Եկեք պայմանավորվենք, որ մեր հանդիպումների ժամանակ ըստ էության խոսենք. նախագահը լրագրողներին

Այսօր ՀՀ նախագահի նստավայրում՝ բանակի օրվան նվիրված պարգևատրման արարողությունից հետո, ՀՀ նախագահ Արմեն Սարգսյանը պատասխանել է նաև լրագրողների հարցերին՝ հարցուպատասխանը սկսելով շնորհավորանքով: Արմեն Սարգսյանն ասել է, որ նաև ԶԼՄ ներկայացուցիչների միջոցով է բոլոր հայրենակիցներին շնորհավորում Բանակի օրվա առիթով:

«Բանակն ինչ-որ իմաստով մեր ազգային զինանշանն է, որովհետև մեր նման երկիրն իր այս հանգրվանում պարփակում է իր մեջ բանակին, և բանակը դառնում է առանցքային գործոններից մեկը»,- ասել է ՀՀ նախագահը՝ ցանկանալով խոսքը շարունակել, բայց լրագրողներից մեկը փորձել է հարց տալ, ինչին ՀՀ նախագահն արձագանքել է պայմանավորվածություն ունենալու անհրաժեշտությամբ:

«Եկեք պայմանավորվենք, որ մեր հանդիպումների ժամանակ ըստ էության խոսենք, ոչ թե էստեղից-էնտեղից»,- ասել է ՀՀ նախագահն ու խոսքն այսպես շարունակել.

«Ես ուզում եմ շնորհավորել և կրկին ասել, որ բանակը յուրաքանչյուր մեր երիտասարդ աղջկա և տղայի համար կյանքի մի էտապ է: Կյանք են մտնում էդ ճանապարհով: Ե՛վ դպրոցը, և՛ բանակն իրենց պետք է կյանքի հետագա աջակցություն ցույց տան: Ինքը պետք է ավելի հարստանա, ավելի փորձառու դառնա, որովհետև ինչ-որ մի օր բանակից հետո պետք է վերադառնա քաղաքացիական կյանքին, հետևաբար պետք է պատրաստ լինի, այլ ոչ թե մեկը, որ կգա հետո այդ կյանք և էդ կյանքում անելիք չի ունենա»:

Արմեն Սարգսյանը խոսել է նաև այն մասին, որ բանակը կյանքի ուղղակի արտացոլումն է. եթե կա կոռուպցիա, բանակում այն տեսնում են.

«Եթե բանակում այն տեսնում են և ապրում էդ կոռուպցիայի հետ, հետևաբար, դա կլինի սովորություն և դա ընդունելի կլինի սովորական կյանքում»,- ասել է Արմեն Սարգսյանը:

Այսօր տեսնո՞ւմ եք կոռուպցիա. հարցրել են լրագրողները նախագահին:

«Մի րոպե վերջացնեմ, ելույթի մեջ էլ ասացի, որ շատ էական է, որ մեր նման երկրների հաջողությունը կապված է լինում բանակ և հասարակություն, բանակ և արտադրություն մոդելով: Բանակը պետք է կոնկրետ խնդիրներ դնի, որ լուծեն և՛ ԳԱԱ-ն, գիտնականները, համալսարանը, առանձին ձեռներեցներ կամ երիտասարդներ, որոնք ստարտափներ ունեն: Բանակը լինելու է նոր ժամանակի բանակ, էլեկտրոնային բանակ, ես չգիտեմ, կարող եմ 20 տարի հետո երազել, թե ինչպիսին է բանակը լինելու, բայց էսօր պետք է պատրաստվենք»,- ասել է ՀՀ նախագահը:

Լրագրողները ցանկացել են դարձյալ հարց ուղղել նախագահին, բայց նա ասել է, որ ցանկանում է խոսքը շարունակել՝ խոսելով այն մասին, որ ծառայած ու հաշմանդամ դարձած տղաներին պետք է չմոռանալ: Խոսելով «Հայրենիքի պաշտպան» ծրագրի մասին՝ նախագահը լրագրողներին խորհուրդ տվել գործարարներին հարցեր ուղղելիս նաև հարցնել, թե ինչ են արել նրանք բանակում հաշմանդամ դարձածների համար, գոնե մեկ հոգու կարող են աշխատանքի ընդունել: