Հոգեբանական պարզ միջոցներ դիմադրողականությունը բարձրացնելու համար. զրույց հոգեբանի հետ

SHANTNEWS.am-ի հետ զրույցում հոգեբան Նարինե Աբրահամյան-Թովմասյանն անդրադարձել է մարդու ֆիզիկական վիճակի վրա հոգեկան վիճակի ազդեցությանը:

«Հոգեկանի ու ֆիզիկականի փոխկապակցության փաստը նորություն չէ: Եթե նույնիսկ կողմնակից չենք մետաֆիզիկական տեսություններին /Լուիզա Հեյ, Լիզ Բուրբո/, համաձայն որոնց՝ յուրաքանչյուր ֆիզիկական հիվանդության ներքո քողարկված է հոգեբանական չլուծված խնդիր, բացասական համոզմունք, հոգեկերտվածքի յուրահատկություն, ապա պետք է հաշվի նստենք գիտական հետազոտությունների հետ, որոնք բացահայտում են հիվանդությունների հոգեսոմատիկ՝ հոգեմարմնական բնույթը»,- ասում է նա:

Հոգեբանը նշում է, որ հուզական յուրաքանչյուր վիճակ ունի իր ֆիզիկական բաղադրիչը՝ սրտի աշխատանքի տեմպի փոփոխություն, ճնշման տատանումներ, ջղաձգություն, մկանային լարվածություն: Հետևաբար, յուրաքանչյուր տևական հուզական վիճակ ամրապնդում է մարմնի ոչ ցանկալի տեղաշարժերը:

«Ավստրալացի և ամերիկացի հետազոտողները բացահայտել են, որ տևական կամ կարճաժամկետ բացասական հոգեվիճակները ներազդում են նաև իմունիտետի վրա՝ թուլացնելով օրգանիզմի դիմադրողականությունն ու խոցելի դարձնելով այն տարատեսակ վարակների համար: Ցավոք, բացասական հույզերն ու հոգեկանի աշխատանքը խաթարող գործոններն անխուսափելի են: Սակայն, երբ գիտակցում ես հակազդման հետևանքների կարևորությունն առողջության վրա, ավելի դյուրին է դառնում նաև վերապրել դրական հույզերը, վերահսկել՝ բացասականները»,- նշում է Աբրահամյան-Թովմասյանը:

Վերջինս նկատում է՝ ստեղծված իրավիճակը՝ մեր սովորական առօրյան խաթարող օրակարգը, մի կողմից մարտահրավեր է մեզ համար, սթրեսային իրավիճակ, մյուս կողմից՝ փայլուն հնարավորություն՝ վերանայելու սեփական խորքային համոզմունքները, կենսակերպը, արժեքները, հույզերի սպեկտրը, որոնք սովորական են դարձել մեր ընտանիքներում, աշխատավայրում և այլուր:

Նրա խոսքով՝ գոյություն ունեն մի շարք պարզ հնարքներ, որոնք կօգնեն գոնե ընտանեկան մակարդակում դրական փոփոխությունների հասնել և շատ մատչելի են  իրականացնելու համար:

«Այս օրերին գայթակղիչ է դառնում խախտել քնելու ռեժիմը: Սա ցանկալի երևույթ չէ՝ բոլորիս հայտնի պատճառներով: Օրը սկսեք սովորականից մի փոքր ուշ, բայց ոչ կեսօրից: Համացանցը ողողված է հոգեմարզումներով, որոնք կարող եք ամբողջ ընտանիքով անցկացնել:

Օգտվեք չշտապելու հնարավորությունից: Վայելեք առավոտյան նախաճաշը՝ հանգստացնող երաժշտության ուղեկցությամբ:

Ստեղծեք օրակարգ՝ ձեր ընտանիքի համար. ցանկալի է դա անել ընտանիքի բոլոր անդամների ներգրավմամբ: Հաշվի առեք, որ օրակարգում պետք է լինեն կետեր, որոնք հնարավորություն կտան յուրաքանչյուրին գոնե կարճ տևողությամբ անձնական ժամանակ ունենալ:

Ընտրողականություն ապահովեք նաև ստացվող տեղեկատվության առումով. ձեզ կօգնեն հետևյալ հարցադրումները՝

1. Արդյո՞ք այս ինֆորմացիան հավաստի է,
2. Արդյո՞ք այն օգտակար է,
3. Ինչպե՞ս կարող եմ օգտագործել այս տեղեկությունը՝ ի բարօրություն ինձ և շրջապատողներիս:

Եթե ստացված ինֆորմացիան որևէ գործիք չի տրամադրում դրական փոփոխությունների իրականացման համար, ապա այն անարժեք է: Ավելորդ է ասել, որ օրվա ընթացքում մի քանի ժամ wi-fi-ի և համացանցի բարիքներից չօգտվելը ոչ պակաս արդյունավետ «մաքրման ու ազատագրման» միջոց է»,- ասում է հոգեբանը:

Հոգեբանի խոսքերով՝ դրական հույզերի ամրապնդման համար մի փոքր ավելի շատ ժամանակ է անհրաժեշտ, քան բացասականներով վարակվելու համար: Նա ներկայացնում է նաև միջոցներ, որոնք մի կողմից կլրացնեն «անսպասելի պարապության» ժամերը, մյուս կողմից՝ կնպաստեն դրական հույզերի առաջացմանն ու ամրապնդմանը: Դրանք հետևյալն են.

• Երախտիքի գործիք: Առաջարկեք, որ առավոտյան և երեկոյան ընտանիքի անդամներից յուրաքանչյուրը երեքական դրական երևույթ, փաստ, դեպք արձանագրի, որի համար շնորհակալ է: Սրանք կարող են լինել սովորական բաներ, ինչպիսիք են արևի առկայությունը, ձեր ֆիզիկական սովորական կարողությունները՝ տեսնելու, լսելու, շարժվելու և այլն: Ի դեպ, ամենափոքրերին կարող եք առաջարկել նկարել այն, ինչ իրենց ուրախացնում ու գոհունակություն է առաջացնում: Լավ կլինի նաև գրի առնեք ձեր երախտիքի ցուցակները:
• Դրական հիշողությունների պաստառ: Ընտանեկան ալբոմներից ընրեք ամենավառ ու ուրախացնող լուանկարները և դրանցով մի պաստառ պատրաստեք: Կարող եք այն հագեցնել դրական աֆֆիրմացիաներով՝ պնդումներով (Մենք ուրախ ենք, երջանիկ ենք և այլն): Այստեղ կարող եք թվարկել նաև ձեր / ձեր ընտանիքի բոլոր անդամների հաջողությունները՝ կյանքի տարբեր փուլերում և տարբեր ոլորտներում:
• Երազանքների քարտեզի պատրաստում: Հոգեբանական շատ հայտնի հնարք է. պատրաստեք մի պաստառ, որը կարտահայտի ձեր երազանքները՝ ապագայի հետ կապված: Գունեղ նկարներն ու ոգեշնչող կարգախոսները ոչ միայն աչք են շոյելու, այլ նաև դառնալու են դրական համոզմունքներ, որոնք մեծապես կանդրադառնան ձեր հույզերի և հետևաբար՝ հոգեսոմատիկ վիճակի վրա:
• Վերջին երկու աշխատանքների արդյունքները ցանկալի է փակցնել տեսանելի մի վայրում: Ամեն անգամ դրանք տեսնելիս դրական հույզերի առաջացումը կամրապնդի դրանց արտացոլանքը ուղեղում:

Հոգեբանը վստահեցնում է՝ պարզ, բայց շատ արդյունավետ հնարքները կամրապնդեն ձեր ընտանիքի փոխհարաբերությունները, դրական մթնոլորտը: