Մսամթերքը, կաթնամթերքը, պանիրն ու ձուն թանկացել են

2018թ. հոկտեմբերին սեպտեմբերի համեմատ հանրապետությունում գրանցվել է յուղերի և ճարպերի՝ 0.4%, սուրճ, թեյ, կակաո ապրանքախմբի՝ 0.2%, ոչ ալկոհոլային խմիչքի 0.1% գնանկում: Այս մասին տեղեկացնում է ՀՀ ազգային վիճակագրական ծառայությունը: Մսամթերքի ապրանքախմբում 2018թ. հոկտեմբերին 2017թ. հոկտեմբերի համեմատ գրանցվել է 10.8%, իսկ 2018թ. սեպտեմբերի համեմատ՝ 1.3% գնաճ: Մայրաքաղաքում մսամթերքի գինն աճել է 1.3%-ով: Կաթնամթերք, պանիր և ձու ապրանքախմբում 2018թ. հոկտեմբերին 2017թ. հոկտեմբերի համեմատ գրանցվել է 3.0%, իսկ 2018թ. սեպտեմբերի համեմատ՝ 1.1% գնաճ, ինչին մեծապես նպաստել է ձվի 4.5% գնաճը (վերջին 3 ամիսներին ձվի ընդհանուր գնաճը կազմել է 39.7%): Մայրաքաղաքում կաթնամթերք, պանիր և ձու ապրանքախմբի գներն աճել են 0.8%-ով:

2018թ. հոկտեմբերին 2017թ. հոկտեմբերի համեմատ ձկնամթերքի ապրանքախմբում գրանցվել է 5.7%, իսկ 2018թ. սեպտեմբերի համեմատ՝ 0.8% գնաճ:

Ընթացիկ տարվա հոկտեմբերին սեպտեմբերի համեմատ գրանցվել է ալկոհոլային խմիչքի և ծխախոտային արտադրատեսակների՝ 0.1%, հացաբուլկեղենի և ձավարեղենի 0.2% գնաճ: 2018թ. հոկտեմբերին սեպտեմբերի համեմատ ոչ պարենային ապրանքների շուկայում արձանագրվել է 1.8% գնաճ: Նշված ժամանակահատվածում հանրապետությունում գրանցվել է գրասենյակային պարագաների՝ 0.2%, բնակարանի նորոգման և սպասարկման նյութերի՝ 0.3%, ապակե ամանեղենի, ճաշասպասքի և տնային կահ-կարասու՝ 0.4%, գորգերի և հատակի ծածկերի`0.5%, կենցաղային և այգեգործական գործիքների՝ 0.6%, մաքրող, լվացող միջոցների և բնակարանի խնամքի այլ պարագաների՝ 0.9%, հագուստի՝ 8.6%, տարբեր տեսակի կոշկեղենի 13.6% գնաճ: Դրան զուգընթաց, խոշոր կենցաղային սարքերի գները նվազել են 0.9%-ով, դեղագործական ապրանքներինը՝ 0.6%-ով, կահույքինը և կահավորանքինը՝ 0.3%-ով, կենցաղային փոքր էլեկտրական սարքերինը՝ 0.3%-ով, ոսկերչական զարդերինը՝ 0.2%-ով, վառելանյութինը և քսայուղերինը՝ 0.1%-ով:

Հաշվետու ժամանակահատվածում բենզինի և դիզելային վառելիքի գների մակարդակը մնացել է անփոփոխ: 2018թ. հոկտեմբերին 2017թ. հոկտեմբերի համեմատ հանրապետությունում գրանցվել է բենզինի և դիզելային վառելիքի՝ համապատասխանաբար 11.5% և 26.3%, իսկ 2017թ. դեկտեմբերի համեմատ՝ 9.3% և 23.3% գնաճ:

Մատուցված ծառայությունների ոլորտում 2018թ. հոկտեմբերին սեպտեմբերի համեմատ սակագները նվազել են 0.3%-ով, ինչին մեծապես նպաստել է մարդատար տրանսպորտի ծառայությունների սակագների 3.6% նվազումը (պայմանավորված օդային տրանսպորտով միջազգային չվերթների ծառայությունների սակագների 9.7% նվազմամբ): Հանգստի կազմակերպման համալիր ծառայությունների սակագները նշված ժամանակահատվածում նվազել են 2.2%-ով, սպասարկման ծառայություններինը՝ 0.1%-ով: Միաժամանակ, հանրապետությունում գրանցվել է բնակարանի նորոգման և սպասարկման ծառայությունների՝ 0.1%, հանգստի և մշակութային միջոցառումների հետ կապված ծառայությունների սակագների 0.4% հավելաճ, իսկ կենցաղային սարքերի նորոգման, կրթության, իրավաբանական, վարսավիրանոցային, կապի, բժշկական ծառայությունների սակագների մակարդակը նախորդ ամսվա համեմատ մնացել է անփոփոխ: