Գիտնականներն ահազանգում են՝ սկսվում է միայնության համաճարակ

Որքան էլ տարօրինակ է՝ համացանցի, տեսակապի լայն հնարավորությունների դարաշրջանում, երբ մեկ հպումով կարելի է շփվել  աշխարհի ցանկացած կետում գտնվող մարդու հետ, միայնությունն ահագնացող սպառնալիք է դառնում: Գիտնականների հաշվարկով՝ իրենց միայնակ զգացող մարդկանց թիվն անընդհատ աճում է: Ընդ որում, խոսքը տարեցների մասին չէ, ում երեխաներն ամուսնացել են կամ պարզապես հեռացել: Միայնակ են իրենց զգում երիտասարդները, ովքեր սոցիակալան ցանցերի ակտիվ օգտատերեր են: Ակնհայտ է, որ հեռախոսային շփումը կամ սոցկայքերում նամակագրությունը չի փարատում միայնությունը: Զարմանալի չէ, որ Անգլիայում մի քանի տարի առաջ հայտնվել է Միայնության նախարարություն, որը, հասկանալի է, զբաղվում է միայնակ մարդկանց խնդիրներով:

Գիտնականներն ուսումնասիրել են 3 մլն մարդու և պարզել՝ միայնությունը լրացուցիչ ռիսկ է առողջության և երկարակեցության համար, մինչդեռ սոցիալական ակտիվ շփումները դրական են ազդում կյանքի որակի և առողջության վրա, բացի այդ, երկարակեցության հնարավորություն են տալիս:

Միայնությունն ավելի վտանգավոր է, քան ճարպակալումը: Ընդ որում, միայնության համաճարակ նկատվում է ամբողջ աշխարհում:

Գիտնականները ևս մեկ հետաքրքիր հետազոտություն են կատարել՝  ուսումնասիրել են քաղցկեղով հիվանդ 2 մլն մարդու: Պարզվել է՝ զուգընկերոջ առկայությունը մոտ 20 տոկոսով նվազեցնում է մահացությունը: Ամուսնացածներն ավելի հեշտ են ապաքինվում, քան միայնակները: Զուգընկերոջ օգնությունը քաղցկեղով հիվանդներին երբեմն ավելի արդյունավետ կարող է լինել, քան քիմիաթերապիան:

Եզրակացությունը մեկն է՝ ջերմ հարաբերությունների քայքայումը հանգեցնում է  առողջական խնդիրների սրման: Միայնությունը կարող է հակվածություն առաջացնել ալկոհոլի, թմրանյութերի նկատմամբ, սննդակարգի խանգարման ու ֆիզիկական ակտիվության նվազման պատճառ դառնալ, հենց դրանք էլ  հաճախ դառնում են օնկոլոգիական հիվանդություների առաջացման հիմք:

Խմբավորումներն են առաջ մղել էվոլյուցիան 

Միայնության գործոնը վերլուծելիս՝ գիտնականները որպես ապացույց հիշեցնում են բնությունը, էվոլյուցիան, այն տեղի չէր ունենա,եթե օրգանիզմները միայնակ լինեին: Միայնակները չեն դիմացել գոյության պայքարին մարդկության և բնության էվոլյուցիայի ընթացքում:  Խմբերով ու համայնքներով ապրողները կարողացել են դիմակայել դժվարություններին ու զարգացել են:

 Միայնությունից փրկվելու 5 կանոն

Որպեսզի առողջությունը պահպանենք, երկար  ու ուրախ ապրենք, գիտնականներն ահա թե ինչ խորհուրդներ են տալիս.

1.  Գրեք այն հարաբերություների մասին, որոնցում այժմ գտնվում եք: Ու՞մ հետ եք շփվում,  ովքե՞ր են մտերիմներն ու հեռավորները, ինչպիսի՞ հարաբերություններ ունեք այդ մարդկանց հետ:
2. Մինչ ինչ որ տեղ ուղևորվելը կամ ինչ որ գործողություն ձեռնարկելը, «մի պահ նստեք ճանապարհից առաջ», մտորեք, թե ինչ է կատարվում ձեր ներսում, ինչպիսի հակասություններ կան ձեր գիտակցությաւն մեջ: Եթե մի քանի հակասող ձգտումներ ու ցանկություններ կան, և դուք ուշադրություն չեք դարձնում, ապա դրանք հետո ավելի լուրջ խնդիրներ կդառնան:
3. Օգտակար է հաճախ սեփական անձին հարց ուղղելը՝ ի՞նչ նպատակ եմ ես հետապնդում: Դա հնարավորություն է տալիս կենտրոնանալ կարևորի վրա: Գիտնականները պարզել են, որ այն ամենը, ինչ մարդ քաղում և ստանում է իրականությունից, հենց դա էլ  «ծրագրավորում է» նրա նպատակն ու նպատակակետին հասնելու կարողությունը:
4.  Լավ կլինի, եթե օրագիր պահեք, գրառեք ձեր  գործերը, ծրագրերը, ցանկություններն ու զգացմունքները: Նշեք, թե ինչպես են կապված  ձեր գործողություններն այն իրականության հետ, որում ապրում եք:
5. Երջանիկ լինելու համար պետք չէ փոխել ուրիշներին կամ ինքներդ ձեզ, ավելի լավ է  կենտրոնանալ համագործակցության և զգացմունքային կապվածության վրա:

Արի խոսենք

Ի դեպ, Առողջապահության համաշխարհային կազմակերպությունը դեպրեսիայի դեմ պայքարի հատուկ ծրագիր է սկսել, որի կարգախոսն է՝ «Արի խոսենք»: Պարզվել է, որ երբեմն պարզապես մերձավորի հետ զրույցը կարող է կանխել ինքնասպանությունը: Հաճախ բավական է միայն դիմել ձեր կողքին գտնվող մարդուն, հարցնել՝ ինչպե՞ս է իրեն զգում կամ ինչ-որ բան պատմել: Այդպիսով, մենք կարող ենք օգնել թե՛ նրան, թե՛ ինքներս մեզ: Զրուցակիցներ գտնելու, նրանց կյանքով հետաքրքրվելու դեպքում մենք բարելավում ենք թե՛ մեր, թե՛ նրանց առողջությունը ու ընդհանրապես օգնում ենք աշխարհն ազատել տագնապներից ու միայնությունից: