Ինչպիսի՞ն է պետությունների ղեկավարների անվտանգությունը

Աշխարհում ամենից շատ ապահովվում է պետության ղեկավարների անվտանգությունը, քանի որ նրանք կառավարում են մի ամբողջ երկիր, պետք է ունենան իսկապես հուսալի թիկնազոր: Ղեկավարները լինում են տարբեր, ոմանք մեծ ուշադրություն են դարձնում անվտանգության աշխատակիցների առկայությանն ու քանակին, իսկ կան ղեկավարներ, ովքեր առհասարակ չեն կարևորում դրա առկայությունը: Ձեզ ենք ներկայացնում, թե ինչպիսի թիկնազոր ունեն աշխարհի տարբեր երկրների ղեկավարները:

Հյուսիսային Կորեա. Կիմ Չեն Ին

Հյուսիսային Կորեան, որն ապրում է փակ տոտալիտար հասարակարգի ռեժիմով  և սպառնում է աշխարհին միջուկային զենքով, բնականաբար, իր ղեկավարին լավ պաշտպանելու կարիք ունի: Վերջերս Հարավային Կորեա կատարած այցի ժամանակ Կիմ Չեն Ինի զրահապատ լիմուզինի կողքով վազում էր անվտանգության 12 աշխատակից: Ըստ տարբեր հաշվարկների՝ Կիմ Չեն Ինի անվտանգությունը պահպանում է մոտ 15 000 անվտանգության աշխատակից, բացի դրանից, նրա անվտանգությունը պահպանում է Հյուսիսային Կորեայի անձնական գվարդիան, որն ունի 120 հազար զինվոր:

Թուրքիա. Ռեջեփ Թայիփ Էրդողան

Մեր հարևան պետության ղեկավարը ևս շատ մտահոգված է իր անվտանգության համար, նրա կյանքի համար պատասխանատու հազարավոր թիկնապահներից բացի, նրան հետևում են դիպուկահարները: Էրդողանը երբեմն տեղափոխվում է ավտոբուսով, որի հետևից գալիս է թիկնազորի շարասյունը, իսկ ավտոբուսի գլխին դիպուկահարներ են:

Միացյալ Թագավորություն. Եղիսաբեթ Երկրորդ թագուհի

Չնայած այն բանին, որ Միացյալ Թագավորության միապետը չի զբաղվում երկրի կառավարման հարցերով, նրա անվտանգությունն առաջնային դեր ունի Միացյալ Թագավորությունում: Թագուհու անվտանգությունն ապահովում են ուղղաթիռներով, մոտոցիկլետներով և այլ հնարավոր միջոցներով: Ի դեպ, նրան սպանելու փորձեր բազմիցս եղել են: Ընդ որում, թագուհուն պաշտպանում են թե՛ Բուքինգեմյան պալատի պատերից ներս՝ սեփական տանը, թե՛ դրսում:

ԱՄՆ. Դոնալդ Թրամփ

Միլիարդատեր Դոնալդ Թրամփը մինչ նախագահ դառնալն էլ ունեցել է անվտանգության աշխատակիցների մեծ թիմ: Թրամփի անվտանգության աշխատակիցները միշտ եղել են հատուկ նշանակության զորքերի ներկայացուցիչներ: CNN-ի տվյալներով՝ Նյու Յորքի իշխանությունները մինչ Թրամփի նախագահ դառնալը, նրա անվտանգության վրա ծախսել են օրական 1 միլիոն դոլար:

Ռուսաստանի Դաշնություն. Վլադիմիր Պուտին

ՌԴ նախագահի անվտանգության համար պատասխանատվություն է կրում Անվտանգության դաշնային ծառայությունը: Առ այսօր գաղտնազերծված չեն տվյալները ՌԴ նախագահի անվտանգության աշխատակիցների թվաքանակի մասին, սակայն ոչ պաշտոնական աղբյուրների տվյալներով՝ նրանց թիվը հասնում է 50 հազարի: Մինչ այսօր, Պուտինի թիկնազորը կարողացել է կանխել նրան սպանելու մի քանի փորձ:

https://www.youtube.com/watch?v=uK42WngDiXw

Աֆրիկա՝ Կոտ դ’Իվուար. Ալասան Ուատար

Ալասան Ուատարը ևս անվտանգության աշխատակիցների բազմության սիրահար է: Մինչ նախագահը մեքենայից ձեռքով է անում ժողովրդին, մեքենայի աստիճանավանդակին կանգնած՝ նրա անվտանգությունն են ապահովում բազմաթիվ աշխատակիցներ:

Հայաստան. Նիկոլ Փաշինյան

Նիկոլ Փաշինյանը դեռևս թավշյա հեղափոխության օրերից ազատ շրջել է ժողովրդի հետ: Վարչապետ ընտրվելուց հետո էլ ոչինչ չի փոխվել, թեև նա ունի անվտանգության աշխատակիցներ, որոնք հատկացված են պետության կողմից, սակայն նա ազատ հանրահավաքներ է կազմակերպում, այցելում է մարզեր, կարիք եղած դեպքում շրջում է Երևանի փողոցներով, իսկ քաղաքացիները մեծ ցանկության դեպքում անգամ գրկում են նրան կամ նրա հետ լուսանկարվում: