Կառավարության գրանցած ցուցանիշներն ընդդիմության հետ համատեղ աշխատանքի արդյունք են. Փաշինյան

ՀՀ վարչապետ Նիկոլ Փաշինյանը խորհրդարանում 2018 թ. պետական բյուջեի հաշվետվության քննարկման ժամանակ ընդգծեց՝ նախորդ տարի Հայաստանում մակրոտնտեսական կայունության պահպանման երկու պատճառ կա: Դրանք, ըստ վարչապետի, հետևյալն են.

«Պետք է գոհունակությամբ արձանագրենք, որ ՀՀ-ում, այնուամենայնիվ, կան որոշակի կայացած ինստիտուտներ: Դրանք թավշյա հեղափոխության շրջանում իրենց դերակատարումն ունեցան և ցույց տվեցին, որ անկախ քաղաքական վայրիվերումներից՝ պետական համակարգի բնականոն գոյությունը կարող են ապահովել: Սա շատ լավ նորություն է: Երկորրդը Հայաստանում տեղի ունեցած հեղափոխության թավշյա բնույթն է, որն այս ընթացքում բազմիցս քննադատվեց և շարունակվում է քննադատվել: Շատ է խոսվում, որ թավիշը շատ է, պետք է հեղափոխությունը շատ ավելի կոշտ լինի: Իհարկե, կարող էր և կարող է, բայց իրավիճակի առանձնահատկությունն այն է, որ կառավարությունը չի կարող իր առաջ ունենալ մեկ խնդիր»:

Փաշինյանը նշեց՝ կառավարությունն իր գործունեության բերումով բազմաթիվ խնդիրներ ունի լուծելու: Նա ասաց՝ ինչպես նախկինում՝ ինքը կառավարության գործունեությունը համեմատում է բազմաթև կշեռքի կամ ճոճանակի հետ, սովորական կշեռքները եթե ունեն երկու նժար, կառավարությունը կառավարում է բազմանժար կշեռք, և եթե դրանցից որևէ մեկի հավասարակաշռությունն անհամաչափորեն խախտվի, անխուսափելիորեն այլ ոլորտներում կունենանք կոլապսներ:

«Մեր կառավարությունն իր առաջ խնդիր է դրել, և մեր այն քաղաքական մեծամասնությունը, որի վրա հենվում է կառավարությունը, իր առաջ խնդիր է դրել լինել բալանսավորված, չկորցնել հավասարակշռությունը որևէ ոլորտում: Իհարկե, կարող է ՀՀ-ում ձերբակալվածների,  կալանավորվածների և դատապարտվածների ցուցանիշներում երկնիշ, եռանիշ, քառանիշ աճ ունենալ, բայց դա կազդեր նաև այլ ցուցանիշների վրա: Մենք ոչ միայն նախորդ կառավարության արձանագրած ցուցանիշը կամ նպատակադրումներն ենք գերակատարել, այլև` ինքներս մեր: Մեր նպատակները շատ ավելին են: Գրանցվել է 7,1 տոկոս ՀՆԱ աճի ցուցանիշ՝ առաջին եռամսյակում, իսկ ապրիլ ամսվա տվյալներով՝ տնտեսական ակտիվության ցուցանիշը արձանագրվել է 9,2 տոկոս»,- նշեց նա:

Վարչապետը շեշտեց՝ համարում է, որ այս ցուցանիշները համատեղ աշխատանքի արդյունք են, ոչ միայն կառավարության գործունեության արդյունքն են, այլև կառավարության – խորհրդարան համագործակցության, այդ թվում՝ ընդդիմադիր գործընկերների աշխատանքի արդյունք, քանի որ այն խորհրդարանական քննարկումները, որոնք տեղի են ունենում, երբեմն լինում են սուր, դրա հետ կապված տարբեր կարծիքներ են հնչում, բայց ինքը կարծում է, որ ժողովրդավարության պայմաններում այդ էներգիան, որ պետք է տանի առաջընթացի, ձևավորվում է այդ քննարկումների արդյունքում:

Փաշինյանը հորդորեց քննադատությունների ընկալման, հասցեագրման, ձևակերպման մեջ լինել ավելի պրոֆեսիոնալ և միմյանց հանդեպ հարգալից, բայց ինքը կասկած չունի, որ խորհրդարանն այն միջավայրն է, որտեղ ձևավորվում է այն էներգիան, որ պետք է ապահովի հետագա առաջընթացը, ապա գոհունակություն հայտնեց, որ այսօրվա քննարկման միջավայրն ավելի կամերային է: