Համաշխարհային մաքսային կազմակերպության գլխավոր քարտուղարն այցելել է Գյումրիի նորաբաց ավտոմաքսատուն

Այսօր Գյումրիի նորակառույց մաքսատուն է այցելել Համաշխարհային մաքսային կազմակերպության գլխավոր քարտուղար Կունիո Միկուրիան: Հայաստանում նա մասնակցում է «Թվային լուծումներ միջսահմանային համագործակցության և առևտրի դյուրացման համար» երկօրյա համաժողովին։

Նա ծանոթացել է մաքսատան աշխատանքային ծավալներին ու սպասարկման հնարավորություններին և ասել, որ Գյումրիի մաքսատունը հեռանկարում կատարելագործելու պոտենցիալ կա և այն մեծ ազդեցություն կարող է ունենալ Հայաստանի մաքսային ծառայությունների զարգացման գործում:

Գյումրիի նոր մաքսատանն առաջին մաքսային ձևակերպումները երեկվանից են մեկնարկել: 1 օրում 150 մեքենա արդեն մաքսազերծվել է։ Գործընթացի արագ իրականացումը կարևորեց համաշխարհային մաքսային կազմակերպության գլխավոր քարտուղարը։ Կունիո Միկուրիան նշեց.

«Հաշվի առնելով այն, որ մաքսազերծման գործողություններն իրականացնում են ընդամենը 1 օրում, սա հեշտացնում է թե´ ներկրողների, թե´ մաքսային աշխատակիցների աշխատանքը։ Ուրախ եմ նաև, որ այս ծրագիրը Հայաստանում ծառայությունների ապակենտրոնացման գործառույթների մաս է կազմում, ու այդ ուղղությամբ սա առաջընթաց է։ Հայաստանը, չունենալով ելք դեպի ծով ու լինելով տարանցիկ ճանապարհ Վրաստանի և Իրանի միջև, մշտապես կարիք ունի արդյունավետ մաքսային ծառայությունների և միջսահմանային համագործակցության»։

Համաշխարհային մաքսային կազմակերպության գլխավոր քարտուղարը կարևորում է այդ ուղղությամբ ծրագրերի կատարելագործումը, դա վերաբերում է նաև 1 պատուհանի սկզբունքի ներդրմանը:

Ըստ նրա` մեկ պատուհանի սկզբունքի ուղղությամբ պետք է աշխատել, դա կզարգացնի գործառույթները։ Պետք է Հայաստանը համագործակցի սահմանակից երկրների հետ։ Կոնկրետ Վրաստանի հետ կապը և տեղեկատվության փոխանակման գործընթացը զարգացնելու հնարավորությունը կբերի շատ հարցերի լուծման։ Միջազգային տարբեր ծրագրերն էլ կօգնեն այդ համագործակցությունն ակտիվացնելուն։

ՊԵԿ նախագահի տեղակալ Շուշանիկ Ներսիսյանն էլ հայտնեց, որ համաժողովի ժամանակ տեղեկատվության փոխանակման հուշագիր է Հայաստանը ստորագրել Իրանի և Վրաստանի հետ, ինչը նշանակում է, որ գործընկերները միմյանց տեղեկատվություն կտրամադրեն սպասվելիք բեռների վերաբերյալ, որը շատ ավելի կհեշտացնի մաքսային վարչարարությունն ու կխնայի տնտեսվարողների ժամանակը մաքսային ամբողջ գործընթացների համար:

1 պատուհանի սկզբունքի ներդրումը, ըստ ոլորտի պատասխանատուների, նախատեսում է ոչ միայն ավտոմեքենաների, նաև Հայաստան ներմուծվող բոլոր բեռնատեսակների մաքսային ձևակերպումներ։

Հեռանկարում Գյումրիի արտաքին տնտեսական գործունեության սպասարկման կենտրոնում են տեղակայվելու նաև սննդի անվտանգության պետական ծառայության, նաև պաշտպանության նախարարության ներկայացուցչությունները՝ Հայաստան ներմուծվող սննդի, նաև ռազմական բեռների ստուգումներ ու մաքսային ձևակերպումներ իրականացնելու համար։

«Տեղեկատվական տեխնոլոգիաները շատ արագ են զարգանում, ու մաքսային ծառայությունների զարգացման գործում մեծ նշանակություն ունեն դրանք»,- համոզված է համաշխարհային մաքսային կազմակերպության գլխավոր քարտուղարը:

Հենց տեղեկատվական տեխնոլոգիաների միջոցով էլ իրենք ակնկալում են մի շարք խնդիրների լուծում։ Համոզված է, որ եթե ամեն ինչ ճիշտ հունով ընթանա, Հայաստանում խնդիրների լուծմանը շուտ կհասնեն։

Միջազգային առևտրին ինտեգրվելու ճանապարհին մաքսային ոլորտում տեղեկատվական տեխնոլոգիաների կիրառումը կարևոր քայլ է համարվում: Միջազգային կազմակերպության պատասխանատուներն այս ուղղությամբ իրականացվող աշխատանքների արդյունքում ակնկալում են տնտեսության առաջընթաց մեծ տեմպերով, ինչն էլ բիզնես ներդրումների նոր հոսք կապահովի։