Երևանի ավագանին մի շարք միությունների գույքահարկի արտոնություն տրամադրեց

Երևանի ավագանու ապրիլի 28-ի նիստում ավագանու անդամները քննարկել և համաձայնել են գույքահարկի արտոնություններ տրամադրել մի շարք ընկերությունների ու միությունների, թեպետ դրանցից շատերին  հանձնաժողովի նիստում բացասական եզրակացություն էր տրվել:

Երևանի ավագանին որոշել է «Հայաստանի նկարիչների միավորում» ՀԿ-ին սեփականության իրավունքով պատկանող, Աբովյան փողոցի հ. 16, Աբովյան փողոցի 16/3 հ. 40 և Աբովյան փողոցի 16/3 հ. 38 հասցեներում գտնվող շինությունների նկատմամբ սահմանել գույքահարկի արտոնություն՝ ազատելով 9 մլն 381 հազար 284 դրամի չափով գույքահարկի վճարումից։

«Հայաստանի կույրերի միավորում» հաշմանդամների հասարակական կազմակերպությանը սեփականության իրավունքով պատկանող, Ավ. Իսահակյան փողոցի 18/3, Ավ. Իսահակյան փողոցի 16 h. 3/3, Ավ. Իսահակյան փողոցի 16 h. 3/2, Ավ. Իսահակյան փողոցի 16ա, Ավ. Իսահակյան փողոցի 16ա h. 28, Ավ. Իսահակյան փողոցի 18, Վարդանանց փողոցի 109 հ. 37 և Քաջազնունու փողոցի թիվ 1 հասցեներում գտնվող շինությունների նկատմամբ սահմանել գույքահարկի արտոնություն` ազատելով 3 մլն 244 հազար 259 դրամի չափով գույքահարկի վճարումից։

«Հայաստանի խուլերի միավորում» հասարակական կազմակերպությանը սեփականության իրավունքով պատկանող, Ե. Կողբացի փողոցի 69 և Ե. Կողբացի փողոցի 69/1 հասցեներում գտնվող շինությունների նկատմամբ սահմանել գույքահարկի արտոնություն` ազատելով 3 մլն 160 հազար 269 դրամի չափով գույքահարկի վճարումից։

Հողի հարկի արտոնություն տրամադրվեց «Թումո» հիմնադրամին: Երևանի Հալաբյան փողոցի հ. 2 հասցեում` Թումանյանի անվան զբոսայգում գտնվող, Սիմոնյան կրթական հիմնադրամին անհատույց օգտագործման իրավունքով պատկանող հողամասի համար սահմանել հողի հարկի արտոնություն` ազատելով 2497149 դրամի չափով հողի հարկի վճարումից:

«Հայաստանի ժուռնալիստների միություն» ՀԿ-ին սեփականության իրավունքով պատկանող, Պուշկինի փողոց 3/1 հասցեում գտնվող շինության նկատմամբ սահմանել գույքահարկի արտոնություն։ Ըստ այդմ, ՀԿ-ն ազատվում է 2017, 2018, 2019 թվականների 6 մլն 540 հազար 987 դրամի չափով գույքահարկի վճարումից։

Հաշվի առնելով «Սիմոնյան» կրթական հիմնադրամի կողմից այգին բարեկարգելու ու պահպանելու նպատակով իրականացված մեծածավալ աշխատանքը, ներդրված ֆինանսական միջոցները, ինչպես նաև այն հանգամանքը, որ տարածքի բնակիչները անարգել մուտք են գործում և կազմակերպում են իրենց հանգիստը այգու տարածքում, Երևան քաղաքի ավագանու որոշումներով նշված կազմակերպությանը 2014, 2015, 2016, 2017 և 2018 թվականների համար տրամադրվել էր հողի հարկի արտոնություն:

Հետևյալ որոշումները կայացվեցին, քանի որ կազմակերպությունները չունեն ֆինանսական միջոցներ և գտնվում են ֆինանսական ծանր կացության մեջ, ինչի հետևանքով չեն կարողանում կատարել գույքահարկի հարկային պարտավորությունները, թեպետ ավագանու անդամներից ոմանք նշեցին, որ նախագծերին կողմ են քվեարկում՝ ելնելով երկրում ստեղծված ճգնաժամային իրավիճակից, սակայն, ընդհանուր առմամբ, այս մոտեցումը պետք է վերանայել:

«Համաձայն եմ գործընկերներիս հետ, որ ինչ-որ փոփոխություններ կան, բայց գրեթե վստահ եմ, որ այս մարդկանց մոտ միակ խնդիրը գույքահարկը չէ: Այս կազմակերպությունների մեծ մասը գտնվում է քաղաքի կենտրոնում և տարօրինակ է, որ չեն կարողանում գույքահարկ վճարել, դա վատ կառավարման արդյունք է, որ պետք է շտկեն իրենք: Այս տարբերակը, որ անում ենք, սա սխալ ճանապարհ է, որովհետև եթե ժամանակ ենք տալիս, այդ ժամանակը տվել էինք նաև նախորդ տարի, բոլոր դիմող կազմակերպություններին ներել ենք գույքահարկը: Այստեղ կա նաև ընտրովի, կարծես թե արդարադատություն: Ներում ենք նրանց գույքահարկը, ովքեր դիմում են, իսկ ի՞նչ գիտենք, որ ավելի վատ վիճակում գտնվող կազմակերպություններ չկան, էլ չեմ ասում քաղաքացիների մասին»,- ասաց «Իմ քայլը» խմբակցության անդամ Լևոն Զաքարյանը: