Իրական անկախության կարելի է հասնել միայն տնտեսական անկախության միջոցով. Մոնթե Մելքոնյանը կդառնար 60 տարեկան

Մոնթե Մելքոնյանն  այսօր  կդառնար 60 տարեկան:1957 թվականի նոյեմբերի 25-ին,ԱՄՆ-ի Կալիֆորնիա նահանգի Ֆրեզնո քաղաքից 40 մղոն հեռու Վայսելիա ավանում  ծնվեց ՀՀ ազգային հերոս, Արցախի հերոս  Մոնթե Մելքոնյանը:

Չարլզ և Զաբել Մելքոնյանները  Մեծ Եղեռնից փրկված և Միացյալ Նահանգներում հանգրվանած  հազարավոր ընտանիքներից մեկն էին: 
Իր հայկական  արմատների մասին Մոնթե  գիտակցել է դեռևս պատանեկության տարիներին, երբ ընտանիքի հետ 1969-1970 թվականներին ճամփորդել է Եվրոպայով և Միջին Արևելքով, այցելել իր պապերի ծննդավայր Արևմտյան Հայաստան: Վերադառնալով Ամերիկա, Մոնթեն ընդունվում է Սան-Ֆրանցիսկոյից ոչ հեռու գտնվող Բըրքլի համալսարանի հին ասիական ժողովուրդների պատմության և հնագիտության բաժինը, որն իր բացառիկ ընդունակությունների շնորհիվ՝ ուսման 4 տարվա ծրագիրը յուրացնելով երկուսուկես տարում, ավարտում է 1978թ-ին: Նույն տարում՝1978 թ.-ի աշնանը մեկնում է Իրան, մասնակցում Իրանի շահի դեմ կազմակերպված ցույցերին։ Այստեղ նա սովորում է արաբերեն: Հետո  մեկնում է Լիբանան, որտեղ քաղաքացիական պատերազմը հասել էր  գագաթնակետին։ Բեյրութում մասնակցում է հայ համայնքի ինքնապաշտպանության մարտերին։ 22 տարեկանում ազատ  տիրապետում էր անգլերենին, ֆրանսերենին,իսպաներենին, իտալերենին, թուրքերենին, պարսկերենին, ճապոներեին և քրդերենին: 

1980 թ.-ից անդամագրվել է Հայաստանի ազատագրական գաղտնի բանակին՝ԱՍԱԼԱ-ին որի շարքերից կազմակերպչական խոր տարաձայնությունների պատճառով մի խումբ ընկերների հետ հեռանում է 1983թ-ին: 83թ. օգոստոսին  մի խումբ համախոհների հետ ստեղծել է «ՀԱՀԳԲ-հեղափոխական շարժում» կազմակերպությունը: 

1981-ին կազմակերպում է հայտնի Վան ռազմական գործողությունը: Նույն թվականի նոյեմբերի 11-ին Ֆրանսիայի  Օռլի  օդանավակայանում Մոնթեն ձերբակալվում է կեղծ անձնագիր և ատրճանակ կրելու մեղադրանքով։  Սկզբում դատապարտվում 4 ամսվա ազատազրկման, իսկ ավելի ուշ դատարանը որոշեց վտարել նրան Ֆրանսիայից։ Դատարանում Մոնթեն հայտարարեց՝ «Բոլոր հայերը կեղծ անձնագրեր են կրում՝ ֆրանսիական, ամերիկյան, դրանք կեղծ կլինեն այնքան ժամանակ, քանի դեռ դրանք հայկական չեն…»։ 1985 թ.-ին նա նորից կեղծ անձնագրով ժամանեց Ֆրանսիա և մի քանի ամիս անց նորից ձերբակալվեց հայկական պահանջատիրական բնույթի անլեգալ գործունեության և դարձյալ կեղծ անձնագիր կրելու մեղադրանքով, և մինչև 1989թ. հունվարն անցկացրեց Ֆրեն և Պուասի բանտերում: 

Մոնթեն բանտից դուրս եկավ 1989 -ի հունվարի 16-ին։  1990թ. հոկտեմբերին նրան հաջողվում է գալ Հայաստան:1991թ. օգոստոսին 3-ին Մոնթեն ամուսնանում է Սեդայի հետ, այն կնոջ,որի մասին  հետո պիտի գրեր. «Աշխարհում երեք միլիարդ կին կա, բայց ինձ չեն հետաքրքրում մնացած 2.999.999.999-ը»:

Իսկ  անկախացած  Հայաստանում արդեն սկսվել էին հայ-ադրբեջանական զինված ընդհարումները։ Մոնթեն հիմնում է «Հայրենասերների ջոկատը»։ 7 ամիս աշխատում է Գիտությունների  ակադեմիայում, հրատարակում «Հայաստանը եւ հարևանները» գիրքը։ Նույն թվականի սեպտեմբերին մեկնում է Արցախի Հանրապետություն, որտեղ նրան անվանակոչում են Ավո մականունով։ Ռազմական տեսանկյունից մասնագիտական բարձր հմտություններ ցուցաբերելու շնորհիվ 1992 թ.-ին ստանձնում է Մարտունու պաշտպանական շրջանի շտաբի պետի պարտականությունը:  Կարճ ժամանակ էր պետք, որ իր անկեղծությամբ ու  հայրենասիրությամբ  շահեր ոչ միայն տեղի բնակչության, այլև ընդհանրապես, համայն հայության սերն ու հարգանքը։ Նրա ղեկավարությամբ Մարտունին դարձավ Արցախի ամենապաշտպանված ու ամենամարտունակ շրջանը։ 1992թ-ի վերջերին Մարտունու պաշտպանական շրջանի մարտական հաջող գործողությունների շնորհիվ` Արցախի պաշտպանական ուժերը հասնում են պետական սահման և 20կմ երկարությամբ պահակակետեր հիմնում շրջանի հյուսիսային սահմանագծերում: 1993թ. մարտին Մոնթեն իր զորաջոկատով մասնակցում է Մարտակերտի շրջանի ազատագրմանը, իսկ մարտի վերջերին ու ապրիլի սկզբին՝ ղեկավարում Քարվաճառի ազատագրման գործողությունը` Արցախի կողմից: 1993թ. մարտի 27-ից ապրիլի 2-ը Մոնթեի ղեկավարությամբ իրականացվում է Քարվաճառի շրջանում տեղաբաշխված թշնամու ռազմակայանների ոչնչացման գործողությունը: 

1993թ. հունիսի 12-ին Մոնթեն առաջին անգամ անձամբ չի մասնակցում մարտին, այլ Աշանից ներքև գտնվող Մոթ սարի «08» դիտակետից ղեկավարում է Աղդամի մատույցներում թշնամու կրակակետերի ոչնչացման գործողությունը: Մարտերից հետո զինակիցների հետ իջնելով դիտակետից` դիրքերի վիճակը ստուգելու նպատակով, Մարզիլու գյուղի ծայրին անսպասելիորեն հանդիպած հակառակորդի ԲՄՊ-1 զրահամեքենային ու կարճատև, առճակատ մարտում զոհվում է զրահամեքենայի արկի` աջ քունքը մխրճված բեկորից: 

Հունիսի 19-ին Մոնթեի աճյունն ամփոփվեց Երևանի «Եռաբլուր» պանթեոնում: Մոնթե Մելքոնյանին հետմահու շնորհվել է «ՀՀ Ազգային հերոս»-ի և «Արցախի հերոս»-ի բարձրագույն կոչումները: 

ԼՂՀ պաշտպանության բանակի Մարտունու շրջանի ինքնապաշտպանական ուժերի հրամանատար, ՀՀ ազգային հերոս, Արցախի հերոս, «Հայրենիքի համար» (ՀՀ), ԼՂՀ  «Ոսկե արծիվ» և «Մարտական խաչ» առաջին աստիճանի շքանշանների ասպետ, հրապարակախոս, հնագետ, փոխգնդապետ Մոնթե Մելքոնյանի ամենավսեմ պարգևը,  սակայն ,պատմական հայրենիքի մի բեկորի՝ Արցախի ազատագրումն է: