Կորոնավիրուսից մահացած մարալիկցի 68-ամյա բնակչի հետ շփված «Գյումրի» ԲԿ-ի 29 բուժաշխատող մեկուսացվել է

«Գյումրի» բժշկական կենտրոնի 29 աշխատակից է մեկուսացվել քաղաքի հյուրանոցներից մեկում: Նրանց առողջական վիճակը լավ է, կորոնավիրուսին բնորոշ ախտանշաններ ու ջերմություն այս պահին չունեն:

«Վեց կամ յոթ բժիշկ է, մյուսները միջին բուժանձնակազմից են, հենց այսօր էլ աշխատակիցներից հաղորդագրություն եմ ստացել, որ բոլորի վիճակը լավ է: Մեկին ուղարկել ենք Գյումրիի ինֆեկցիոն հիվանդանոց, մնացած 28-ը մեկուսացված է հյուրանոցներից մեկում: Բուժաշխատողներից ոչ մեկին չեն թեստավորել, նմուշառում ևս չի կատարվել, ուղղակի անհրաժեշտությունից ելնելով թերապևտիկ բաժանմունքի աշխատակիցները մեկուսացվել էն»,- SHANTNEWS.am-ին հայտնեց «Գյումրի» ԲԿ փոխտնօրեն Արմեն Խաչատրյանը:

Ըստ փոխտնօրենի՝ թերապևտիկ բաժանմունքի աշխատանքը չի դադարեցվել, բուժսպասարկումը շարունակվում է բնականոն հունով, մյուս հերթափոխների բժիշկներն ու քույրերն են աշխատում, որոնք կորոնավիրուսով հիվանդ մարալիկցի 68-ամյա պացիենտի հետ շփում չեն ունեցել:

«Քաղաքացին բուժհաստատություն է դիմել մարտի 29-ին, ընդունարանում հետազոտվել է ու ախտորոշվել է թոքաբորբ, բայց քաղաքացին այդ օրը հրաժարվել է ստացիոնար բուժումից ու տուն է գնացել: Տանը ինքնազգացողությունը վատացել է, հաջորդ օրը՝  մարտի 30-ին, կրկին եկել է մեզ մոտ: Ունեցած թոքաբորբից բացի, ախտորոշվել է նաև ուղեղի արյան շրջանառության խանգարում` ինսուլտ, քաղաքացին հոսպիտալացվել է: Քանի որ մինչև մեզ մոտ գալը եղել էր նաև Ինֆեկցիոն հիվանդանոցում, ու կորոնավիրուսի նմուշառում չէր կատարվել, առկա հիվանդության մասին որևէ խոսք չի եղել, մենք չենք էլ կասկածել, որ քաղաքացին կարող է կորոնավիրուս ունենալ:

Երկու օր մեզ մոտ բուժում ստանալուց հետո ինքնազգացողությունը վատացավ, տեղափոխվեց Երևան, որտեղ էլ հաստատվեց կորոնավիրուս հիվանդությունը»,- «Գյումրի» ԲԿ-ում մարալիկցի քաղաքացու բուժման մանրամասները ներկայացրեց Արմեն Խաչատրյանը:

Իսկ Գյումրիի ինֆեկցիոն հիվանդանոցի տնօրեն Աստղիկ Բեյբությանն էլ տեղեկացրեց, որ քաղաքացուց նմուշառում կատարելու ցուցում չեն ունեցել, միայն հետազոտել են:

«Քաղաքացին մեզ դիմել է, նրա մոտ, թոքաբորբից բացի, ախտորոշվել են նաև մի քանի ուղեկցող հիվանդություններ, ունեցել է նաև երիկամների անբավարարություն: Մենք անամնեզով ճշտեցինք, որ արտասահմանյան որևէ երկրում այս ընթացքում չի եղել կամ այնտեղից վերադարձած անձանց հետ շփում չի ունեցել: Մենք զրուցել են համաճարակաբանների հետ, նման դեպքերում  նմուշառում կատարելու ցուցում չկա, դրա համար էլ քաղաքացուց նմուշ չի վերցվել: Մեզ ասաց, որ այս ընթացքում եղել է տանը, ոչ մեկի հետ շփում չի ունեցել»,- ասաց Աստղիկ Բեյբությանը:

Ըստ Շիրակի մարզպետ Տիգրան Պետրոսյանի՝ այս դեպքում հիմնական խնդիրն առաջացել է այն ժամանակ, երբ քաղաքացին իր շփման շրջանակում չի նշել վտանգավոր երկրներից վերադարձած մարդկանց, և, ըստ պարետատան հաստատած ցուցումների, նմուշառում չի արվել:

«Ուզում եմ հստակեցնել, որ այսպիսի դեպքերում ո՛չ Գյումրիի ինֆեկցիոն հիվանդանոցը, ո՛չ էլ մեկ այլ բուժհաստատության տնօրինություն քաղաքացուց նմուշառում վերցնելու ցուցում չի կարող տալ: Առողջապահության նախարարության ենթակայության տակ գործող Հիվանդությունների վերահսկման և կանխարգելման ազգային կենտրոնի Շիրակի մասնաճյուղի աշխատակիցներն էլ առաջնորդվել են հենց այդ հրամանով: Թե որտեղից կամ ինչպես է քաղաքացու մոտ կորոնավիրուս հայտնվել, դեռևս որևէ  պաշտոնական օջախ աշխատակիցները չեն ներկայացրել:

Այս պահին նպատակահարմար են գտել միայն մեկուսացնել քաղաքացու հետ շփված «Գյումրի» ԲԿ-ի անձնակազմի 29 աշխատակիցներին: Նրանցից նմուշառում կկատարվի, որից հետո նոր կհստակեցվեն հետագա քայլերը: Մարալիկի բնակչի ընտանիքի անդամներն ու կոնտակտային անձինք նույնպես մեկուսացված են, մոտ 10 մարդ: Մի մասը Երևանում է, մի մասը՝ մեզ մոտ»,- տեղեկացրեց Շիրակի մարզպետը:

Հիշեցնենք՝ երեկ գիշեր կորոնավիրուսից մահացած 68-ամյա բնակիչը Մարալիկ քաղաքից էր: