Որքա՞ն պետտուրք կսահմանվի ցեմենտի և կլինկերի համար

Ինչպես արդեն հայտնել է SHANTNEWS.am-ը, այսօր տնտեսական հարցերի մշտական հանձնաժողովում քննարկվում է նաև « «Պետտուրքի մասին» օրենքում փոփոխություններ կատարելու մասին» նախագիծը` երկրորդ ընթերցման ներկայացնելուց առաջ: Կառավարությունը ներկայացրել է իր առաջարկները: Մինչ Տնտեսական զարգացման և ներդրումների նախարարի կողմից կառավարության մոտեցումը ներկայացնելը Բաբկեն Թունյանը տեղեկացրել է.

«Ի սկզբանե որոշված էր, որ պետք է ներկրվող ցեմենտի և հումքի վրա պետտուրք՝ 22 հազար դրամի չափով: Հանձնաժողովի նիստում առաջարկեցինք կլինկերի նկատմամբ կիրառվող պետտուրք չկիրառել, քանի որ փոքր արտադրողներ կային, որոնց շահերը հաշվի չէին առել, իսկ ցեմենտի վրա կիրառվող պետտուրքի վրա դնել մեկամյա ժամկետ, բայց քանի որ հարցն ուսումնասիրությունների կարիք ուներ, ստեղծել ենք աշխատանքային խումբ, որի շրջանակներում հանդիպումներ ունեցանք ցեմենտ արտադրողների ու կառուցապատող ընկերությունների հետ: Զուգահեռ փակ հանդիպումներ, առանձին վերլուծական բնույթի աշխատանքներ ենք կատարել, տվյալները համադրել ենք ու եկել ենք մի որոշման»:

Տիգրան Խաչատրյանը ներկայացրեց, թե ինչ եզրահանգման են եկել:

«Ուզում եմ թվարկել էն սկզբունքները, որովհետև քննարկման ժամանակ զգալի հարցեր նվիրված էին դրան, թե որոնք են սկզբունքները, նպատակն է պահպանել աշխատատեղերը, որոնք կան, արտաքին ազդակները վտանգելու միտում ունեն, որպեսզի տեղի արտադրողները դառնան մրցունակ, եկել ենք եզրակացության՝ կիրառել ժամանակավոր պաշտպանական միջոց, որի ընթացքում հնարավորություն կունենաք հետևելու շուկայի զարգացումներին, ներդրումային ծրագրերին, որի ժամանակ որոշումներ կկայացնենք»:

Ինչ վերաբերում է առաջարկվող փոփոխություններին, տեղեկացրել է.

«Մենք առաջարկում ենք, որ պետտուրքի համար սահմանվի 14 հազար դրամ: Ինչո՞ւ, որովհետև կառավարության հաշվարկը կառուցված էր այն թվերի, վրա, որոնք վերաբերում էին խոշոր արտադրողի` նախորդ տարում ունեցած արտադրական թվերին, այն ժամանակ մենք ունեինք 37 հազար դրամ` մեկ տոննայի հաշվով, հետագայում երբ լրացուցիչ տեղեկություններ ստացանք արտադրողից ու ՊԵԿ-ից, ստացվեց, որ արտադրական ինքնարժեքը մոտ է 31 հազար դրամին:

Իսկ կլինկերը ձեռք է բերվում սահմանին նույն գնով, ինչ ցեմենտը: Ցեմենտի հումքի ներկրման ծախսերի վերաբերյալ ներկայացրել է այլ հաշվարկներ ևս, որի արդյունքում հանգել են հետևյալին.

«Առանց տուրք կիրառելու` փոքր արտադրողը, որ կլինկերից պիտի արտադրի ցեմենտ, չի կարողանալու վաճառել այնպիսի գնով, որ լինի ցածր, քան տեղական խոշոր արտադրողը, և գտնում ենք, որ անգամ եթե տուրք չենք կիրառում,  չի կարողանում ստանալ գնային առավելություն խոշոր արտադրողի նկատմամբ, որ իր գոյությունը վտանգ ներկայացնի նրանցից յուրաքանչյուրի համար: Համապատասխանաբար, մենք շարունակում ենք առաջարկը պահել ուժի մեջ, որ օրենքի նախագիծն ընդունվի և մինչև 2020թ.-ի ապրիլի 20-ը կիրառվի»,- հայտնեց Տիգրան Խաչատրյանը:

«Այսինքն՝ ունենում ենք 14 հազար դրամ պետտուրք մինչև 2020 թ.-ի ապրիլի 1-ը, կլինկերի նկատմամբ տուրք չի կիրառվում: Ըստ անհրաժեշտության` փոփոխություններ կկատարենք»,- հայտնեց Թունյանը: