Գյումրիի տնակային թաղամասը` սողանքի սպառնալիքի տակ

Գյումրիի տնակներում ապրող ո՞ր ընտանիքներին են առաջնահերթություն տալիս բարերարները: Այս հարցն օրակարգային է, քանի որ մի քանի տարի է` Գյումրիում բնակապահովման պետական ծրագիր չկա, և միայն բարեգործական միջոցներով են բնակարաններ գնվում: Իսկ այս դեպքում որոշողը հիմնականում բարերարներն են: Այսինքն` բարեգործական հիմնադրամի և նվիրատուի համար ընտանիքների ընտրության առաջնահերթությունները կարող են տարբեր լինել: Օրինակը Բուսաբանական այգու տնակային տարածքում է:

«Գյումրին առանց տնակների» հիմնադրամը որպես առաջնահերթ փոխհատուցման կարիք ունեցող դիտարկում է սողանքային տարածքում տեղադրված տնակներում ապրողներին: Տարիների մաշվածությանը գումարվել են սողանքի հետևանքները՝ տնակները թեքվում են, մեծ ու փոքր ճաքեր են առաջանում: Ամենամյա վերանորոգումներն էլ անօգուտ են՝ տնակի տակ եղած գրունտը սահում է, ժամանակավոր կացարանն էլ հետը:

Իսկ սողանքի առաջացման պատճառը երկրաշարժից փլուզված շենքերից տեղափոխված ավերակներն են: Հենց դրանց վրա էլ դրվել են տնակները: Տարիներ անց արհեստական գրունտը սկսել է նստվածք տալ ու սահել: Նպաստել է նաև տարածքի խոնավությունը: Բուսաբանական այգին քարտեզագրում չունի: «Գյումրին առանց տնակների» հիմնադրամն  իր ուսումնասիրություններով մի քանի գոտի է առանձնացրել՝ հնագիտական, եկեղեցապատկան, կանաչ և սողանքային: Գոտիավորման համար արված ուսումնասիրությունը բացահայտել է նաև տնակների վիճակը:

«Ցանկացած ծածկույթ ժամանակի ընթացքում նստվածք կտա, սողանք կառաջանա: Այս տարածքը, քանի որ ձորի պռնկին է, ամենաթիրախային հատվածն է: 15-20 տնակներ կան, որ սողանքային տարածքում  են: Իսկ դրանցից 4-5-ն իրար կողքի տեղադրված տնակներ են, որոնք շատ լուրջ վտանգի առաջ են»,- SHANTNEWS.am-ին ասել է «Գյումրին առանց տնակների» հիմնադրամի տնօրեն Մհեր Խաչատրյանը:

Վատ վիճակում գտնվող տնակներում ապրող ընտանիքը պետք է առաջնահերթություն ունենա բնակարանային փոխհատուցման հարցում: Սա պարզ տրամաբանություն է, եթե գնահատման չափանիշը ժամանակավոր կացարանի տեխնիկական վիճակն է: Բայց հիմնադրամը բարեգործների աջակցությամբ է բնակարաններ գնում, ու բարերարն է որոշում, թե ում նոր տուն նվիրի:

«Բարերարների կողմից միշտ առաջարկներ են լինում բնակարան հատկացնելու բազմանդամ ընտանիքներին կամ շատ անչափահասներ ունեցողներին: Երրորդ հորիզոնականը, եթե այդպես կարելի է ասել, զբաղեցնում են միայնակ ծերերը: Նաև շատ նրբություններ կան այստեղ: Եթե մենք ասենք, որ այս ընտանիքին առաջնահերթություն ենք տալիս, որովհետև սողանքային գոտում է ու չի կարող այլևս այստեղ ապրել, վաղն այս տարածքի բոլոր բնակիչները կլքեն իրենց տնակները, կտեղափոխվեն այլ տեղ ու կպահանջեն, որ իրենց բնակարան հատկացնենք »,- ասել է Մհեր Խաչատրյանը:

Հիմա ուսումնասիրում են`հասկանալու համար, թե սողանքային գոտում ապրող ընտանիքներից քանիսն են համապատասխանում բարերարների պահանջներին, առանձնացնելու են այն տնակները, որոնք ակտիվ սողանքի տակ են: Ընդհանուր առմամբ Գյումրիի Բուսաբանական այգում 114 տնակ է հաշվառված: Հիմնադրամի միջոցներով անցած տարվա ընթացքում այս տարածքից բնակարան է ստացել 4 ընտանիք: