Կայացավ նախագահի ամենամյա մրցանակաբաշխությունը

Հանրապետության նախագահ Արմեն Սարգսյանն այսօր՝ հունիսի 10-ին, ամենամյա մրցանակներ է հանձնել լավագույն և արժեքավոր ստեղծագործություններ հեղինակած, հայտնագործություններ և աշխատանքներ կատարած՝ կրթության, գիտության և մշակույթի ոլորտները ներկայացնող անձանց:

2001թ-ից մինչ օրս 405 անհատներ և կազմակերպություններ արդեն արժանացել են նախագահի մրցանակների, այդ թվում 28 միջազգային:

Այսօր մրցանակները հանձնել են նախագահ Արմեն Սարգսյանը և ամենամյա մրցանակաբաշխությունը նախաձեռնած «Պողոսյան հիմնադրամի» համանախագահ Ժան Պողոսյանը:

«Ուրախ ենք, որ այս մրցանակաբաշխությունը ավանդույթ է դարձել և ուրախ եմ բոլորիդ այստեղ ողջունել: Իմ եղբոր՝ Ալբերտի հետ, մենք ստեղծեցինք այս մրցանակը` ճանաչելու և պարգևատրելու համար լավագույն անձանց, երիտասարդներին տարբեր ոլորտներում, որոնք ՀՀ ապագան են: Շնորհակալություն ձեր նվիրվածության ու աշխատանքի համար: Պետք է հիշել, որ միայն հաստատակամության և տքնաջան աշխատանքի շնորհիվ է, որ առաջանում է կայծը և բացահայտվում է տաղանդը: Ուզում եմ դիմել նրանց, ովքեր հաջողության չհասան, շարունակե´ք ձեր ջանքերը, որ հասնեք նաև այս փուլին, երբեք մի´ վհատվեք, շարունակեք առաջ գնալ, անձնատուր մի´ եղեք և համառություն դրսևորե´ք և կհասնե´ք Ձեր նպատակին: Ուզում եմ շնորհակալություն հայտնել նաև մրցանակի դափնեկիրներին՝ Ցեղասպանության ճանաչման համար իրենց աշխատանքի համար, որը գնալով ավելի մեծ կարևորություն է ստանում միջազգայի կտրվածքով, շնորհակալություն ձեր բերած նպաստի համար՝ մեր ընդհանուր նպատակին հասնելու համար»,- ասաց Ժան Պողոսյանը:

Ներկայումս նախագահի մրցանակը շնորհվում է հետևյալ անվանակարգերում 

• Հայոց ցեղասպանության ճանաչման գործում նշանակալի ավանդի համար
• Բժշկագիտություն
• Բնական գիտություններ
• Ֆիզիկա
• Տեխնիկական գիտություններ և տեղեկատվական տեխնոլոգիաներ
• Հումանիտար գիտություններ
• Գրականություն
• Արվեստ։

Շնորհվում է նաև նախագահի երիտասարդական մրցանակներ 

• Վիզուալ արվեստ
• Գրականություն
• Դասական երաժշտություն՝ երգեցողություն և գործիքային կատարում անվանակարգերում:

Նախագահի մրցանակը շնորհվում է վկայագրով, մեդալով և դրամական պարգևով: Դրամական պարգևը կազմում է շուրջ 5 մլն ՀՀ դրամ, իսկ երիտասարդական մրցանակը՝ 1 250 000 դրամ:

Մրցանակն ունի նաև կարգախոս՝ «Արժևորելով միտքն ու համառությունը», իսկ հայկական մուֆլոնի եղջյուրները պատկերող տարբերանշանի գաղափարի հիմքում ընկած է մրցանակի արժեքների վերաիմաստավորումը, մասնավորապես՝ հայերին բնորոշ աշխատասիրությունն ու հաստատակամությունը, որոնք օգնում են առաջ շարժվելու ի հեճուկս դժվարությունների:

Մրցանակը շնորհվում է մեկ անգամ: Հավակնորդների աշխատանքները դիտարկում են հատուկ մասնագիտական հանձնախմբերը, ովքեր ռոտացիոն կարգով փոխվում են 5 տարին մեկ՝ ապահովելով աշխատանքի թափանցիկությունը: