Վարորդների համար՝ 0.5-4 բալ արժեցող խախտումների մասին

ՃՈ պետի տեղակալ Արման Չիլինգարյանն այսօր ներկայացրել է հունվարի 1-ից ուժի մեջ մտնող տուգանային միավորների համակարգը, որն այլ կերպ անվանում են բալային համակարգ: Այսպիսով՝ վարորդն ամբողջ տարվա համար ունենալու է 9 բալ, ու տարբեր խախտումների ժամանակ տարբեր բալեր է կորցնելու: Մեկ տարվա ընթացքում 9 բալը սպառելու պարագայում վարորդի՝ տրանսպորտային միջոց վարելու իրավունքը կասեցվում է 6 ամսով: 3 ամիս անց նա կարող է հանձնել տեսական քննություն և վերականգնել վարելու իրավունքը, եթե չի հանձնում քննություն, ապա 6 ամիս անց առանց քննության է վերականգնվում այդ իրավունքը:

Մեկ տարվա ընթացքում երկրորդ անգամ 9 միավորը սպառելու պարագայում վարորդը զրկվում է տրանսպորտային միջոցներ վարելու իրավունքից՝ մեկ տարի ժամկետով: Այս դեպքում նա միայն մեկ տարի հետո ու ամբողջական քննություն հանձնելու պարագայում կարող է վերականգնել վարելու իրավունքը: Խախտումներն առայժմ արձանագրվելու են միայն տեսանկարահանող սարքերի միջոցով: 2020 թվականի սեպտեմբերից բալային համակարգով վարորդների հետ կաշխատեն նաև ոստիկանական խմբերը:

Որոնք են այն խախտումները, որոնց համար վարորդները 4-ից 0.5 բալ կկորցնեն։

«4 տուգանային միավոր է նախատեսվում 51-ից 80 կմ/ժ արագությունը գերազանցելու համար: Տուգանքը նախկին 200 հազար դրամի փոխարեն նվազեցվել է 29 հազար դրամ: Տարբերությունը կոմպենսացվում է տուգանային միավորի կիրառմամբ: Հաջորդը՝ տրանսպորտային միջոցները վարելն է, եթե վարորդը միայն ալկոհոլի ազդեցության տակ է, հանցանքը չի պարունակում ավելի ծանր պատասխանատվություն նախատեսող հոդվածի հատկանիշներ: Ի դեպ, չափն է նվազել՝ 0.2-ի փոխարեն դարձել է 0.1: Ենթադրենք ինչ-որ մարդ նախկին կարգավորման պարագայում կարողանում էր ըմպել X չափով ալկոհոլային խմիչք և չհայտնվել այն վարչական պատասխանատվության տիրույթում, այս կարգավորման ուժի մեջ մտնելու պարագայում այդ չափը կլինի կես X: Այսինքն՝ չափը նվազեցվել է 2 անգամ: 150 հազար դրամ տուգանքը փոխվում է կրկին 29 հազար դրամով և նախատեսվում է 4 տուգանային միավոր: Բայց, այս փոփոխությունը ուժի մեջ է մտնելու 2020 թվականի սեպտեմբերի մեկից, որովհետև դա հայտնաբերվում է ճանապարհային ոստիկանի կողմից: Մինչև սեպտեմբեր գործելու է 150 հազար դրամ սանկցիան»,- ասել է Չիլինգարյանը:

Ինչ վերաբերում է 3 բալ արժեցող խախտումներին։

«Տրանսպորտայի միջոցը տնօրինողի կողմից հաշվառման համարանիշն այլ անձի հանձնելը՝ 100 հազար դրամի փոխարեն նախատեսվում է 25 հազար դրամ տուգանք և 3 տուգանային միավոր: Այս փոփոխությունը ևս ուժի մեջ է մտնելու սեպտեմբերի մեկից: Հունվարի մեկից գործելու են տրանսպորտային միջոցը միակողմանի երթևեկության ճանապարհով, հոսքին հակառակ ուղղությամբ վարելը: Էստեղ գործողով տուգանք է եղել՝ 20 հազար դրամ, ավելացվել է ևս 3 տուգանային միավոր: Հաջորդ իրավախախտումը՝ հանդիպակաց երթևեկության գոտի դուրս գալն է: Տուգանքը 30 հազար դրամ էր, նախատեսվում է 25 հազար դրամ և 3 տուգանային միավոր: Հաջորդը՝ սահմանված արագությունը 31-ից 50 կմ/ժ գերազանցելը: Գործող 100 հազար դրամը փոխարինվում է 25 հազար դրամով և երեք տուգանային միավորով»,- ասել է Չիլինգարյանը:

Հիմա այն խախտումների մասին, որոնց դեպքում վարորդի ունեցած 9 բալիս կհանվի 2 բալ։

«Տրանսպորտային միջոցի հաշվառման համարանիշի առնվազն մեկ նիշը փակելը, սա առանձնացվում է անընթեռնելիից, և նոր իրավախախտում է դիտարկվում: Գործող 10 հազար դրամի փոխարեն նախատեսվում է տուգանք 25 հազար դրամ և 2 տուգանային միավոր: Հաջորդ իրավախախտումը՝ ճանապարհի բաժանարար գոտին չնախատեսված վայրում հատելը՝ ձախ շրջադարձ կամ հետադարձ կատարելու եղանակով: Նախատեսվում է 20 հազար դրամ տուգանք և 2 տուգանային միավոր: Հաջորդը՝ տրանսպորտային միջոցների վարորդների կողմից լուսացույցի կամ կարգավորողի արգելող ազդանշանին չենթարկվելու իրավախախտումն է, գործող 20 հազար դրամ տուգանքը փոխարինվում է 25 հազար դրամ տուգանքով և 2 տուգանային միավորով: Հաջորդը՝ երթևեկության սահմանված արագությունը 11-ից 30 կմ/ժ գերազանցելն է: Գործողով էստեղ նախատեսված չէ յուրաքանչյուր կմ/ժ-ի համար 1500 դրամի չափով ավելացում, նախատեսվում է միանվագ տուգանք 20 հազար դրամի չափով և 2 միավոր: Հաջորդը՝ որևէ կանոնի խախտումը, որի հետևանքով առաջանում է վթարային իրադրություն»,- ասել է Չիլինգարյանը՝ հավելելով, որ խոսքն այն դեպքերի մասին է, երբ առկա է եղել վթարի վտանգ, բայց այդ վտանգը հրաշքով իրականություն չի դարձել: Այդ դեպքում գործող 20 հազար դրամին կգումարվի 2 տուգանային միավոր:

Եվ, վերջապես, մեկ միավոր արժեցող տուգանքների մասին։

«Դրանք թվով շատ են՝ հակադիր հոսքերն իրարից բաժանող գծանմուշների պահանջները չկատարելը՝ հոծ գիծը կեսով հատելը, կամ հետադարձ կատարելը: Խաչմերուկի անցման կանոնները խախտելու համար մեկ տուգանային միավոր, երբ ճանապարհը չեն զիջում առավելություն ունեցողին, հետիոտնային անցումների հատման կանոնները խախտելու համար ևս նախատեսված է մեկ միավոր, վազանցի կանոնները խախտելու համար, երթևեկությունը սկսելու, մանևր կատարելու, ինչպես նաև հետընթացի համար՝ մեկ տուգանային միավոր: Վարորդների կողմից տրանսպորտային միջոցը հետիոտնային անցման վրա կանգնեցնելու համար: Ընթացքի ժաման ծխելու համար»,- հավելել է Չիլինգարյանը ու նաև նշել, որ չնայած տուգանքների չափերի տարբերությանը՝ մեկ միավոր ծխելու համար կկորցնեն թե՛ հասարակական տրանսպորտի, թե՛ թեթև մարդատարների վարորդները: Ամրագոտին չօգտագործելը նաև ևս արժենալու է մեկ տուգանային միավոր, ինչպես նաև հեռախոսով խոսելը:

Ինչ վերաբերում է այն խմբին, որի համար նախատեսված է կես տուգանային  միավոր։

«Անընթեռնելի կամ ստանդարտին չհամապատասխանող համարանիշով տրանսպորտային միջոցը վարելը, կանգառի ու կայանման կանոնների խախտումը: Այդ թվում՝ տարհանված ավտոմեքենաների դեպքում»,- հավելել է ՃՈ պետի տեղակալը: