50կմ/ժ արագությամբ ընթացող մեքենայի վթարի դեպքում մարդու մարմնի քաշը կրկնապատկվում է 25 անգամ, կամ ինչո՞ւ պետք է երեխային տեղափոխել քարսիթով

50կմ/ժ արագությամբ ընթացող մեքենայի վթարի դեպքում մարդու մարմնի քաշը կրկնապատկվում է մոտ 25 անգամ: Դա նշանակում է, որ եթե նա չամրակապվի, լուրջ վնասվածքների վտանգը, նաև մահացու ելքի հավանականությունը մի քանի հարյուր անգամ կավելանա: Ռուսաստանում, ԱՄՆ-ում և Եվրոպայում երեխաներին անվտանգ տեղափոխելու համար քարսիթ կամ մանկական նստատեղ են օգտագործում: Միտումը Հայաստան էլ է հասնում:

«Ապահով է, ամբողջ աշխարհում ապացուցված բան է՝ այնտեղ երեխան մեքենա չի նստի, եթե քարսիթ չլինի: Ավելի կարգապահ է լինում երեխան մեքենայի մեջ: Օրինակ՝ իմ տղան, երբ տաքսի է նստում, ուզում է ամրակապված լինի, որովհետև իրեն այդպես լավ է զգում»,- SHANTNEWS.am-ի հարցմանն ի պատասխան՝ ասաց քաղաքացիներից մեկը:

Բայց հասարակության մեկ այլ խումբ էլ կա. ամրակապվելը կարևորում են, բայց հենց հերթը հասնում է մանկական նստատեղ գնելուն, ծնողներն ասում են՝ մենք առանց դրա էլ ենք մեծացել: Ու հենց նրանց հակառակը համոզելու համար օրենքի նախագիծ է լրամշակվում: Այն ենթադրում է, որ երթևեկության ընթացքում երեխայի հարմարավետությունը և արտակարգ իրավիճակներում նրա անվտանգությունը պետք է ապահովված լինի: Արդարադատության նախարարության e-draft.am-կայքում, շրջանառության մեջ է դրվել ավելի վաղ ընդունված որոշումներում փոփոխություններ կատարելու մասին օրենքի նախագիծը: Նախագծում մասնավորապես նշված է.

«Մինչև 7 տարեկան երեխաների փոխադրումը թեթև մարդատար ավտոմոբիլում և բեռնատար ավտոմոբիլի խցիկում պետք է իրականացվի երեխայի քաշին և հասակին համապատասխանող մանկական պահող համակարգերի (սարքերի) օգտագործման միջոցով: 7-ից մինչև 12 տարեկան երեխաների փոխադրումը թեթև մարդատար ավտոմոբիլում և բեռնատար ավտոմոբիլի խցիկում պետք է իրականացվի երեխայի քաշին և հասակին համապատասխանող մանկական պահող համակարգերի (սարքերի) օգտագործման միջոցով կամ անվտանգության ամրագոտիների օգտագործման միջոցով, իսկ թեթև մարդատար ավտոմոբիլի առջևի նստատեղում՝ միայն երեխայի քաշին և հասակին համապատասխանող մանկական պահող համակարգերի (սարքերի) օգտագործման միջոցով»:

Այսպես անվտանգությունն ապահովելու դեպքում 90% քիչ հավանական է դառնում մահացությունը պատահարից, 75% քիչ հավանական է դառնում լուրջ վնասվածքներ ստանալը, 67% քիչ հավանական է դառնում թեթև վնասվածքներ ստանալը:

Քարսիթի օգտագործումը պարտադիր էր նաև մինչ այժմ, հիմա լրամշակված տարբերակն է: «Վարորդի ընկեր» ՀԿ նախագահ Տիգրան Քեհյանի խոսքերով՝ հարցը պարտադիր լինելու կամ սահմանված 5000 դրամ տուգանքի մեջ չէ:

«Խստությունը, վերահսկողությունը, կամ այն, որ Ճանապարհային ոստիկանությունը բարի կամքի դրսևորում է ցուցաբերում, դա չի նշանակում, որ օրենքում նման պահանջ չի եղել: Կա պահանջ, ամեն անձը թող ինքը մտածի երեխայի անվտանգության մասին»,- ասաց նա:

Օրինագիծը միտված է մանկական վնասվածքների և մահացության թվի կրճատմանը: Սա կարևոր հարց է, պնդում է առողջապահության նախարարը:

«Սա ոչ թե քմահաճույք է, այլ պետության պոզիտիվ պարտականություններից՝ պաշտպանել բոլոր քաղաքացիներին, այդ թվում մանկահասակ քաղաքացիներին, անկախ նրանից՝ այդ մանկահասակ երեխայի ծնողներն առանց ամրագոտի երթևեկելու վտանգը հասկանո՞ւմ են, թե՞ ոչ: Եթե թողնենք հայեցողությանը, կունենանք այն, ինչ ունենք հիմա»,- ասաց նա:

Արդյո՞ք որոշ ընկերությունների համար շահավետ բիզնես չի դառնա քարսիթի վաճառքը:

«Օրինակ՝ ջրի վաճառքն էլ է շահավետ բիզնես, բայց կարևոր է մեր առողջության ու կյանքի համար»,- ասաց Թորոսյանը:

Սոցիալական հարթակներում հարցը քննարկողները նաև ասում են՝ երեխաներն անհանգիստ են, ակտիվ, քարսիթի մեջ երկար չեն մնա:

«Իմ երեխաներն էլ են շատ անհանգիստ, բայց ես համարում եմ, որ նրանց՝ վթարից փրկվելու անհրաժեշտությունը շատ ավելի կարևոր է, քան նրանց հանգստությունը»,- ասաց առողջապահության նախարարը:

Ֆեյսբուքյան օգտատերերից մեկը՝ «Ինֆորմացիայի ազատության կենտրոն»-ի հիմնադիր Շուշան Դոյդոյանը գրել է.

«4 երեխաներիս համար մեր մեքենայում քարսիթ դնելու մասին. Կարո՞ղ եմ պահանջել պետությունից համապատասխան մեքենա, որտեղ կարող են տեղավորվել մեր 4 քարսիթերը:) Թե՞ մենակ պետությունը կարող է ինձնից պահանջել 4 քարսիթ։ Օրվա հարցը»։

Որպեսզի նախագիծն ամբողջական տեսք ստանա, այս ու այլ խնդրահարույց հարցեր կհնչեն հանրային քննարկման ժամանակ: