107 տարի առաջ ապրիլի 15-ին խորտակվեց իր ժամանակի ամենամեծ նավը՝ «Տիտանիկը»

269մ երկարություն, 28մ լայնություն, 46 328  տոննա քաշ և 7․5 մլն դոլար ծախս: Ահա այսպիսին էր աշխարհում իր ժամանակի ամենամեծ ու ամենաշքեղ մարդատար նավը՝ «Տիտանիկ»-ը:

Կառուցվեց 3 տարի, նավարկեց 5 օր

Այս նավը երկրորդն էր այն երեք վիթխարի նավերից, որոնք կառուցվել էին Հարլենդի և Վոլֆի նավաշինական գործարաններում՝ Բելֆաստում: Կառուցման համար պահանջվեց 3 տարի, նավարկեց ընդամենը 5 օր`1912 թվականի ապրիլի 10-15-ը:

Ապրիլի 16-ից մամուլը հեղեղված էր «Տիտանիկ»-ի նկարներով ու ողբերգության ճիշտ կամ սխալ մանրամասներով: «The New York Times»-ը ողբերգութանը հաջորդող շաբաթվա ընթացքում 75 էջ նվիրեց տեղի ունեցածը ներկայացնելու համար, իսկ bրիտանական «The London Daily Mail» թերթը ապրիլի 16-ին հաղորդեց.« «Տիտանիկը» խորտակվեց, սակայն ոչ ոք չզոհվեց»: Նրա օրինակին հետևեցին նաև այլ թերթեր: Մինչդեռ նավի վրա գտնվող 2207 մարդուց ողջ էին մնացել ընդամնեը 712-ը:

Նավի խորտակման ամենաշրջանառված ու հավանական տարբերակը հսկա սառցաբեկորն էր: Չնայած 1980-ականներին ծովագնաց Ռոբերտ Բալլարդը, ուսումնասիրելով նավի բեկորները, նոր վարկած առաջ քաշեց՝  իբր իրականում շոգենավը մինչև խորտակվելն էր բաժանվել երկու մասի, ինչը նշանակում էր, որ այն կառուցված է եղել ցածրորակ պողպատից:

Ի դեպ, «Տիտանիկը» միակ օվկիանոսային նավն է, որ խորտակվել է սառցաբեկորի հետ բախման հետևանքով:

Ամենամեծ սխալը

Նավի կառուցողներն ավելի քան համոզված էին նավի անխորտակելի լինելու մեջ: Դա է փաստում այն, որ նավի վրա տեղավորել էին ընդամնը 20 փրկամակույկ՝ 16 փրկարարական և 4 ծալովի նավակ, որոնք կարող էին տարհանել  ընդամնեը 1170 մարդու` ուղևորների միայն կեսին, մինչդեռ ուղևորները 2200-ն էին: Արդյունքում՝ առաջին դասի ուղևորներից փրկվեց 60 տոկոսը, իսկ երկրորդ դասի ուղևորներից` միայն  25 տոկոսը` ընդհանուր թվով 32 տոկոս՝ 705 մարդ։

Նավը՝ ներսից

Նավի վրա ամենուր առկա էր խտրականություն, և աշխարհի ամենաշքեղ համարվող նավը շքեղ էր միայն առաջին կարգի ուղևորների համար: Նրանց տոմսի արժեքը  4 350 դոլար էր, որը համարժեք է մերօրյա  69 600 դոլարին: Իսկ երկրորդ դասի 700 ուղևորների համար նավի վրա կար ընդամնեը 2 լոգարան:

Նավապետը

Նավապետը Էդվարդ Ջոն Սմիթն էր, ով իր 62 տարիներից 37-ն անցկացրել էր նավի վրա, և «Տիտանիկ»-ի առաջին նավարկությունից հետո գնալու էր թոշակի: Չհասցրեց:

Փրկվածներից վերջինը

Տիտանիկի նավաբեկությունից փրկվածներից վերջինը մահացավ 2009 թվականին` 97 տարեկանում: Նավի խորտակման ժամանակ Միլվինա Դինն ընդամնեը 2․5 ամսական էր:

«Տիտանիկը»

4 կմ խորություն, Ատլանտիկ օվկիանոսի հատակ: Հենց այդտեղ իր հանգրվանը գտավ 7․5 մլն դոլարն ու հարուստ ուղևորների հարստությունը: Խորտակվեց ընդամնեը 2 ժամ 40 րոպեում:

Իսկ ՅՈՒՆԵՍԿՕ-ն նավի խորտակումից 100 տարի հետո միայն` 2012թվականին, հատուկ կոնվենցիայով «Տիտանիկ»-ի մնացորդները հայտարարեց մշակութային ժառանգություն: