Առափիի սողանքային գոտում ակտիվություն է նկատվում

Առափիում սողանքների ակտիվացում է նկատվում: Վերջին դեպքը, երբ սողանքի հետևանքով բնակելի տներից մեկը տուժեց, անցած տարվա աշնանն էր: Ընդհանուր առմամբ, Առափիի սողանքային գոտում 146 տուն է գտնվում: 2 տարի առաջ պետական համաֆինանսավորման գումարները Առափիում այլ նպատակի օգտագործվեցին: Ճապոնական կառավարության հետ համատեղ ջրահեռացման համակարգ անցկացվեց ու սողանքի շարժը չափող սարքեր տեղադրվեցին: Հիմա փրկարարական վարչությունը նորից դիտարկումներ է կատարում, թե սարքերի տվյալներն ինչ տեղաշարժի մասին են խոսում և, ըստ այդմ, տարածքի տներին ինչ վտանգ է սպառնում:

Շիրակի մարզի ճգնաժամային կառավարման կենտրոնի մեծ էկրաններից մեկի վրա անընդհատ փոփոխվող  թվերն ու գրաֆիկները շատ կարևոր տվյալներ են ամբողջ Առափի գյուղի համար: Թվային տվյալներով արտահայտված է այն շարժը, որ գյուղում գրանցում է սողանքային գոտին: Ամենօրյա դիտարկումները, ըստ մասնագետների, փաստում են, որ Առափիի սողանքային գոտում քիչ, բայց շարժ կա: Այդ շարժին նպաստողը այն գրունտներն են, որոնց վրա կառուցված է գյուղը:

«Գրունտային շերտերում գտնվող կավի քանակությունն է, կավը ստեղծում է սահք, հնարավորություն է տալիս հողային շերտին սահելու: Առափիում կավի քանակությունը բավականին մեծ է, որն արդեն իսկ ապահովում է սահքը: Սահքի համար պետք է նաև խոնավություն, իսկ Առափիում ստորգետնյա ջրերի մակարդակը բարձր է: Սողանքային հատվածը կայուն է, լուրջ տեղաշարժեր չկան»,-  SHANTNEWS.am-ին ասել է Շիրակի մարզի փրկարարական վարչության պետի տեղակալ Լևոն Հովսեփյանը:

Տվյալներ ճգնաժամային կառավարման կենտրոնին հաղորդում են գյուղում տեղադրված ճապոնական սարքերը: Դրանք չափում են գրունտների սահքը, նաև տեղումները: Անձրևներն առայժմ քիչ են, բայց գրունտային ջրերն են շատ: Ճապոնացի մասնագետները Առափիում ջրամբար են կառուցել, որտեղ հավաքվում են գյուղից դրենաժային համակարգի միջոցով դուրս հանվող ստորգետնյա ջրերը:

Սողանքի քիչ ակտիվացումն էլ տարածքի արդեն վթարային դարձած տների վրա է ազդում: Օրինակը Մարտիրոսյանների տունն է: Գյուղում ամենաառաջինը այս տան բակն է կանաչում: Սողանքային սարի հարևանությամբ է, խոնավությունն էլ շատ:

«Այս տարածքի ընտանիքները ժամանակին, երբ ուսումնասիրություններ էին կատարվում, չփոխհատուցվեցին, որովհետև վթարայնության աստիճանը երրորդ կարգի գնահատվեց: Սողանքներ էլի կան, տներ կան, որտեղ շարունակվում են ճաքերը»,-SHANTNEWS.am-ին ասել է Առափիի գյուղապետի տեղակալ Ավետիք Պոլեյանը:

Առափիում վերջին 11 տարիների ընթացքում բնակարանային փոխհատուցման միակ դեպքն անցած տարի էր, երբ սողանքի հետևանքով խիստ վթարային ճանաչված տանն ապրող ընտանիքը գումարային փոխհատուցում ստացավ նոր բնակարան գնելու համար: Սա մարզի հրատապ լուծում պահանջող խնդիրների ծրագրով էր: Հիմա Առափին սուբվենցիոն ծրագրերի մասնակցության հայտ է ներկայացրել: Այն նորից գյուղում ջրահեռացման համակարգի կառուցմանն է վերաբերում: