելու հնարավորոթյունը, պարզապես  չնկատել  նրան: Դա կոչվում է արագ հայացքի էֆեկտ:

Փաստորեն դա խաբուսիկ հայացքն  է՝ ունի և՜ դրական, և՜ բացասական հետևանքներ:

Այնպես որ, եթե  այսօր կամ անգամ այս պահին ձեզ դուր են գալիս մորուքով կամ արհեստականորեն մեծացրած շրթունքներով կանայք՝  դա ժամանակավոր է: Պատճառն այն է, որ համացանցում, հեռուստատեսությամբ այդպիսիք չափազանց շատ  են, և մեր ուղեղը պարզապես երբեմն ինքնաբերաբար ընկալում է նրանց որպես համակրելի:  Գեղեցկության չափանիշները  կարող  են շատ արագ փոխվել, այնպես, ինչպես նորաձևությունը: