Գյումրիում եռօրյա ռոք փառատոն կանցկացվի. ռոքը կհնչի կամարների տակ

Սեպտեմբերի 22-24-ն առաջին անգամ Գյումրիում կանցկացվի «Դալան ֆեստ» ռոք փառատոնը: Ներկայացվելու է լենինականյան ռոք երաժշտության պատմությունը, որը սկիզբ է առել 1960-ականներին ու հնչել շենքերի դալանների՝ կամարների տակ:

Խորհրդային միությունում ռոք երաժշտությունը թեև արգելված էր, այնուամենայնիվ, քաղաքային մշակույթի անբաժանելի մասն էր: Այդ երաժշտությունը հնչեցնում էր հայտնի «Բամբիռ» խումբը: Փառատոնը կազմակերպել են մշակույթի նախարարությունը, Գյումրիի քաղաքապետարանը, «Մանուկյան» ընկերությունը: Կազմակերպիչներն այսօր մամուլի ասուլիսով են հանդես եկել:

«Բամբիռի» հիմնադիր Ջագի որդին՝ Նարեկ Բարսեղյանը, հորից լսածներն է պատմում: Տիգրան Մեծ, նախկին Ինտերնացիոնալի փողոցի այս կամարը երկար տարիներ Լենինականի մտավորականների հավաքատեղին է եղել: Խորհրդային տարիների խիստ գրաքննությունից հեռու, գիշերային ժամերին են այստեղ հավաքվել, արգելված ռոք երաժշտություն լսել ու իրենց ազատ գաղափարներով լցրել: Ռոք երգիչները ենթարկվում էին հետապնդումների, ռոք երաժշտությունն էլ թույլ չէին տալիս, որ պոպուլյար դառնար: Մարդիկ ավելի հաճախակի էին հավաքվում ու ունկնդրում քաղաքի ամենահայտնի ռոք խմբի՝ «Բամբիռի» երաժշտությունը:

Խմբի «Եկեք երգենք» երգը հենց կամարի տակ անցկացրած հավաքներից է ծնվել: Նարեկի համար այս կամարը լեգենդար է` հայկական ռոքնռոլի կամարն է: Վստահ ասում է` այստեղից էլ միլիցիան մարդկանց հավաքած կլինի արգելված երաժշտություն լսելու համար: Այս կամարի կենսագրությունն ընդհատվեց 1980-ականների վերջին, գուցե այն պատճառով, որ ռոքն այլևս արգելված չէր:

Մոտ 20 տարի դալանների տակ որևէ միջոցառում չի եղել: Քաղաքի կամարները նորից դարձնել ռոք համերգների լավագույն վայրեր… Այս նախաձեռնությունը իրականանում է: Կազմակերպիչները որոշել են Գյումրիում Անկախության 28-րդ տարեդարձը նշելու լավ առիթը բաց չթողնել ու փառատոնն անցկացնել սեպտեմբերի 22-ին, 23-ին և 24-ին:

Գյումրիի քաղաքապետարանի մշակույթի բաժնի պետ Լիլիթ Թովմասյանի խոսքերով` Գյումրիում մշակութային կյանքը պետք է դուրս բերել համերգային, դահլիճային տարածքներից, պետք է հնարավորինս հասանելի դարձնել հասարակության լայն շրջանակներին և խմբերին, և դրանք պետք է կազմակերպել ոչ ֆորմալ կերպով:

Ծրագրի պրոդյուսեր Մկրտիչ Մանուկյանն էլ նշում է, որ 3 համերգ է լինելու, նաև կան այլ դալաններ, մյուս տարի էլ դրանցում համերգներ կանցկացնեն: Դալաններն անխնամ վիճակում են: Գյումրիի քաղաքապետարանը հանձն է առել դրանք բարեկարգել ու լուսավորություն ապահովել:

«Բամբիռը» փառատոնի ժամանակ դալանները զիջելու է երիտասարդ ռոք խմբերին: Քաղաքի 3 դալանների տակ 3 ռոք խումբ է համերգային ծրագրով հանդես գալու` Երևանից «Խնձորի սոկ» և «Տիեզերք բենդ» համույթները, Գյումրիից՝ «Ռոզեն թալը»:

Այս նախագծով հնարավորություն կստեղծվի քաղաքի մոռացված դալանները ուշադրության կենտրոնում պահել: Փառատոնից հետո կամարների տակ ցուցանակներ են փակցվելու, որտեղ եռալեզու տարբերակով կգրվեն քաղաքի ռոքի, ջազի, նաև աշուղական արվեստի պատմությունները:

Նախատեսվում է քաղաքում աշուղական փառատոն ևս կազմակերպել, որտեղ կվերականգնվեն նաև մեջլիսները: Աշուղական փառատոնի համար դեռ շատ անելիքներ կան:

Հնարավոր է` գարնանը այն մեկնարկի, իսկ «Դալան ֆեստը» կդառնա ամենամյա: Փառատոնին մասնակցելու հնարավորություն այս անգամ չեն ունեցել շատ ռոք խմբեր, նրանք դալանների տակ հանդես կգան հաջորդ տարի: