Ո՞րն է կառավարության ամենամեծ ձախողումը՝ ըստ Փաշինյանի

Ի՞նչ խնդիր չի կարողացել լուծել ՀՀ կառավարությունը: Խորհրդարանում այս հարցին անդրադարձավ ՀՀ վարչապետ Նիկոլ Փաշինյանը՝ նշելով, թե չեն կարողացել լուծել անկախ, վստահելի դատական համակարգ ունենալու հարցը:

«Ուզում եմ ասել՝ ինչու: Գոյություն ունի մեկ պատճառ. մենք իրո՞ք ուզում ենք, որ ՀՀ-ում լինի անկախ, օրինական, վստահելի դատական համակարգ: Ուզում եմ՝ սա հստակ լինի, ոչ թե՝ ուզում ենք իշխանության, հեղափոխության կամ նույնիսկ ժողովրդի համար վերահսկելի դատական համակարգ, այլ իսկապես ուզում ենք, որ ՀՀ-ում լինի անկախ դատական համակարգ: Եթե ցանկանայինք ունենալ կառավարելի դատական համակարգ, հին խամաճիկային դատական համակարգի փոխարեն նորը, մենք վաղուց լուծած կլինեինք, դրա համար մեկ-երկու զանգը կամ նույնիսկ զանգի բացակայությունը բավարար կլիներ, բայց համոզված ենք, որ ժողովրդավարությունն այլընտրանք չունի, հետընթաց չի լինի, անկախ դատական համակարգը մեր տնտեսական և քաղաքական հետագա զարգացման կարևորագույն գրավականն է»,- ասաց նա:

Կառավարության ամենամեծ ձախողումը, որը, ըստ վարչապետի, եղել է և մինչ օրս շարունակվում է, ՀՀ ժողովրդից գողացված փողերի վերադարձի գործընթացն է եղել:

Այստեղ անհաջողությունը, վարչապետի գնահատմամբ, ունի և օբյեկտիվ, և սուբյեկտիվ պատճառներ: Նա հիշեցրեց՝ 2019-ի ընթացքում ՀՔԾ-ն պետբյուջե է վերադարձրել 7 անգամ ավելի շատ գումար, քան գոյության ողջ պատմության ընթացքում, և՛ ԱԱԾ-ն, և՛ ՔԿ-ն, և ոստիկանությունը նախկինի համեմատ պետբյուջե վերադարձրած գումարները տասնապատկել են, բայց, միևնույն է, ինքը համարում է, որ այս ոլորտում կոռուպցիայի դեմ պայքարում ունեն անհաջողություններ, և դրանք ունեն մի քանի շերտեր:

«Դատական, իրավապահ համակարգում կան բարձր պրոֆեսիոնալներ, նվիրյալներ, որոնք ոչ թե լոյալ են ինչ-որ իշխանության, նրանք նվիրված են իրենց համակարգին, չեմ ասի՝ ինչ թիվ են կազմում ընդհանուր ֆոնը չփչացնելու համար, բայց կան նաև կոռուպցիոն համակարգի նվիրյալներ և դավաճաններ, և դա մեզ համար լրջագույն խնդիր է, կան անգրագետներ, որոնք հոգով մաքուր են պայմանականորեն: Հիմա լեգիտիմ հարց կլինի՝ բա էս երկու տարի ինչո՞վ եք զբաղվել: Զբաղված էինք հետևյալով՝ երբեք չենք ուզել և չենք ուզում թացը չորին խառնել»,- ասաց նա:

Վարչապետը ցանկացավ մեջբերել աստվածաշնչյան մի դրվագ, որ մի քանի անգամ վկայակոչել է:

«Սոդոմի և Գոմորի կործանման պատմությունը և Աբրահամի և Աստծո զրույցը»,- ներկայացրեց վարչապետը, սակայն դահլիճից ընդհատեցին նրան՝ ասվածի այլ տարբերակներ նշելով:

«Թույլ տվեք՝ ես իմ իմացածով ասեմ: Աբրահամն ասում է՝ եթե քաղաքում 50 արդար լինի, կկործանե՞ս, պատասխանը լինում է՝ ո՛չ, չեմ կործանի: Լավ, եթե 10 արդար լինի, կկործանե՞ս, Աստված ասում է՝ ո՛չ: Բանը հասնում է նրան, ասում է՝ եթե մի արդար լինի, Աստված ասում է՝ էդ մի արդարին կհանեմ, մնացածի հարցը կյուծեմ: Ուզում եմ ասել՝ կան պայմանական 10 արդարներ, և ՀՀ կառավարությունն ու խորհրդարանական մեծամասնությունը դատաիրավական համակարգը քանդուքարափ չեն արել, չեն ավերել այդ պայմանական տասը արդարի համար»,- նշեց նա:

Վարչապետն ասաց, որ 100 տոկոսով համոզված է, դեռ տեղյակ չէ՝ երբ կասեն այդ մասին իրավապահները, բայց համոզմունք հայտնեց, որ ընթացքող քննության արդյունքներով 100 տոկոսով կբացահայտվի երկար տարիներ ՀՀ-ում գոյություն ունեցած կոռումպացված ամբողջ համակարգը:

Նա շնորհակալություն և գոհունակություն հայտնեց այն փաստի կապակցությամբ, որ ԱԺ-ն ընդունել է «Ապօրինի գույքի բռնագանձման մասին» օրենքը, և առաջիկայում կունենան բավարար գործիքակազմ ժողովրդից բռնագանձվածը հետ բերելու ոչ միայն քրեական, այլև քաղաքական ընթացակարգերով: