Ամենաթեժ ընտրապայքարը կընթանա երրորդ տեղի համար. Ալեքսանդր Իսկանդարյան

Քաղաքագետ Ալեքսանդր Իսկանդարյանը հետաքրքիր քարոզարշավ չի ակնկալում, քանի որ, ըստ նրա, նախ` քարոզարշավի ժամկետն է կարճ և հետո՝ մինչ ընտրություններն արդեն որոշ չափով պարզ է արդյունքը:

Իսկանդարյանի համոզմամբ՝ ընտրապայքարը գաղափարական չի լինի. ընտրողը, ըստ նրա, կքվեարկի ոչ թե ներկայացրած ծրագրերի ու գաղափարների, այլ անձի օգտին, ինչպես և մինչ այդ անցկացվել են հայաստանյան բոլոր ընտրությունները: Ի դեպ, Իսկանդարյանի համոզմամբ, այդ մոդելով շարժվում է ոչ միայն հիմնական ֆավորիտ ուժը՝ «Քաղաքացիական պայմանագիրը», այլ նաև ընտրապայքարին մասնակցող գրեթե բոլոր ուժերը, բացառությամբ ՀՀԿ-ի ու ՀՅԴ-ի, որոնք փորձում են ոչ թե անձնավորված քարոզարշավ իրականացնել, այլ առաջին պլան մղել իրենց կուսակցությունների հեղինակությունն ու վարկանիշը:

Իսկանդարյանի պնդմամբ՝ մյուս կողմից «Քաղաքացիական պայմանագիր» կուսակցության համար քարոզարշավը հեշտ կլինի, քանի որ ընտրություններին կմասնակցեն նաև հանրապետականները, ինչը հնարավորություն կտա ՔՊ-ին իր քարոզարշավը կառուցել նախկին ռեժիմի թույլ տված սխալների քննադատության վրա:

«Ես չէի ասի, որ քարոզարշավը կընթանա շատ հետաքրքիր, քանի որ կոնկրետ ինձ համար արդյունքն արդեն պարզ է: Մեր մոտ կրկին կվերականգնվի մեկուկես կուսակցական համակարգը, ինչ մինչ այժմ գոյություն ուներ, այսինքն՝ մեկ քաղաքական ուժը խորհրդարանում կունենա ձայների կեսից ավելին, չի բացառվում նույնիսկ, որ ունենա ձայների երկու երրորդը և կազմի սահմանադրական մեծամասնություն»,- նշել է Իսկանդարյանը՝ ավելացնելով, որ նման զարգացումների դեպքում իշխանությունների համար լուրջ ընդդիմություն խորհրդարանում պարզապես չի լինի, և որոշում կայացնողը կլինի ոչ թե խորհրդարանը, այլ գործադիր մարմինը:

Խորհրդարան անցած մյուս ուժերը, ըստ Իսկանդարյանի, խորհրդարանում կլինեն պարզապես քննադատողներ ու որոշումների վրա ազդեցություն չունեցող ընդդիմություն:

«Երկրորդ տեղը, ամենայն հավանականությամբ, խորհրդարանում կզբաղեցնի «Բարգավաճ Հայաստան» կուսակցությունը: Ամենաթեժ ընտրապայքարը, իմ կարծիքով, կընթանա երրորդ տեղի համար: Խնդիրն այն է, որ գրեթե անհավանական է, որ  շատ կուսակցություններ հավաքեն 5 տոկոսից ավելին ու հավակնեն երրորդ տեղի համար: Բայց քանի որ օրենքով նախատեսված է, որ խորհրդարանում պետք է լինի առնվազն երեք ուժ, ապա երրորդ տեղը դառնում է կռվան այն կուսակցությունների համար, որոնք թեև չեն հաղթահարի նախընտրական 5 տոկոսանոց շեմը, սակայն կարող են հայտնվել խորհրդարանում: Իմ կարծիքով՝ հենց այդ երրորդ տեղի համար էլ կպայքարեն հանրապետականները, «Լուսավոր Հայաստանն» ու «Սասնա ծռերը»,- հայտարարել է բանախոսը:

Ի հավելումն, նա ընդգծել է, որ սա իր սուբյեկտիվ կարծիքն է, քանի որ սոցհարցումներ չեն կատարվել և իր խոսքերը բացառապես իր ենթադրություններն են: