2020-ից զբաղվածության պետական ծրագրերում նախատեսվում են փոփոխություններ

Աշխատանքի և սոցիալական հարցերի նախարարությունը շարունակում է իրականացնել ժամանակավոր զբաղվածության ապահովման պետական ծրագրեր, որոնցում ընդգրկվում են գործակալություններում գրանցված աշխատանք փնտրող քաղաքացիները:Բայց ծրագրերում եղած մի շարք  դրույթներ սահմանափակում են շատ գործազուրկների նման ծրագրերից օգտվելու հնարավորությունները: Աշխատանքի և սոցիալական հարցերի նախարարությունը նախատեսել է ծրագրերի չափորոշիչներում մի շարք փոփոխություններ, որոնք նախարարության պատասխանատուները ներկայացրել են Շիրակի մարզի զբաղվածության տարածքային կենտրոնների ղեկավարներին:

Գյումրու զբաղվածության տարածքային կենտրոնի ներկայացրած թվերով՝ մարզում կա մոտ 400 թափուր աշխատատեղ, բայց աշխատանք փնտրողների թիվը միայն Գյումրիում հասնում է 14 հազարի: Աշխատանքի առաջարկները մեծ գործազուրկների սրտով չեն, գործատուի պահանջներն են խիստ կամ աշխատավարձի չափն է փոքր։ Շատ հաճախ էլ աշխատանք փնտրողները չեն ուզում անձամբ դիմել գործատուներին, աշխատանքի տեղավորման համար փնտրում են միջնորդների: Սա ոլորտի պատասխատանուները համարում են սխալ ու կարծրացած մոտեցում , որից մարդիկ դեռ չեն կարող հրաժարվել:

«Գյումրիում ունենք շուրջ 13 767 աշխատանք փնտրող քաղաքացիներ, ինչպես ամբողջ հանրապետությունում, այնպես էլ մեզ մոտ, շուրջ 70 տոկոսը կանայք են։ Մեր նպատակաուղղված պետական ծրագրերն իրականացնում ենք հենց գործազուրկ կանանց համար»,- ասում է Գյումրու  զբաղվածության տարածքային կենտրոնի տնօրեն Ամալյա Ադամյանը։

Գործազուրկ կանանց համար եղած ծրագրերը Գյումրու տարածքային կենտրոնի տնօրենը փաստում է, որ օգնել է շատերին մասնագիտական կարողություններ ձեռք բերել և աշխատանք գտնել: Մինչ այս, մասնագիտական ուսուցման ծրագրեի շահառուներ կարող էին դառնալ միայն երիտասարդ մայրիկները, բայց դիմելիությունը հաշվի առնելով՝ նախարարությունը հաջորդ տարվանից նախատեսում է ծրագրին մասնակցելու տարիքային սահմանափակումը հանել:

«Սա այն ծրագիրն է, որ մենք տարեկան կտրվածքով 100 և ավելի տոկոս ցուցանիշ ունեցանք։ Հաշվի առնելով, որ ծրագիրը բավականին մեծ արձագանք ստացանք շահառուների շրջանում, նախատեսել ենք և՛ տարիքային շեմը հանել, և՛ առաջին անգամ աշխատաշուկա մուտք գործելու պայմանը։ Այսինքն՝ հնարավորություն կտանք ոչ միայն երիտասարդ կանանց, այլև բոլոր նրանց, որոնք կարիք ունեն ուսուցման և աշխատաշուկա մուտք գործելու»,- պարզաբանել է Աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը։

Հաջորդ փոփոխությամբ նախատեսում են գործատուների մոտ պրակտիկա անցնելու համար վճարել ոչ միայն մասնակիցներին, նաև ուսուցանող վարպետներին: Ծրագրի արդյունավետությունը գնահատում են աշխատանքի տեղավորվածների թվով։

Հաշմանդամություն ունեցող գործազուրկներին աշխատանք առաջարկելու կամ տեղավորելու դեպքում անհրաժեշտ է նաև լուծել հարմարեցված պայմանների խնդիրը: Այսպիսի ծրագիր կենտրոնները երկար ժամանակ է՝ իրականացնում են, բայց այստեղ էլ նախատեսվում են փոփոխություններ: Պետությունը հոգում է նաև հաշմանդամներին ուղեկցող անձանց վճարման, ինչպես նաև տրանսպորտային ծախսերը:

Փոփոխությունների նախագծերը միայն քաղաքային բնակավայրերի աշխատունակ, բայց գործազուրկ անձանց չէ, որ վերաբերում են: Պետական ծրագրեր կան ներդրված նաև գյուղական համայնքներում: Բազմազավակ ու սոցիալապես անապահով ընտանիքների համար անասնապահությամբ զբաղվելու ծրագրի շրջանակը կընդլայնվի, և այսուհետ, խոշոր եղջերավորներից բացի, շահառուներին կտրամադրվեն նաև ընտանի թռչուններ ու մանր եղջերավորներ:

Ժամանակավոր զբաղվածության պետական ծրագրերում փոփոխությունների գործածությանը զուգահեռ, վերանայումներ կլինեն նաև աշխատանքային օրենսգրքի դրույթներում: Այն արդեն ավելի գլոբալ խնդիրներ է լուծելու աշխատողների իրավունքների պաշտպանության ոլորտում, ինչպես նաև չգրանցված աշխատողների հայտնաբերման, ստվերի դեմ պայքարի գործընթացներում: