Ինչպես Սենատն արդարացրեց ԱՄՆ 45-րդ նախագահին

ԱՄՆ 45-րդ նախագահ Դոնալդ Թրամփի իմփիչմենթի գործը փակված է: Հանրապետականների կողմից վերահսկվող Սենատը նախագահական ընտրություններից 9 ամիս առաջ արդարացրել է Դոնալդ Թրամփին:

Իշխանության չարաշահման հոդվածով Թրամփի արդարացմանը կողմ է արտահայտվել 52 սենատոր, դեմ՝ 48, իսկ Կոնգրեսի աշխատանքին խոչընդոտելու հոդվածով Թրամփն արդարացվել է ձայների 53-47 հաշվով:

Ի դեպ, իշխանության չարաշահման հոդվածով Թրամփի դեմ է քվեարկել նրա կուսակից հանրապետականներից մեկը՝ Միթ Ռոմնին, որը 2012-ին կուսակցության կողմից առաջադրվել էր որպես նախագահի թեկնածու:

«Որպես սենատոր, ես երդում եմ տվել Աստծո առաջ, որ անաչառ կլինեմ: Երկրի նախագահին, իմ սեփական կուսակցության առաջնորդին դատելու հենց սկզբից էլ գիտեի, որ սա լինելու է իմ կյանքի ամենադժվար որոշումը… Արդյո՞ք նախագահը այնպիսի ծայրահեղ արարք է գործել, որ դա կարելի է դասել հանցանքների շարքին: Այո՛, արել է: Նախագահի նպատակը եղել է անձնական և քաղաքական: Հետևաբար, նախագահը մեղավոր է հանրության վստահությունը չարաշահելու մեջ»,- ասել է Ռոմնին:

Թրամփի արձագանքը երկար սպասել չի տվել: Նա, սովորության համաձայն, գրառում է կատարել իր Twitter-ի էջում:

«Եթե նախագահի ձախողված թեկնածու Միթ Ռոմնին Բարաք Օբամային պարտության մատնելուն նվիրեր նույն էներգիան և զայրույթը, որը սրբորեն նվիրում է ինձ, նա կարող էր հաղթել ընտրություններում»,- գրել է ԱՄՆ նախագահը:

Had failed presidential candidate @MittRomney devoted the same energy and anger to defeating a faltering Barack Obama as he sanctimoniously does to me, he could have won the election. Read the Transcripts!

— Donald J. Trump (@realDonaldTrump) February 6, 2020

Այս փոքրիկ միջադեպը, սակայն, որևէ կերպ չի ազդել քվեարկության արդյունքների վրա: Թրամփը կշարունակի իր պաշտոնավարումը և կդառնա ԱՄՆ պատմության մեջ առաջին նախագահը, որ իմփիչմենթի դատավարությունից հետո կրկին կառաջադրվի որպես նախագահի թեկնածու:

Անդրադառնալով Թրամփի արդարացմանը՝ Ներկայացուցիչների պալատի խոսնակ, դեմոկրատ Նենսի Փելոսին ասել է, որ Թրամփը «շարունակում է սպառնալիք մնալ ամերիկյան ժողովրդավարության համար, իսկ Սենատի հանրապետականներն անօրինականությունը նորմալ երևույթ են դարձրել»:

Քվեարկությունից առաջ Փելոսիի և Թրամփի միջև փոքրիկ միջադեպ էր տեղի ունեցել: «Երկրի դրության մասին» ԱՄՆ նախագահի ամենամյա ուղերձի ժամանակ Թրամփը հրաժարվել էր սեղմել Փելոսիի ձեռքը, վերջինս էլ հրապարակավ պատռել էր Թրամփի ելույթի տեքստը:

Թրամփի դեմ իմփիչմենթի գործընթաց էր սկսվել Ուկրաինայի նախագահ Վլադիմիր Զելենսկու հետ հեռախոսազրույցից հետո: Աղմկահարույց զրույցի ընթացքում ԱՄՆ նախագահը խնդրել էր ուսումնասիրել ընտրություններում իր գլխավոր մրցակից Ջո Բայդենի որդու գործունեությունն Ուկրաինայում:

Ներկայացուցիչների պալատը Թրամփին իմփիչմենթ էր հայտարարել 2019-ի դեկտեմբերի 18-ին: Սակայն այս հարցում վերջնական որոշումը կայացնում է Սենատը:

73-ամյա Թրամփը ԱՄՆ-ի միակ նախագահը չէ, որին Սենատն արդարացրել է: Ներկայացուցիչների պալատի կողմից ԱՄՆ պատմության մեջ իմփիչմենթի է ենթարկվել ևս 2 նախագահ՝ Էնդրյու Ջոնսոնը 1868 թվականին,  և Բիլ Քլինթոնը՝ 1998 թվականին։ Իսկ Ռիչարդ Նիքսոնը հրաժարական էր տվել 1974-ին՝ նախքան Ներկայացուցիչների պալատը նրան իմփիչմենթ կհայտարարեր: