Առաջին ստուգումն անց է կացվելու Ամուլսարում. Արարատ Միրզոյանը հանդիպել է ակտիվիստներին

Ամուլսարի խնդիրն այն խորությամբ, որը ներկայացվեց, մտահոգեց փոխվարչապետ Արարատ Միրզոյանին: Հայտարարություն հնչեց, որ առաջին ստուգումն անց է կացվելու Ամուլսարում: Այս մասին գրել է «Ջերմուկի զարգացման կենտրոն»-ի համանախագահ Վազգեն Գալստյանը ֆեյսբուքյան իր էջում.

«Երեկ ձեռք բերվեց պայմանավորվածություն՝ հնարավորության դեպքում հանդիպելու Նիկոլ Փաշինյանին, սակայն, քանի որ այս հարցերով անմիջապես զբաղվում էր Արարատ Միրզոյանը, ուստի, մինչև գիշերը ժամը 23:00 քննարկումներից հետո որոշում կայացվեց հանդիպել պարոն Միրզոյանի հետ:
Ջերմուկի բողոքող բնակիչների հետ էին նաև «Ամուլսարն առանց հանքի» նախաձեռնության և ՀԲՃ-ի ներկայացուցիչները:

Խնդիրն այն խորությամբ, որը ներկայացվեց, մտահոգեց փոխվարչապետին, քանի որ իմ կարծիքով իրենք այդ հրատապությամբ և կարևորությամբ չէին վերաբերում Ամուլսարի ոսկու հանքի խնդրին: Հայտարարություն հնչեց, որ առաջին ստուգումն անց է կացվելու Ամուլսարում:

Մինչ մեր հետ հանդիպելը Կառավարությունը մտածում էր իրականացնել տեսչական ստուգում, որը խոշոր հաշվով ստուգելու էր, թե ինչքանով է համապատասխանում տեղում կատավող աշխատանքը փաստաթղթում գրվածի հետ, սակայն մեր պնդումներից և փաստարկներից հետո եկանք ընդհանուր հայտարարի, որ ստուգումների բովանդակությունն ավելի լայն կլինի:

Առաջիկա 2-3 օրերի ընթացքում կհրապարակեմ խնդիրների այն ողջ ասպեկտը, որը պատկերացնում ենք, որ պետք է լինի այդ հանձնաժողովի, կամ Լիազոր մարմնի կողմից ստեղծված խմբի իրավասության մեջ: Ստուգումների այս մոդելն ամենամեծ ձեռքբերումն էր, որն այս պայքարի օրերի ընթացքում կարողացանք ֆիքսել:

Ստուգումների ժամանակացույցի հետ կապված:

Քանի որ փաստացի Կառավարության ծրագիրը գրելն առաջնահերթ էր ժամկետների տեսանկյունից, ուստի, այն գրելուց հետո Կառավարությունն անցել է մնացած հրատապ հարցերի լուծմամբ զբաղվելուն և նախորդող 10 օրերի ընթացքում չի կարողացել օբյեկտիվ արձագանքնել մեր բողոքին: Հրատապ հարցերից մեկն էլ տեսչական մարմինները նախարարությունների ենթակայությունից դուրս բերելն ու Կառավարությանն առընթեր սարքելն է, որի փաստաթղթավորումն որոշակի ժամանակ է պահանջում: Այս պահի դրությամբ ՀՀ բնապահպանության և ընդերքի տեսչական մարմնի փաստաթղթավորումը կավարտվի 7-10 օրվա ընթացքում, որից հետո ևս 10-15 օր է անհրաժեշտ Ամուլսարի վերաբերյալ ստուգումներն իրականացնելու հարցում:

Իմ սուբյեկտիվ կարծիքով այդ ստուգումների համար պահանջվելու է առնվազն 3-4 շաբաթ և մոտ 1 շաբաթ էլ անհրաժեշտ է լինելու հանձնաժողովի կազմը հստակեցնելու համար:

Փաստացի, քանի որ ստուգումների ձևաչափը հստակեցված է և մեր պատկերացրած հանրային ու մասնագիտական լայն ներգրավվածությունն այդ հանձնաժողովում երաշխավորված է, ուստի, Ջերմուկի բնակիչները որոշում են կայացրել դադարեցնել բողոքի բոլոր գործողությունները:

Դաշտամիջյան ճանապարհներ փակելու մեր «գործիքները» միշտ մեզ հետ են և Կառավարությանը 1-1.5 ամիս ժամանակ տալը լիովին տրամաբանված համարելով ու վստահելով անցնում ենք մեր առօրեական գործերին:

Քանի որ խոսեցինք, քննարկեցինք ու հասկացանք միմյանց, ուստի, Բնապահպանության նախարարի այսօրվա Ջերմուկ գալու պլաններն արդեն ժամանակավրեպ են: Նման այց ամենայն հավանականությամբ չի լինելու: Մինչև կեսօր տեղեկատվությունը վերջնական կհաստատվի, որի մասին Ձեզ տեղյակ կպահեմ:

ՀԳ․ Դուք չգիտեմ ինչ եք անելու, ես գնամ տուրիզմի ոլորտի վիճակագրություն հավաքեմ, որ հանձնաժողովին բնապահպանական հիմնախնդիրներից բացի նաև այլ նյութեր ներկայացնելու հնարավորություն ունենանք»:

https://www.facebook.com/galstyan.vazgen/posts/1831352240255546