Աշոցքի բնակիչները բողոքում են Գյումրի–Բավրա միջպետական ճանապարհի վիճակից

Գյումրի-Բավրա միջպետական նշանակության մայրուղու 20 կիլոմետրանոց հատվածը չի սպասարկվում: Իսկ պատճառը ճանապարհի վիճակն է, ենթակա է հիմնանորոգման, փոսային նորոգումներն էլ չեն փրկում: Հիմնանորոգման համար ֆինանսավորում չի հատկացվում,  որովհետև «Հյուսիս-հարավ» նախագծով Թորոսից Աշոցք ընկած հատվածը արագընթաց մայրուղու մաս է կազմելու: «Հյուսիս-հարավ»-ին սպասելիս ճանապարհի վիճակն ավելի է վատացել: Աշոցքի բնակիչներն այսօր իրենց դժգոհություններն են ներկայացրել ճանապարհը սպասարկող ընկերությանը:

Գյումրի-Բավրա միջպետական ճանապարհի առանձին հատվածներ «Հյուսիս-հարավ»-ի մաս են կազմելու: Սա արագընթաց մայրուղու նախագծով է սահմանված, և հենց սա է պատճառը, որ հիմնանորոգման աշխատանքներ միջպետական նշանակության ճանապարհին չեն կատարվում: Այսինքն՝ կառավարությունը կրկնակի ծախսեր չի անում ու սպասում է «Հյուսիս-հարավ»-ի շինարարությանը: Բայց Աշոցքի  բնակիչներն այլևս սպասել չեն ուզում: Նրանք այսօր  հավաքվել էին գյուղապետարանի մոտ ու սպասում էին ճանապարհը սպասարկող ընկերության ներկայացուցիչներին:

Ձյունը հալվել է, ճանապարհին մեծ ու փոքր բազմաթիվ փոսերը նորից բացվել են ու ավելի խորացել: Թորոսից Աշոցք ընկած ճանապարհը 20 կիլոմետր է, միջպետական մայրուղու ամենաքայքայված հատվածն է: Սրան նաև ծանր բեռնատարների երթևեկությունն է նպաստել, որոնց անիվների տակ փոսային նորոգումն էլ չի դիմանում: Գյումրի-Բավրա ճանապարհի 8 կիլոմետրը հիմնանորոգման ծրագրերում է: Այս մասին գյուղացիներին Աշոցքի ճանապարհաշինական ընկերության աշխղեկը հայտնեց, իսկ ժամկետների մասին արդեն ընկերության տնօրենը խոսեց: Թորոսից-Աշոցք ճանապարհի 2 առանձին հատվածներում այս տարի հիմնանորոգում կկատարվի: Այս մասին տրանսպորտի և կապի նախարարությունից են «Ճանշին» ընկերության տնօրենին փոխանցել:

«Թորս-Աշոցք տարածքում 2 հատվածներ, մոտավորապես 8.5 կմ կապիտալ վերանորոգման համար նախագծման մրցույթ է հայտարարված: Այսինքն` եթե մրցույթ է հայտարարված նախագծման, նշանակում է, որ ուրեմն արդեն հույսեր կան: Ճանապարհների վիճակը վատ է: Նորմալ ճանապարհները, ըստ ամեն ГОСТ-ի, 7-8 տարվա ընթացքում պետք է նորից հիմնանորոգվեն: 20 տարի այս ճանապարհի վրա ոչ մի բան չի կատարվել: Միայն սպասարկումով ճանապարհ ենք պահել: Հիմա, եթե նախագծման համար մրցույթ է հայտարարվում, իմ կարծիքով՝ ամռանը ճանապարհաշինություն է լինելու»,– SHANTNEWS.am-ին ասել է Աշոցքի «Ճանշին» ընկերության տնօրեն Մարսել Կարապետյանը:

Նախագծման համար հայտարարված մրցույթին շինարարական մրցույթն է հաջորդելու: Աշոցքի «Ճանշին»-ի տնօրենն այս հարցում շահագրգռված է: Իր ընկերությունն էլ է մասնակցելու: Աշոցքում և Ամասիայում սպասարկող ու ճանապարհաշինություն իրականացնող ընկերությունն անփոփոխ է արդեն 30 տարի: Մինչ շինարարության մեկնարկը ժամանակավոր լուծման տարբերակներ 20 կիլոմետրանոց հատվածի համար չկան: Փոսերը շատ են, Աշոցքում էլ դեռ ձմեռը չի նահանջել ու նման պայմաններում, ըստ ընկերության տնօրենի, փոսալցումն էլ է անօգուտ:

Գյուղացիներն ու շինարարները երկար զրուցելուց հետո եկան ընդհանուր հայտարարի, որ էլի սպասել է պետք, Թորոս-Աշոցք ճանապարհահատվածի համար այլ լուծում չկա՝ բացի հիմնանորոգումից: Իսկ աշխատանքները հնարավոր է սկսել միայն ամռանը: