Դավոսի ֆորումի ու Հայաստանի մասնակցության ձևաչափի մասին

Շվեյցարիայի այս քաղաքում բուժվող Ռոբերտ Լուիս Սթիվենսոնը գրեց «Գանձերի կղզին»: Քաղաքը հայտնի հանգստավայրերից է, բայց դա էլ շատերին գուցե ոչինչ չասի: Դավոսն աշխարհին ավելի շատ հայտնի է իր համաշխարհային տնտեսական ֆորումով,  որը հիմնադրել է ազգությամբ գերմանացի գործարար Կլաուս Շվաբը 1971 թվականին՝ Ժնևի համալսարանում:

Ավելի ուշ, երբ հավաքատեղին Դավոսը դարձավ, Շվաբն Արևմտյան Եվրոպայի ընկերություններից հրավիրեց 444 գործարարի: Սկսեցին տնտեսական հարցերից, բայց քաղաքական առաջնորդներն արդեն բավականին ժամանակ ամենամյա ֆորումն օգտագործում են նաև որպես անհատական հետաքրքրությունների հարթակ: Պատմությունն, օրինակ, արձանագրել է, որ 1988 թվականին Հունաստանի և Թուրքիայի միջև ստորագրված «Դավոսի հռչակագրով» դադարեցվեց վերջիններիս միջև եղած պատերազմը։ 1992 թվականին ֆորումում միմյանց հանդիպեցին Հարավաֆրիկյան Հանրապետության նախագահ Ֆրեդերիկ Վիլհելմ դե Քլերկը, Նելսոն Մանդելան և Մանգոսուտու Բուտելեզին։ Այսինքն՝  քաղաքականությունը Դավոսում վաղուց տնտեսական հարցերի չափ նկատելի մի բան է: Ու ոչ միայն քաղաքականությունը:

Այս  տարի էլ այստեղ պետությունների, խոշոր ընկերությունների, բարեգործական առաքելություն իրականացնող միջազգային կազմակերպությունների ղեկավարների, տնտեսագետների, գիտնականների, կրոնական առաջնորդների, հասարակական հայտնի գործիչների, արվեստագետների և նույնիսկ շոու բիզնեսի աստղերի կարելի է տեսնել՝ շուրջ 3000 մարդու: Եղել են տարիներ, որ Հայաստանն այս համաժողովին չի մասնակցել: Բայց ոչ այս տարի:

ՀՀ վարչապետ Նիկոլ Փաշինյանն այս մասին գրել էր օրեր առաջ: Իսկ, ընդհանուր առմամբ,  Հայաստանի վարչապետը միայն մասնակցություն չէ, որ ունենալու է. համաժողովի բանախոսներից է: Ելույթը լինելու է «Ձևավորելով ժողովրդավարության ապագան» խորագիրը կրող թեմատիկ քննարկման ժամանակ:

Հայտնի է, որ բացի թեմատիկ քննարկումներից, Դավոսի համաշխարհային ֆորումն ամեն տարի մեկ ընդհանուր նշանաբան է ունենում: Այս տարի հետևյալն է՝ «Գլոբալիզացիա. Գլոբալ ճարտարապետության ձևավորումը չորրորդ արդյունաբերական հեղափոխության դարաշրջանում»: Հիմնական թեմաները գլոբալ համագործակցության մարտահրավերները և թվային հեղափոխության բերած փոփոխություններն են:

«Գլոբալացման չորրորդ ալիքը պետք է լինի մարդակենտրոն, ներառական և կայուն: Մենք թևակոխում ենք համաշխարհային լուրջ անկայունության փուլ, որը տեխնոլոգիական խաթարումների և աշխարհաքաղաքական հզոր ուժերի վերափոխումների հետևանք է: Մեզ անհրաժեշտ է բոլոր դերակատարների ներդրումն ու երևակայությունն՝ առկա մարտահրավերների դիմագրավումը պատկերացնելու համար»,- ասել է Դավոսի ֆորումի հիմնադիր և երկարամյա ղեկավար, պրոֆեսոր Կլաուս Շվաբը:

Հիմա այն մասին, թե ովքեր են այս տարի մասնակցում համաժողովին: Այսպես ասած քաղաքական էլիտան կներկայացնեն  Գերմանիայի կանցլեր Անգելա Մերկելը և Ճապոնիայի վարչապետ Սինձո Աբեն: Հաստատվել է նաև Շվեյցարիայի Համադաշնության նախագահ Ուլի Մայերի, Բրազիլիայի նախագահ Ժաիր Բոլսոնարուի, Չինաստանի փոխնախագահ Վանգ Քիշանի, Իտալիայի վարչապետ Ջուզեպպե Կոնտիի, Իսրայելի վարչապետ Բենյամին Նեթանյահուի, տասնյակ այլ պետությունների առաջին դեմքերի մասնակցությունը: Չի մասնակցում Միացյալ Նահանգները: Վկայակոչելով կառավարության ֆինանսավորման մասնակի սառեցման՝ shutdown-ի հանգամանքը` Դոնալդ Թրամփը չեղարկել է թե՛ իր, թե՛ ամերիկյան մյուս ներկայացուցիչների   մասնակցությունը դավոսյան ֆորումին: Չմասնակցելու մասին հայտարարել են նաև Մեծ Բրիտանիայի և Ֆրանսիայի առաջնորդները: Պատճառաբանությունը ներքաղաքական խնդիրներն են: