Ո՞ւր գնալ Հայաստանից առանց վիզա. ցանկը համալրվել է

SHANTNEWS.am-ն ավելի վաղ ինտերակտիվ նյութով ներկայացրել էր, թե որ երկրները մենք կարող ենք այցելել առանց մուտքի վիզայի: Այդ երկրների թվում է Բրազիլիան, Արգենտինան, Ուրուգվայը, Բելառուսը, Ուկրաինան, Ռուսաստանը, ամառը նաև Մոնտենեգրոն  և այլն: Ցանկն այսուհետ համալրվել է ևս մեկով. հիմա Հայաստանից նաև Չինաստան է հնարավոր գնալ առանց վիզա:

Մայիսի 26-ին ՀՀ արտգործնախարար Զոհրաբ Մնացականյանն ու Չինաստանի ժողովրդավարական հանրապետության պետական խորհրդի անդամ ԱԳ նախարար Վան Իին ստորագրել են  «ՀՀ կառավարության և ՉԺՀ կառավարության միջև սովորական անձնագրեր կրող անձանց համար մուտքի արտոնագրի պահանջի փոխադարձաբար վերացման մասին» համաձայնագիր: Այսինքն՝ ՀՀ յուրաքանչյուր քաղաքացի կարող է անարգել մուտք գործել  Չինաստան առանց մուտքի վիզայի:

ՀՀ զբոսաշրջության կոմիտեի տվյալներով  Չինաստանից Հայաստան զբոսաշրջիկների թիվը նկատելիորեն աճում է: 2018 թվականին Չինաստանից Հայաստան ժամանող զբոսաշրջիկների թիվն աճել է 59.9 տոկոսով 2017-ի համեմատ: Աճի դինամիկա առկա է նաև 2019 թվականի առաջին եռամսյակում: Ընթացիկ տարվա առաջին երեք ամիսներին 2018 թվականի նույն ժամանակահատվածի համեմատ Չինաստանից զբոսաշրջիկների թիվն աճել է 40 տոկոսով:

Որպես զբոսաշրջային ուղղություն Չինաստանը հայերի կողմից ամենապահանջվածներից չէ: Քանի որ վիզային ռեժիմ էլ չի գործելու, SHANTNEWS.am-ը ներկայացնում է Չինաստանում ամենահայտնի տեսարժան վայրերը:

1. Չինական մեծ պարիսպ

«Եթե չես եղել չինական մեծ պարիսպում, ուրեմն դու չես եղել Չինաստանում»: Չինաստանում շրջած զբոսաշրջիկների հայտնի խոսքն է:

Չինական մեծ պարիսպը աշխարհում ամենաճանաչելի սիմվոլն է Չինաստանի համար և տեղ է գտել յոթ հրաշալիքների նոր ցուցակում : Պարիսպն ունի 8000 կմ երկարություն և կառուցվել է հիմնականում արևելքից արևմուտք Չինաստանի հյուսիսային սահմանների երկայնքով՝ պաշտպանելու չինական պետություններն ու կայսրությունները Եվրասիական տափաստանների տարբեր քոչվոր խմբերի հարձակումներից և նվաճումներից :

2. Տերակոտե բանակ

Տերակոտե բանակը գետնի տակ է մնացել ավելի քան 2000 տարի: 1974 թվականին տեղացիները ջրհոր փորելիս արել են աշխարհի հնագիտական գլխավոր բացահայտումներից մեկը : 1987 թվականին Տերակոտե բանակը ճանաչվել է  համաշխարհային մշակույթի ժառանգություն:

Այն գտնվում է Սիան քաղաքից ոչ հեռու Ցին Շիխուանդի կայսեր դամբարանի մոտ: Ընդհանուր առմամբ չինական ռազմիկների և նրանց ձիերի ավելի քան 8099 ամբողջական տերակոտե մարդու հասակի արձանների խումբ է: Կարծես մի ամբողջ բանակ կազմ պատրաստ կանգնել է:

Ըստ ավանդության՝ այս արձանները պետք է  կայսերը հաղորդեին ուժ և բավարարեին նրա իշխանական հավակնությունները հանդերձյալ կյանքում։

Կենդանի ռազմիկներին թաղելու փոխարեն, ինչպես սովորաբար արվում էր, կայսեր հետ թաղել են այդ ռազմիկների նույնատիպ արձանները: Բայց պատմությունն ասում է, որ  թաղել էին նաև մոտ 70 հազար ողջ և առողջ աշխատավորների իրենց ընտանիքների հետ։

3.Պեկինի արգելված քաղաքը

Արգելված քաղաքն աշխարհի ամենամեծ պալատային համալիրն է: Մի ժամանակ այստեղ սովորական մարդկանց մուտքն արգելվում էր և հենց այստեղից էլ ծագել է Արգելված քաղաք անվանումը:

Այսօր արդեն յուրաքանչյուրը կարող է  այցելել այս քաղաք և հիանալ չինական հնագույն ճարտարապետությամբ: Պալատային համալիրը եղել  է Մինև Քին դինաստիաների կայսերական պալատը մինչև 1911 թվականը: Այն 560 տարի շարունակ  24 միապետի նստավայր է եղել:

5. Լի գետը

Կարստային լանդշաֆտը, որը ձգվում է Լի գետի հորիզոնում, գերել է շատերի սրտերը: Հայտնի պոետներ ու նկարիչներ են ոգեշնչվել այս տեսարանով:  Այսօր սա լուսանկարիչների ամենասիրելի վայրն է:

6. Մեծ պանդաների կենտրոն Չենդուում

Չինացի են նաև մեր բոլորի կողմից սիրելի, փափուկ պանդաները: Չինաստանում տարբեր կենդանաբանական այգիներում շատ են պանդաները, բայց կան նաև հատուկ խնամքի կենտրոններ, որտեղ զբոսաշրջիկները նույնպես կարող են այցելել: Այստեղ ոչ թե ճաղերի հետևից, այլ հենց իրենց բնական միջավայրում է հնարավոր տեսնել պանդաներին:

7. Պոտալա ամրոցը

Եվ, իհարկե, Տիբեթ: Պոտալա ամրոցը Տիբեթի սիմվոլներից է: Այն բուդդայական տաճարային համալիր է: Եղել է Դալայ-Լամայի հիմնական նստավայրը մինչև Չինաստանի ներխուժումը Տիբեթ 1959 թվականին: