Շարունակվում են Արարատ Միրզոյանի հանդիպումները Կոպենհագենում

ՀՀ ԱԺ «Իմ քայլը» խմբակցության պատգամավոր Գևորգ Պապոյանը ֆեյսբուքյան իր էջում գրառմամբ հայտնել է, որ ՀՀ ԱԺ նախագահ Արարատ Միրզոյանի գլխավորած պատվիրակության կազմում գտնվում է Դանիայի Թագավորության մայրաքաղաք Կոպենհագենում:

«Հանդիպեցինք Դանիայի խորհրդարանի խոսնակ Հենրիկ Դամ Քրիստենսենի (Սոցիալ-դեմոկրատական կուսակցություն) հետ: Հանդիպմանը մասնակցել են նաեւ խորհրդարանի առաջին փոխխոսնակ Կարեն Էլլեմանը (Լիբերալ կուսակցություն) և փոխխոսնակ Յենս Ռոդեն (Դանիայի Սոցիալ-Լիբերալ կուսակցություն):

Դանիական կողմի խնդրանքով ԱԺ նախագահը ներկայացրեց անկախությունից ի վեր ՀՀ անցած ճանապարհը և Թավշյա հեղափոխությունից ու 2018 թվականի արտահերթ խորհրդարանական ընտրություններից հետո տեղի ունեցած փոփոխությունները: Անդրադարձ է կատարվել Հայաստանի կողմից որդեգրած ժողովրդավարական փոփոխությունների օրակարգին, հատկապես դատաիրավական ոլորտում: Քննարկվել է Ընտրական օրենսգրքի և Կուսակցությունների մասին օրենքի բարեփոխումների շուրջ եվրոպական տարբեր կառույցների հետ համագործակցության շրջանակը: Դանիայի խորհրդարանի խոսնակը պատրաստակամություն է հայտնել սատարելու Հայաստանի Ազգային ժողովին՝ ժողովրդավարական ձեռքբերումները բոլոր բնագավառներում կոնսոլիդացնելու գործում:

Պարին Միրզոյանը հատուկ ընդգծեց, որ սա ՀՀ Ազգային ժողովի առաջին պաշտոնական այցն է Դանիայի Թագավորություն՝ խորհրդարանի խոսնակի մակարդակով և հույս հայտնել, որ նոր հնարավորություններ կբացվեն երկու օրենսդիր մարմինների միջև փորձի փոխանակման և միջազգային խորհրդարանական կազմակերպություններում սերտ փոխգործակցության համար: Ափսոսանք հայտնելով, որ դանիական խորհրդարանում գոյություն չունի բարեկամական խմբեր ձևավորելու ավանդույթ, կողմերը հույս են հայտնել, որ փոխշահավետ համագործակցության արդյունավետ հարթակ կարող են հանդիսանալ խորհրդարանական համապատասխան հանձնաժողովների միջև համատեղ հանդիպումների և քննարկումների կազմակերպումը, փոխադարձ այցերը և մշտական շփումը տարբեր խորհրդարանական խմբակցությունների միջեւ:

ՀՀ Ազգային ժողովի նախագահն իր երախտիքի խոսքը հայտնեց Դանիայի խորհրդարանի կողմից ՀՀ-ԵՄ Համապարփակ և ընդլայնված գործընկերության համաձայնագիրը վավերացնելու և ներպետական ընթացակարգերն ավարտելու մասին Եվրոպայի խորհրդի գլխավոր քարտուղարությանը պաշտոնապես տեղեկացնելու համար: Արարատ Միրզոյանը հույս է հայտնել, որ դանիական կողմը կաջակցի Հայաստանի իշխանություններին ԵՄ-ի հետ մուտքի արտոնագրերի ազատականացման շուրջ երկխոսության մեկնարկին:

Դանիայի խորհրդարանի խոսնակի խնդրանքով Արարատ Միրզոյանը ներկայացրեց Հայաստանի ներքաղաքական օրակարգի հարցեր, այդ թվում՝ ապրիլի 5-ին կայանալիք հանրաքվեի և Սահմանադրական դատարանի շուրջ ընթացող գործընթացները, խոսել Սահմանադրության փոփոխության անհրաժեշտության վերաբերյալ՝ որպես Հայաստանում ընթացող դատաիրավական, տնտեսական բարեփոխումների հաջողության հասնելու գրավական:

Անդրադարձ է կատարվել տարածաշրջանային անվտանգության խնդիրների լայն շրջանակին, այդ թվում՝ Լեռնային Ղարաբաղի հակամարտությանը: Ազգային ժողովի նախագահի ղեկավարած պատվիրակության անդամները ներկայացրել են Լեռնային Ղարաբաղի հակամարտության էությունը և Հայաստանի մոտեցումները բացառապես խաղաղ ճանապարհով դրա հանգուցալուծման ուղղությամբ՝ ԵԱՀԿ Մինսկի խմբի համանախագահության շրջանակում»,- գրել է Գևորգ Պապոյանը:

https://www.facebook.com/GevorgPapoyan13/posts/635467233870170?__xts__[0]=68.ARB1NCKhiu2mutNA-ks2yCTD24QGGiQN4OcWWI30KOHvaT-1UFOz-_GH2kQ-P88-_4rsWqzY8VxXhysj2AchgDFS71IVrGgRoYmCwr7Kzlz388Sw9ZT274zPQ6J3oTaW6kbMoP4H9ccWUUt_vZRywAu0oOBqmaHkffxDQlewSadkwRKtxR6I6EVYHBL1cz0L5U6O43Lf5Y03QmsfAvc7eg_zlgLtqLiVo9gg4nw-aMEpKFX03Bf5GPfM17F5GGaE66KepIHX9T5xlfbdXWH2b7kvYgEIurhGTIIlJ71_YgaEbrB0iCdeKJqIuyax0APGuAJv3kglxAdjDe86d1u2EfM&__tn__=-R