ԱՄՆ հետախուզության նոր զեկույցը, Չինաստանի թաքցրած փաստերը․ Վաշինգտոն-Պեկին հակամարտությունը շարունակվում է

Վերջին շրջանում ԱՄՆ-ն բազմիցս հայտարարել է, որ Չինաստանը կորոնավիրուսի համավարակի վերաբերյալ կարևոր տեղեկություններ է թաքցրել, ինչը հանգեցրել է հիվանդության տարածման ամբողջ աշխարհում։

ԱՄՆ-ի իշխանությունները հավատացած են՝ Չինաստանը նման քայլի է գնացել, որպեսզի հնարավորություն ունենա ավելացնել բժշկական նշանակության ապրանքների ներմուծումը։ Ըստ Associated Press լրատվական գործակալության հոդվածի՝ այս մասին գրված է ԱՄՆ-ի հետախուզության 4 էջանոց զեկույցում։

Փաստաթղթում նշվում է, որ Չինաստանը կրճատել է բժշկական պարագաների արտահանումն ու ավելացրել է դրանց ներմուծումը և փորձել է թաքցնել դա՝ հետաձգելով առևտրային տվյալների հրապարակումը։

Զեկույցում նաև նշվում է, որ Չինաստանը Առողջապահության համաշխարհային կազմակերպությանը հունվարին չի հայտնել, որ կորոնավիրուսը փոխանցվում է մարդուց մարդուն։ Միևնույն ժամանակ, Պեկինն ավելացրել է բժշկական դիմակների, վիրաբուժական խալաթների և ձեռնոցների ներմուծումը։

Այս տեղեկությունները հաստատել է նաև ԱՄՆ պետքարտուղար Մայք Պոմպեոն ABC հեռուստաալիքին տված հարցազրույցում։

«Այդ փաստերը ճիշտ են։ Մենք կարող ենք հաստատել, որ Չինաստանի Կոմունիստական կուսակցությունն արել է ամեն ինչ, որպեսզի աշխարհը ժամանակին չիմանա, թե ինչ է տեղի ունենում։ Դրա մասին բազմաթիվ վկայություններ կան։ Մենք տեսել ենք, թե այս մասին հայտնող բազմաթիվ բուժաշխատողների Չինաստանում ինչպես են լռեցնում։ Տեսել ենք շատ բաներ, որ հատուկ են ավտորիտար վարչակարգերին․ դա Կոմունիստական կուսակցության կողմից ապատեղեկատվություն տարածելու դասական օրինակ է»,- ասել է ԱՄՆ պետքարտուղարը։

Մայք Պոմպեոն նաև ասել է, որ բազմաթիվ փաստեր վկայում են այն մասին, որ վիրուսը դուրս է եկել Չինաստանի Ուհան քաղաքում գործող լաբորատորիայից և տարածվել ամբողջ աշխարհում։

Ավելի ուշ ԱՄՆ նախագահ Դոնալդ Թրամփը Լինքոլնի հուշահամալիրում կազմակերպված հարցուպատասխանի ընթացքում վիրտուալ կերպով պատասխանել է քաղաքացիների հարցերին՝ կրկին անդրադառնալով վիրուսի լաբորատոր ծագման թեմային։

«Մեզ տեղի ունեցածի մասին հիմնավորված զեկույց կտրամադրեն, որը շատ հարցերի կպատասխանի։ Անձամբ ես կարծում եմ, որ չինացիները սարսափելի սխալ են կատարել և փորձել են քողարկել դա, սակայն նրանց չի հաջողվել հարթել իրավիճակը։ Նրանք թույլ չէին տալիս մարդկանց մուտքը Չինաստան, սակայն չէին խոչընդոտում այն մարդկանց, ովքեր Չինաստանից ուղևորվում էին Միացյալ Նահանգներ և աշխարհի տարբեր երկրներ։ Դա վկայում է այն մասին, որ նրանք գիտեին՝ խնդիր ունեն»,- ասել է Սպիտակ տան ղեկավարը։

Դոնալդ Թրամփը նաև չի բացառել, որ Չինաստանին պատժելու համար կարող է բարձրացնել չինական ապրանքների նկատմամբ մաքսատուրքերը։

Տարբեր աղբյուրներ վկայակոչելով՝ CNN-ը գրում է, որ Պեկինին պատասխանատվության ենթարկելու համար Սպիտակ տունը կարող է օգտագործել տարբեր գործիքներ, այդ թվում՝ պատժամիջոցներ սահմանել, չեղյալ հայտարարել ԱՄՆ-ի պարտքային պարտավորությունները և առևտրային նոր քաղաքականություն մշակել։

Ամերիկյան ընդդիմադիր լրատվամիջոցները նաև ընդգծում են, որ Թրամփի վարչակազմը վերջին շրջանում ավելի մեծ եռանդով է Չինաստանին մեղադրում համավարակի տարածման համար․ պատճառն այն է, որ Սպիտակ տունը ցանկանում է շեղել հանրության ուշադրությունը այն մեղադրանքներից, որ ամերիկյան իշխանությունները վիրուսի տարածմանը ոչ պատշաճ են արձագանքել։