Այս տարի սեյսմիկ վատ վիճակում գտնվող 6 դպրոցի խնդիր կլուծվի. վարչապետը կոչ արեց արագացնել տեմպերը

ՀՀ տարածքային կառավարման և զարգացման նախարար Սուրեն Պապիկյանը փետրվարի 6-ին ՀՀ կառավարության նիստում ներկայացրեց «Անհատույց սեփականության իրավունքով գույք հանձնելու և քանդման (ապամոնտաժման) աշխատանքներ կազմակերպելու մասին» նախագիծը: Պապիկյանը նշեց, որ նախագծի ընդունումը պայմանավորված է ՀՀ կառավարության և Ասիական զարգացման բանկի միջև իրականացվող սեյսմիկ անվտանգության բարելավման ծրագրի շրջանակներում նոր դպրոցական շենքերի կառուցման համար ներկայում առկա շենք-շինությունների քանդման գործընթացը ՀՀ օրենսդրությամբ իրականացնելու անհրաժեշտությամբ:

Ծրագրով նախատեսված է, որ կառուցվող և վերակառուցվող դպրոցները սեյսմակայուն են լինելու առնվազն 9 բալ երկրաշարժի դեպքում, նախագծերն անցնում են նաև միջազգային փորձաքննություն: Պապիկյանն ասաց, որ նախատեսվում է ամբողջովին քանդել Ղևոնդ Ալիշանի անվան թիվ 95 միջնակարգ և թիվ 116 հիմնական դպրոցները, միայն ճակատային մասը պահպանելով մասնակի քանդել հետևյալ 4 դպրոցների շենք-շինությունները` Մուրացանի անվան թիվ 18 հիմնական, Կարապենցի անվան թիվ 6 հիմնական, Հերացու ավագ դպրոցները և Կոջոյանի անվան թիվ 15 կրթահամալիրը:

«Ուզում եմ հիշեցնել նաև, որ նախորդ տարվա դեկտեմբերի 13-ի որոշմամբ մենք սեյսմիկ վատ վիճակում գտնվող, առավել խոցելի 46 դպրոցների ցանկը հաստատեցինք, 2017 թ. հունիսի 13-ին հաստատվել էին ևս 20 նմանատիպ ծրագրեր, հենց դրանց իրականացման շրջանակներում էլ վերոնշյալ դպրոցների քանդման անհրաժեշտություն կա, որից հետո կսկսվեն շինարարական աշխատանքները: Ներկայում շինարարություն է իրականացվում Վանաձորի թիվ 5 հիմնական, Երևանի թիվ 135 և 153 հիմնական դպրոցներում, Կապանի թիվ 7, Նոր Խարբերդի թիվ 1 միջնակարգ, Գավառի թիվ 2 միջնակարգ դպրոցներում»,- ասաց նա:

Վարչապետ Նիկոլ Փաշինյանը հետաքրքրվեց` քանի՞ դպրոցի շինարարություն կարող են իրականացնել այս տարի, ի պատասխան՝ Պապիկյանը նշեց, որ հստակ կարող է ասել`այս տարի այս նախագծով անցնող 6 դպրոցների շինարարությունը կսկսվի: Վարչապետն ասաց, որ ակնհայտորեն տեմպը մեծացնելու խնդիր ունեն, պետք է ինտենսիվ աշխատեն դոնոր ընկերությունների հետ, ԵՄ հետ համագործակցության ճանապարհային քարտեզում էլ փորձեն ներառել այս ծրագրերը:

«Այնուամենայնիվ, հիմա մենք վարկային ծրագիր ունենք 80 մլն դոլարի, այն մոտ 46-ից քանիսի՞ համար է բավարար: Համենայնդեպս, ոչ բոլորին է բավարար»,- նկատեց նա:

Վարչապետին զեկուցեցին, որ այս ծրագրի իրականացման համար 80 մլն դոլար Ասիական զարգացման բանկի կողմից է տրամադրվում, 20 մլն դոլար` Կառավարության, և այդ գումարը պիտի որ բավարար լինի: Փաշինյանին նաև տեղեկացրին, որ ծրագիրը պետք է ավարտվեր 2021 թ,. հիմա երկարացվում է ևս 2 տարով. 6 դպրոց շինարարության ընթացքում է, նախագծվում է ևս 6-ը, պետք է սկսվի շինարարությունը, աստիճանաբար պետք է սկսվեն նաև մյուս դպրոցների նախագծերը և շինարարությունը:

«Եթե գումարն ունենք, դպրոցներն ունենք, ինչի՞ ենք էսպիսի տեմպով առաջ գնում»,- հարցրեց նա:

Պապիկյանը տեղեկացրեց, որ համաֆինանսավորման խնդիր են ունեցել նաև, 18,5 մլն համաֆինանսավորման խնդիր կա Կառավարության կողմից. նախորդ տարի տարվա առաջին մասում համաֆինանսավորումը դանդաղել է, իսկ հիմա գոնե 6+6-ի չափամասում խնդիր չկա:

«Փողը կա, դպրոցը կա, ո՞ւմ ենք սպասում, համաֆինանսավորման խնդի՞րն է: Այս տեմպով որ գնանք, 6 ամսից ևս 6-ի մասին կխոսե՞նք: Ինչո՞ւ ամեն շաբաթ մեկ դպրոցի հարց չենք լուծում կամ 3-4, ինչո՞ւ չենք գնում առաջ բոլորի ուղղությամբ, եթե համաֆինանսավորման խնդիրն է, պետք է աղբյուրներ գտնել, գնալ առաջ, արդեն քանի տարի է՝ այդ գումարը կա, վարկային միջոցները վերցված են, պետք է արագ և արդյունավետ օգտագործել, հետևաբար այս 46 դպրոցների հարցը մենք լուծում ենք»,- ասաց Փաշինյանը:

Նա նաև ընդգծեց, որ որակի վերահսկողությունը պետք է լուրջ լինի: Վարչապետն ասաց, որ վերանորոգվող դպրոցները մտնելիս տպավորություն է, թե դպրոցների ճակատային մասում գրված է «պետական շինարարություն», շարժվել են տրամաբանությամբ՝ «հա դե, դպրոց է, էլի, մեկ է երեխեքը քանդելու են», սակայն այլ է «սեփական շինարարության» դեպքում, դպրոցի ամեն անկյուն մանրակրկիտ ուշադրության է արժանացել:

«Դուք սարքեք, թող երեխեքը քանդեն, ոչ թե դուք քանդեք, երեխեքը քանդելու բան չունենան արդեն»,- ասաց նա:

ԿԳ նախարար Արայիկ Հարությունյանն արձագանքեց, թե փորձը ցույց է տալիս, որ երբ դպրոցը լավ սարքած է, երեխաները չեն քանդում:

«Դուք՝ որպես ԿԳ նախարար, Ձեր բարձրության վրա մնացիք, երեխաներին պաշտպանեցիք քանդարարության մեղադրանքից»,- նրան դիմեց վարչապետը: