Գյումրիի նախկին քաղաքապետ Վարդան Ղուկասյանը կհրավիրվի հարցաքննության. Շիրակի մարզի դատախազ

Շիրակի մարզում հանցագործությունների թիվն ավելացել է, ավելացել են նաև հարուցված քրեական գործերը: Մեծ մասը կոռուպցիոն բնույթի է` պաշտոնեական դիրքի չարաշահում, կաշառք տալ և ստանալ, ապօրինի վարձատրություն։ Միայն 2019 թվականին 189 կոռուպցիոն բնույթի նյութերից 138-ի հիման վրա հարուցված քրեական գործերով պետական բյուջե վերականգնվել է մոտ 200 միլիոն դրամ: Այս մասին այսօր հրավիրված ասուլիսին հայտնել է Շիրակի մարզի դատախազ Կարեն Գաբրիելյանը։

Կոռուպցիոն հանցագործությունների բացահայտումը, ըստ մարզի դատախազի, դժվար է, երբ այդ սխեմայում ներգրավված անձինք հիմնականում գործում են աշխատավայրից դուրս, իսկ գումարի փոխանցումը կատարվում է ամենատարբեր միջոցներով։ Գործերը բացահայտվում են ցուցմունքների, գաղտնալսումների ու օպերատիվ միջոցառումների արդյունքում։

Բացահայտված դեպքերի մի մասն էլ կրթության ոլորտում է:

Մյուս հանցատեսակը, որով դեպքերի աճ է արձանագրվել, բնակարանային գողություններն են։ Դրանք կատարվում են երեկոյան ժամերին ու այն հասցեներից, որոնց տերերը երկար են բացակայում տնից։ Ոչ միայն բնակարանային, նաև տրանսպորտային միջոցներից գողությունների, հափշտակությունների դեպքերում գործող անձանց ձեռագիրը նույնն է` հավանաբար վերաբերում է նույն մարդկանց կամ փոքր խմբերի։

Նախորդ տարի թմրամիջոցների իրացման կամ շրջանառության հանցագործությունների դեպքերով հարուցված 31 քրեական գործերից մեկի հետ առնչություն է ունեցել ոստիկանության աշխատակիցը, որը կին է, և հանցագործությունը կատարվել է նրա անմիջական մասնակցությամբ:

Իսկ հանրային հնչեղություն ունեցող քրեական գործերի ընթացքի` ըստ դատախազի, «թվացյալ երկարաձգումները» կապված են բազմակողմանի քննություն անցկացնելու անհրաժեշտության հետ:

Օրինակ` նոր տուժողներ են ներգրավվել Կոմիտասի անվան պետական կոնսերվատորիայի Գյումրիի մասնաճյուղի տնօրեն Կարինե Ավդալյանի դեմ հարուցված քրեական գործի շրջանակներում: ՇՊՀ ռեկտորի պաշտոնակատարի դեմ հարուցված քրեական գործը, որը դարձյալ պաշտոնեական դիրքի չարաշահման հատկանիշներով է, թե ինչ ընթացք կունենա, պարզ կդառնա մի քանի օրից։

Նաև նախկին պաշտոնյաների կատարած ապօրինությունների փաստերով են քրեական գործեր հարուցվել: Դրանք վերաբերում են շենք-շինությունների ապօրինի կամ հակաօրինական օտարումներին ու վաճառքի դեպքերին, որոնք տեղի են ունեցել մինչև 2012 թվականը, իսկ փաստաթղթային հիմնավորումները բացակայում են։

Շիրակի մարզի դատախազ Կարեն Գաբրիելյանը տեղեկացրեց նաև, որ Գյումրիի նախկին քաղաքապետ Վարդան Ղուկասյանը կհրավիրվի հարցաքննության։ Հարուցված քրեական գործի շրջանակում պարզվել է, որ Գյումրիի նախկին քաղաքապետի պաշտոնավարման ընթացքում Գյումրիում որոշ շենք-շինություններ ու տարածքներ օտարվել են շուկայական արժեքից անհամեմատ ցածր գնով, և կատարված գործարքներում տեղի է ունեցել պաշտոնեական դիրքի չարաշահում:

«Պարզել ենք, որ այնտեղ կան շինություններ, որոնք ժամանակին նշված քաղաքապետի կողմից օտարվել են տարբեր անձանց, նաև պարզել ենք, որ շինությունները գտնվել են «Կումայրի» արգելոցում և դրա հատկացման իրավականությունն ու հիմնավորվածությունը պարզելու համար նշանակվել են դատաշինարարատեխնիկական  համալիր փորձաքննություններ: Խոսքը նաև «Օազիս» սրճարանի մասին է, նշված այգում գործող այլ կառույցների մասին»,- նշել է Շիրակի մարզի դատախազը։

Կարեն Գաբրիելյանը խոսեց նաև իր ներկայացրած միջնորդությունների մասին։ Մասնավորապես, Անի համայնքի ղեկավարի լիազորությունները դադարեցնելու մասին մարզպետին ու տարածքային և ենթակառուցվածքների նախարարին ուղղված իր միջնորդությունը առաջին ատյանի դատարանը մերժել է, իսկ երեխաների ապօրինի որդեգրման փաստով բացահայտումներ և հարուցված քրեական գործեր մարզի դատախազությունում չկան: