Շիրակի մարզում 654 ընտանիք ապրում է տնակներում

Հաշվառվում են ոչ միայն Գյումրիի, այլև Շիրակի մարզի գյուղական բնակավայրերի ժամանակավոր կացարանները: Ի տարբերություն Գյումրիի՝ գյուղերում տնակների հաշվառումն արդեն ավարտված է։ Նոր տվյալներով՝ մարզի 19 համայնքներում 654 ընտանիք տնակներում է ապրում, այդ թվում են նաև այն 163 ընտանիքները, որոնց կառավարությունը բնակարանի շահառու է ճանաչել։ Իսկ մնացած ընտանիքների թվում են նրանք, որոնք երկրաշարժի ժամանակ բնակարան են կորցրել, բայց տարբեր պատճառներով բնակարանային փոխհատուցում չեն ստացել։

Ախուրյանում 199 ընտանիք տնակում է ապրում, թեև պետությունը 2013 թվականից անօթևանության հարցն այստեղ փակված է համարել։ Բնակարանի փոխհատուցման կարիք ունեցող ընտանիքներ կան, բայց 2008 թվականին նրանք շահառու չեն ճանաչվել: 199 ընտանիքների թվում քիչ չեն նաև կիսված, բազմանդամ, նաև բնակարանների գնման վկայականներ ստացած ու չիրացրած, կամ այդ գործարքներից հետո նորից տնակներում հայտնվածները: Ըստ մարզպետարանի քաղաքաշինության վարչության բնակարանային և ենթակառուցվածքների բաժնի պետ Տիգրան Հարությունյանի՝ Ախուրյանից մոտ 50 ընտանիք 2008 թվականի հաշվառումից դուրս է մնացել ոչ լիարժեք փաստաթղթեր ներկայացնելու պատճառով։

Գասպարյանների ընտանիքը 2008 թվականին մերժում է ստացել այն հիմքով, որ ընտանիքի հայրը 1989 թվականին որպես փոխհատուցում ստացել է սեփական հողատարածք, որտեղ տուն է կառուցել: Նարինե Գասպարյանի ընտանիքի անդամներն այդ տան համասեփականատերերը չեն, տունը ամուսնու եղբորն է պատկանում, բայց և այնպես, հանձնաժողովը նրանց շահառու չի ճանաչել:

Գասպարյանները մինչ 2008 թվականի մերժումը բնակարանների գնման վկայագիր են ստացել ու չեն կարողացել իրացնել, վերադարձրել են: Մեկ տասնյակից ավելի ախուրյանցի ընտանիքներ, որոնք տուն են կորցրել ու չեն հասցրել հաշվառվել, այլ բնակավայրերում են ապրում:

Ախուրյանի համայնքապետարանի քարտուղար Հսայկանուշ Խաչատրյանի խոսքերով՝ եղել են ընտանիքներ, որոնք դիմել են դատարան՝ անօթևանության կարգավիճակը վերականգնելու, բայց մերժվել են։ 1 ընտանիքի, այդուհանդերձ, հաջողվել է մի քանի օր առաջ դատարանի վճռով վերականգնել բնակարանային իրավունքը: Ոչ միայն Ախուրյանում, մարզի այլ համայնքներում ևս քիչ չեն ընտանիքները, որոնք չեն հասցրել հաշվառվել մինչև 2008 թվականի նոյեմբերը: Գյումրիի բնակիչ Լիա Հովհաննիսյանին արդեն 10 տարի է մերժում են՝ պատճառաբանելով, թե սահմանված ժամկետում չի հասցրել փաստաթղթեր ներկայացնել քաղաքապետարան: Բայց նա էլ պնդում է, թե ինքը փաստաթղթեր ներկայացրել է, դրանք քաղաքապետարանում են կորել:

Գյումրիում մոտ 200 ընտանիքներ կան, որոնք մինչև 2008 թվականը չեն հասցրել հաշվառվել ու կորցրել են բնակարանային իրավունքը: Նույն խնդիրը նաև գյուղերում է: Ընտանիքների տնակային պատմություններն ուսումնասիրելուց բացի՝ 30 տարի անց գյուղերում ևս տնակների քարտեզագրում է կատարվել: Այս սխեմաների վրա առանձնացվել են տնակները:

Քարտեզը դառնալու է ապացույց հետագայում նոր տնակների տեղադրումը բացառելու համար: 654 բնակեցված տնակներից բացի, մարզում կան ժամանակավոր կացարաններ, որոնք հասցեավորված են որպես հիմնական կառույցներ: Օրինակ՝ Աշոցքի Կոճոռ թաղամասը: 164 ընտանիք ապրում է փայտաշեն երկհարկանի շինություններում՝ սեփականության իրավունքով: Կոճոռի խնդիրը ևս ներկայացվել է կառավարություն: