Մենք չենք լռելու. աղջիկների կողմից սպանված Միխայիլ Խաչատուրյանի հարազատներ

Օրեր առաջ SHANTNEWS.am-ի հայտնել էր, որ  հոր՝ Միխայիլ Խաչատուրյանի, սպանության մեջ մեղադրվող Խաչատուրյան քույրերը տանն են. նրանց նկատմամբ կիրառվում է «որոշակի գործողությունների արգելքի» տեսքով խափանման միջոցը: Այսօր փաստաբան Ալեքսեյ Պարշինը SHANTNEWS.am-ին որոշ մանրամասներ է հայտնել: Փաստաբանի հետ զրուցելուց զատ, մենք զրուցել ենք նաև Միխայիլ Խատատուրյանի եղբորորդու հետ.

«Շատ սուտ բաներ են ասում հանգուցյալի մասին, ում շատ դաժանորեն են սպանել:  Այստեղ, հասկանում եք, այն իրավիճակն է, երբ հասարակությանը մատուցվածը լավ ընտրված էր, թե ինչից կկառչի հասարակությունը: Հասարակության մեջ գցեցին այն միֆը, որ Միխայիլը նարկոբարոն էր, մեքենայի մեջ հերոին են գտել տոննաներով, թե կիլոգրամներով, արդեն չգիտեմ էլ, թե որքան են ասում: Հետո պարզվեց՝ խունկ է եղել:

Հետո սկսեցին ասել, որ նա հոգեկան հիվանդ է եղել: Միխայիլը բուժվել է նևրոզի դեմ, սովորական քաղաքացիական հիվանդանոցում, բայց ասվում է, որ հոգեբուժականում է եղել: Այսինքն՝ տեղեկատվությունը շրջվում է, խոսում են մկան մասին, դա դարձնում են փիղ: Մեղադրվող կողմի փաստաբաններն այդ ամենն անընդհատ են իրականացնում, նրանք գիտեն, որ ռեզոնանսը մեծանում է, մարդիկ, երբ հանգստանում են, սկսում են խնդրին սթափ մոտենալ, ուստի անում են դա՝ կեղտոտ կերպով են պաշտպանում»,- ասել է Արսեն Խաչատուրյանը:

Միխայիլ Խաչատուրյանի եղբորորդին անդրադարձել է այն պնդումներին, թե իր քույրերը սեռական բռնության են ենթարկվել հոր կողմից.

«Մենք  այդ մասին դարձյալ լսում ենք ուղղակի խոսքերով, ոչ մի ապացույց: Արդեն ավելի քան մեկ տարի է անցել: Մինչև հիմա սեռական բռնության ոչ մի փաստ գտնված չէ: Կան միայն մեղադրվողների խոսերը, մարդիկ հանցագործություն են կատարել, նրանք ցանկանում են դա ինչ-որ կերպ արդարացնել, դրա համար էլ այդպիսի բաներ են ասում: Ինչ վերաբերում է իմ ու նրանց շփումներին, ապա ասեմ, որ ես նրանց հետ խոսելու ցանկություն չունեմ, մեր հարազատներն էլ չունեն: Նրան նույնիսկ մեր ընտանիքից ներողություն չեն խնդրել իրենց արածի համար: Նրանք միայն իրենց հորը չեն սպանել, նրանք սպանել են 4 քույրերի եղբորը: Միխայիլը 4 քույր ունի, սպանել են որդու, իմ հորեղբորը: Նրանք դրանով ամբողջովին սևացրել են այն հարազատությունը, որը մեզ կապում էր:

Աղջիկներն ամենևին այն չեն, ինչպես ներկայանում են: Մենք ապացուցել ենք, և մարդիկ հասկացել են, որ աղջիկները երկար ժամանակ են ծրագրել սպանությունը: Նրանք օգնություն չեն պահանջել: Նշվում է 4 տարի շարունակ իրականացված սեռական բռնությունների մասին, բայց խոսում են միայն «օրալ քնքշանք»-ի մասին, քանի որ դա ապացուցել հնարավոր չէ: Երբ ինտիմ կապի մասին են ասում, կներեք, բայց պետք է ասեմ, որ Միխայիլը այդ առումով առողջական խնդիրներ է ունեցել: Աղջիկները պարզապես սևացնում են նրա անունը, դրա համար նույնպես պատասխանատվության են ենթարկվելու: Չնայած նրան, որ սպանել են, մինչև հիմա հանգիստ էլ չեն տալիս»,- հավելել է Միխայիլ Խաչատուրյանի եղբորորդին:

Ինչ վերաբերում է սպանության դրդապատճառին.

«Մեր ընտանիքի՝ տուժած կողմի համար սպանության մոտիվը, հավանաբար, Միխայիլի փողերն են եղել: Հնարավոր է, որ նրանք փող գողացած կամ վերցրած լինեն, հնարավոր է, որ ուղղակի ազատություն են ուզել: Դրան ավելի հակված ենք: Մեր ընտանիքը հայկական ընտանիք է, խիստ ավանդույթներ ունենք, ուստի աղջիկներին շատ բան թույլ չէր տրվում: Նրանք ցանկացել են ունենալ այն ազատությունը, որը ունեն նրանց ընկերուհիները՝ ակումբներ, զվարճանքներ և այլն: Այդպիսի խիստ հորից նրանք դա չէին կարող ստանալ: Այն պնդումների մասին էլ, թե չենք բողոքարկում, որովհետև մեղադրանքը հավաստի է, ասեմ, որ չենք պատրաստվում լռել: Ինչո՞ւ դա անել 2 գործի շրջանակներում: Մենք դա կանենք ոչ թե նոր գործով, այլ հին գործի շրջանակներում»,- ասել է Արսեն Խաչատուրյանը: