90 տոկոսի դեպքում գործ ունենք այն մեքենաների հետ, որոնց ղեկը չի կարելի փոխել. «Ղեկը աջ»-ը հիշեցնում է կառավարության որոշման վտանգավորության մասին

SHANTNEWS.am-ն արդեն հայտնել է, որ «Ղեկը աջ» նախաձեռնության անդամներն այսօր ասուլիս են հրավիրել՝ պնդելով, որ իրենք շարունակում են դժգոհ մնալ կառավարության որոշումից:

Նախաձեռնության ներկայացուցիչները շարունակում են պնդել, որ իրենց կողմից ներկրվող մեքենաների մեծ մասի դեպքում ղեկը փոխել պարզապես չի թույլատրվում

«Նույն Nissan ֆիրման ունի մոդել՝ Skyline-ը, որն ունի ձախ անալոգը: Նույն Nissan-ն ունի 7 տեղանոց մեքենա, որը չունի ձախ անալոգը: Էդ մեքենան նույնիսկ Վրաստանում ադրբեջանցի մասնագետները, ղեկ փոխողները ոչ մի գումարի դիմաց չեն ուզում փոխել: Իրենք էլ են հասկանում, որ այդ մեքենան դառնում է սարսափելի վտանգավոր մեքենա: Հիմա «Ղեկը աջ» նախաձեռնության անդամների մեքենաները 90 տոկոսով էդ մեքենաներն են, որոնց ղեկը չի կարելի փոխել»,- ասել է  նախաձեռնության անդամներից Զոհրաբ Իգիթյանը:

Ըստ նախաձեռնության անդամների՝ իրենք դա բազմիցս են փաստել, հատկապես ՀՀ տրանսպորտի, կապի և ՏՏ նախարարությունում ունեցած հանդիպումների ժամանակ.

«Էդ մարդիկ մեզ ուշադիր լսում են, ըմբռնում, հասկանում են, բայց անում են հակառակը: Հիմա մի անհասկանալի պատ է մեր դիմաց, չենք կարողանում հասկանալ, թե խնդիրը ո՞րն է՝ այս 800-ից 1000 մեքենան ի՞նչ վտանգավորություն պետք է ունենա Հայաստանի համար, որտեղ կա 40 հազար աջ ղեկով մեքենա»,- հավելել է բանախոսը:

Ինչ վերաբերում է պնդումներին, թե պատվերները կատարվել են, չնայած օրենքն արգելում էր, «Ղեկը աջ» նախաձեռնության անդամները պատասխանում են այն նկարահանման մասին հիշեցնելով, որը կատարել են  2018 թվականի նոյեմբերի 3-ին: Կադրերում երևում է, որ Բագրատաշենի մաքսակետում՝ տեղեկատվական կենտրոնում, փակցված է մի հայտարարություն, որի մեջ գրված է, որ արգելքը գործում է ապրիլի 1-ից հոկտեմբերի 1-ն ընկած ժամանակահատվածում:

«Հասարակ քաղաքացին մոտենում և կարդում է տեղեկանքը, որտեղ պարզ գրված է, որ հոկտեմբերի 1-ից հետո կարող է ներկրել, այդ մարդն օգոստոս, սեպտեմբեր, հուլիս ամիսներին գնել է աջ ղեկով ավտոմեքենան, որը եկել-հասել է Բագրատաշեն, հիմա իրեն ասում են՝ գիտեք ինչ, իրականությունը մի ուրիշ օրենք է: Մի խոսքով, աբսուրդի առաջ ենք կանգնած»,- հավելել են նախաձեռնության անդամները:

Հիշեցնենք, որ նախագիծը կառավարության քննարկմանն է ներկայացվել այս տարվա դեկտեմբերի 6-ին: Որոշումն ընդունվել է և հաստատվել, որ մեքենաներն ընդունվելու են «Վերամշակում՝ ներքին սպառման համար» մաքսային ընթացակարգով:

Նշված մաքսային ընթացակարգը հնարավորություն կտա աջակողմյան ղեկային համակարգ ունեցող տրանսպորտային միջոցներն առանց վերասարքավորման ներմուծել ՀՀ տարածք, այստեղ մինչև 6 ամսվա ընթացքում իրականացնել ղեկի տեղափոխում, այնուհետ մաքսազերծելուց հետո հաշվառել ոստիկանությունում և դրանք շահագործել ՀՀ տարածքում: