Ճգնավոր կամ Վանք կոչվող սրբատեղիում կատարվածը սադրանք չէ. պարզաբանումներ Ջավախքից

Ապրիլի 3-ին Վրաստանի Խուլգումո գյուղի երիտասարդները, ուխտի գնալով Ճգնավոր կամ Վանք կոչվող սրբատեղի, տեսել են, որ մատուռում ամեն ինչ տակնուվրա է արված, սրբապատկերները կոտրված են ու թափված գետնին: Կատարվածը լրատվամիջոցները «վանդալիզմ» որակեցին: SHANTNEWS.am-ը փորձեց մանրամասներ պարզել տեղի ունեցածի վերաբերյալ:

Ախալքալաքի քաղաքապետ Յուրիկ Ունանյանը հաստատեց՝ նման դեպք եղել է. մատուռի դուռը մշտապես բաց է եղել, հավատացյալները կարող էին մտնել, մոմ վառել, աղոթել:

«Երևի երեք օր առաջ՝ առավոտյան, մատուռ են մտել հարևան գյուղի բնակիչները, տեսել, որ այդ վիճակում է՝ սրբապատկերները պատռված, մոմակալները կոտրված, փչացրել են եղած գույքը, դիտավորյալ, իհարկե: Քննություն է տարվում, քրեական գործ է հարուցված, քննությունը կպարզի՝ ինչ չափի վնաս է հասցվել մատուռին»,- ասաց նա:

Ունանյանը դժվարացավ ասել՝ կասկածյալներ կա՞ն արդեն, թե՞ ոչ, միաժամանակ նշեց՝ եթե կասկածյալներ լինեին, տեղի օրենսդրության համաձայն՝ միանգամից 48 ժամվա ընթացքում մեղադրանք է ներկայացվում:

Սրբատեղին լրատվամիջոցներում ներկայացվում էր որպես «եկեղեցի», Ունանյանն ասաց, որ այն եկեղեցի չէ.

«Դա մեր վանքն է, այդպես ենք ասում, մատուռ է, էլի, եկեղեցի չէ»:

Վրացական Jnews.ge կայքի լրագրող Աղունիկ Այվազյանը պատմեց, որ ապրիլի 3-ի երեկոյան իրեն զանգահարել են Խուլմուգո գյուղի երիտասարդները, որ առավոտյան, ուխտի գնալով վանք, ականատես են եղել այդ տեսարանին:

«Նրանք ունեին նաև լուսանկարներ ու տեսանյութ, խնդրեցին, որ գնամ, տեղում անմիջապես նկարահանեմ, բայց քանի որ ուշ ժամ էր, վանքն էլ ամայի տարածքում է՝ գետը այդ տարածքը բաժանում է երկու ափի, մի ափին այդ վանքն է, մոտակայքում տներ չկան, բնակելի տարածքներից հեռու է, խուսափեցի գնալուց, ասացի՝ լուսանկարները տան, հրապարակեմ: Իրենք ուղղակի չգիտեին՝ ինչ անեն, եկեղեցի՞ դիմեն, ոստիկանությո՞ւն, ես հորդորեցի դիմել համապատասխան մարմիններին: Մենք, որպես լրատվամիջոց, խուսափեցինք «վանդալիզմ» բառը կիրառելուց»,- ասաց նա:

Այվազյանը հայտնեց, որ իրենց մոտ ավանդույթ կա՝ վանք գնալիս, իրենց հետ տանում են սրբապատկերներ, այսինքն՝ սովորական սրբապատկեր, որ մեծ արժեք չի ներկայացնում, տանում են, մատուռում տեղադրում, և դա Աստծուն ուղղված շնորհակալություն է: Լրագրողին տեղեկացրել են՝ սրբապատկերները պատռել են, գույքը փչացրել, խաչեր են հանել: Այվազյանը նշեց՝ դա այնքան էլ վանդալիզմ չէր, քանի որ շինությանը վնաս չէր հասցվել:

«Կարող ենք ենթադրել, որ դա ավելի շատ եղել է կյանքից չարացած կամ Աստծուց նեղացած մեկը, որ գնացել է այդ արարքին: Խնդրում ենք խուսափել «վանդալիզմ» բառի կիրառությունից: Ապրիլի 4-ին մեր նյութի հիման վրա Ախալքալաքի ոստիկանությունում քրգործ հարուցվեց՝ մշակութային ժառանգությանը վնաս պատճառելու կետով, ոստիկաններն աշխատել են տեղում, ամեն ինչ նկարահանել են, տեսել են, ամեն ինչ ուղարկված է փորձաքննության, ու հիմա հետաքննություն է: Տեղում ոստիկաններն են հսկում, գրեցին բոլոր լրատվականները, բայց չգիտեմ ինչու՝ բոլորը նշում էին «հայ-վրացական» մատուռ, փորձում կրոնական, ազգային և այլ երանգներ տեսնել, սեպ խրել երկու ազգությունների միջև, մինչդեռ ազգային որևէ ենթատեքստ չի կարող ունենալ սա»,- նշեց նա:

Լրագրողը նաև ասաց, որ համաձայն չէ հնչող կարծիքներին, թե դա սադրանք է, թե թուրքերն են արել: Այվազյանը տեղեկացրեց, որ այս մատուռը 2018-ից համարվում է մշակութային ժառանգություն, այսինքն՝ պահպանվող տարածք է: Մատուռը, Վրաստանի մշակութային ժառանգության պահպանման գործակալության տվյալներով, 13-րդ դարի է:

«Այստեղ բոլորն են գնում ուխտի, հունվարի 6-ին` Ջրօրհնեքի ժամանակ, գնում ենք, այդ սառը ջրում մեր երիտասարդները լողանում են, մենք հավատում ենք, որ դա բուժիչ է և մեր իղձերն է կատարում: Երեկ Ջավախքի ընդհանուր առաջնորդական փոխանորդ Տեր Մաղաքիա վարդապետ Ամիրյանի պաշտոնական ընդունելության արարողությունն էր. նա նոր է նշանակվել Ջավախքում: Որպես հոգևոր առաջնորդ՝ նա թեմի առաջնորդի հետ գնացել էր այդ մատուռ, տեսել, որ որևէ արժեքավոր բան չկա: Այս պահին տեղում վերահսկողություն են իրականացնում ոստիկանության աշխատակիցները»,- տեղեկացրեց նա: