Ցմահ ազատազրկում եմ պահանջում. նախկին ամուսնու կողմից կացնահարված Թագուհի Մանսուրյան

Երևանի ընդհանուր իրավասության դատարանի Շենգավիթի նստավայրում, այսօր՝ փետրվարի 13-ին, դատավոր Դավիթ Բալայանի նախագահությամբ, կայացավ նախկին ամուսնու կողմից կացնահարված Թագուհի Մանսուրյանի գործով հերթական դատական նիստը:

Նախորդ նիստին ճառով հանդես էր եկել մեղադրողը՝ 18 տարի ազատազրկում պահանջելով ամբաստանյալ Վլադիկ Մարտիրոսյանի համար:

Դատական այս նիստին դատական ճառով հանդես եկան տուժողի պաշտպան Ինեսսա Պետրոսյանը, տուժողներ Թագուհի և Վաչագան Մանսուրյանները:

«Վլադիկ Մարտիրոսյանը փորձում է ներկայանալ զոհի կարգավիճակով, թե իբր իրեն թույլ չեն տվել տեսակցել մանկահասակ երեխային, ինքը դարձել է տառապյալ և գնացել, դա է եղել նման քայլի պատճառը: Նա ընտրել է նման մարտավարություն, որ դատարանը ցուցաբերի մեղմ մոտեցում: Նա տեսակցություններից զրկված անձ է ուզում ներկայանալ, այդ կերպ արդարացնելով իր հրեշավոր արարքը: Եթե նա այդ օրը կարողանար իրագործել իր նպատակը և սպաներ ընտանիքի անդամներին, երեխան մնալու էր առանց ընտանիք և առանց մոր հոգածության: Վլադիկ Մարտիրոսյանը ի սկզբանե ցանկացել է վարույթ իրականացնող մարմնին թյուրիմացության մեջ գցել, իբր նա այդ քայլին գնացել է իր կյանքը փրկելու համար և նա մտածում էր, որ իր կողմից հասցված հարվածները եղել են մահացու, հետևաբար կարող են իր վարկածին հավատալ, բայց փլուզվել է նրա ծրագիրը»,- իր պաշտպանական ճառում ասաց Ինեսսա Պետրոսյանը՝ դատարանից խնդրելով հնարավոր խիստ պատիժ սահմանել ամբաստանյալի համար:

Պաշտպանը նաև նշեց, որ Վլադիկ Մարտիրոսյանը, ով նախկինում ազատազրկված է եղել կնոջ նկատմամբ բռնության համար և վաղաժամկետ ազատվելուց հետո էլ հետևություն չի արել, նա նաև իր երեխայի համար ալիմենտ չի վճարել, և նախկին կինը՝ Թագուհի Ստեփանյանը, դիմել է դատարան: Պաշտպանը նկատեց, որ եթե տղամարդը երեխայի մասին է մտածել, ապա ալիմենտը գոնե պետք է վճարեր: Նա երբևէ չի կատարել իր հայրական պարտականությունները և երեխայի խնամքով զբաղվող տատիկին զրկել է կյանքից՝ հետևաբար պետք է ենթարկվի ամենախիստ պատժի:

Ճառի իրավունք տրվեց նաև տուժող Վաչագան Մանսուրյանին, ով նշեց, որ Վլադիկ Մարտիրոսյանը սպանել է նաև իր չծնված երեխային, որի մասին չկա գործում: Նա մշտապես սարսափի մեջ է պահել իրենց ընտանիքն ու բռնության ենթարկել թե՛ աղջկան, թե՛ իրենց:

«Աղջկաս էն վիճակին հասցրեց, որ երկրորդ երեխային կորցրեց: Նրանք մի օր չեն հետաքրքրվել իրենց երեխայի վիճակով: Իսկ էս երեխան, որի խնամքով հիմա ես եմ զբաղվում, դեպքի ժամանակ 1 տարեկան 8 ամսական է եղել, ու էդ ամեն ինչը տեսել ա: Երբ նա իմ դռան առաջ կացնահարում էր ինձ ու աղջկաս, երեխան դռան առաջ կանգնած տեսել ա ու մամա էր գոռում: Մինչև հիմա երեխան էդ վիճակից դուրս չի եկել: Երեխան մի քանի օր առաջ քնած տեղից վեր թռավ ու ասեց՝ մա´մ ջան, ես չեմ ուզում քեզ կորցնեմ»,- պատմեց Վաչագան Մանսուրյանը:

Տուժող Վաչագան Մանսուրյանը ցմահ ազատազրկում պահանջեց ամբաստանյալի համար, սակայն դատավորը նշեց, որ նման պատիժ այս պարագայում չի նախատեսվում:

Իր ճառում Թագուհի Ստեփանյանն էլ նշեց, որ դեպքից արդեն 4 տարի է անցել, բայց երեխայի համար սրտացավ ներկայացող հայրը մեկ անգամ չի հետաքրքրվել, թե ինչպես է երեխան, ինչ առողջական խնդիրներ ունի: Ոչ էլ նրա ծնողներն են հետաքրքրվել:

«Վլադիկ Մարտիրոսյանը սպառնալիքներ է տվել, որ երեխան երկու տարեկանը չի բոլորի: Ես խնդրում եմ նրան պատժել ամենախիստ պատժով, որը օրենքը թույլ է տալիս՝ ընդհուպ ցմահ ազատազրկում: Ինքը իմ ծնողին կյանք չի տվել, որ խլեց: Ուզում եմ ցմահ, որ երբևիցե դուրս չգա ու երեխային չխանգարի, որ ես երեխային մեծացնեմ, հասցնեմ իր նպատակին: Չեմ ուզենա երեխայի անդորրը խանգարվի, խնդրում եմ ամենախիստ պատժով դատապարտեք»,- ասաց Թագուհի Ստեփանյանը:

Պաշտպանական կողմը ժամանակ խնդրեց ճառ նախապատրաստելու համար: Դատական նիստը հետաձգվեց, հաջորդ նիստը նշանակվեց ապրիլի 3-ին՝ ժամը 16։00-ին:

Հիշեցնենք, որ Վլադիկ Մարտիրոսյանի կողմից կացնահարվել էր մի ողջ ընտանիք: Դեպքը տեղի էր ունեցել 2016 թվականի հուլիսի 8-ին Երևանի Շենգավիթ համայքի շենքերից մեկում: Վլադիկ Մարտիրոսյանը կնոջ՝ Թագուհի Մանսուրյանի հետ վեճի էր բռնվել, որից հետո զանգահարել էր ոստիկանություն: Երբ կինն ու նրա մայրը՝ Կարինե Մանսուրյանը, ժամը 4-ին ոստիկանությունից տուն են վերադարձել, Վլադիկ Մարտիրոսյանը նրանց դիմավորել է մուտքում և կացնի հարվածներ հասցրել նախկին զոքանչին ու կնոջը: Հարվածներ էր ստացել նաև նրանց օգնության դուրս եկած աները: Ստացած վնասվածքներից Կարինե Մանսուրյանը մահացել էր, իսկ Թագուհի և Վաչիկ Մանսուրյանները ծանր վնասվածքներով հիվանդանոց էին տեղափոխվել:

Վլադիկ Մարտիրոսյանին՝ Կարինե Մանսուրյանի սպանության, Թագուհի և Վաչագան Մանսուրյանների նկատմամբ սպանության փորձ կատարելու համար մեղադրանք էր առաջադրվել ՀՀ ՔՕ 104-րդ հոդվածի 1-ին մասով և 34-104-րդ հոդվածի 2-րդ մասի 1-ին կետով: Դատախազը ամբաստանյալի համար պահանջել է 18 տարվա ազատազրկում:

Նախկինում՝ այդ նույն տղամարդը պարբերաբար ծեծի է ենթարկել կնոջը` Թագուհի Մանսուրյանին, վերջինիս դիտավորությամբ ուժեղ ցավ և հոգեկան ուժեղ տառապանք է պատճառել: Դատարանն ապացուցված էր համարել, որ Վլադիկ Մարտիրոսյանը խոշտանգել է կնոջը, չնայած դրան նա դատապարտվել էր ընդամենը 6 ամիս ժամկետով ազատազրկման, սակայն պատիժը պայմանականորեն չի կիրառվել, իսկ այդ օրը նա ցանկացել էր որդուն տեսնել: Այն հարցին, թե ինչպես է կացինը հայտնվել իր ձեռքում. ամբաստանյալը ասել է, որ այն վերցրել է աներոջ ձեռքից, սակայն դատարանը փաստել է, որ կացինը նոր է եղել, և այն չէր կարող 2 տարվա միս կոտրելու կացին լինել, ինչպես ներկայացրել է ամբաստանյալը: