ՎԶԵԲ ծրագրով Գյումրիում ևս 15 փողոցի հիմնանորոգման համար մրցույթներ են կայացել

ՎԶԵԲ ծրագրով Գյումրիում ևս 15 փողոց կհիմնանորոգվի։ Սա փողոցաշինական մեծ ծրագրի երկրորդ փուլում ընդգրկված փողոցների միայն մի մասն է, որոնց համար մրցույթներ են կայացել։ Այս մասին SHANTNEWS.am-ին ասել է Գյումրիի քաղաքապետի գլխավոր խորհրդական Կարապետ Մխչյանը։

Մրցույթները երկու փուլով են կայացել՝ առաջինը վերաբերել է 5, իսկ երկրորդը՝ 10 փողոցների հիմնանորոգմանը։ Այս փուլում հիմնանորոգվելու են Հաղթանակի պողոտային, Մուսայելյան և Գորկու կենտրոնական փողոցներին հարող փողոցները:

Գյումրիի քաղաքապետի գլխավոր խորհրդականը հրապարակել է հիմնանորոգվող փողոցների ցանկը.

✅ Օզանյան փողոց՝ 564մ
✅ Կարսի խճուղի՝ 992մ
✅ Կարսի խճուղի Ӏ-ին նրբանցք՝ 298.5մ
✅ Տեր-Գաբրիելյան փողոց՝ 700մ
✅ Այգաբաց IV շարք՝ 588մ

Երկրորդ փուլով կհիմնանորոգվեն

✅ Խ․ Դաշտենց փողոց (Գորկի փողոցից Տերյան փող․)՝ 696մ
✅ Մյասնիկյան փողոց (Գորկի փողոցից Տերյան փող․)՝ 686մ
✅ Մատնիշյան փողոց (Գորկի փողոցից Տերյան փող․)՝ 700մ
✅ Մազմանյան փողոց (Գորկի փողոցից Տերյան փող․)՝ 703.5մ
✅ Մազմանյան փողոց (Տերյան փող․-ից գերեզմանատուն)՝ 733մ
✅ Սունդուկյան փողոց (Գորկի փողոցից Տերյան փող․)՝ 708.4մ
✅ Աթարբեկյան փողոց (Սպանդարյան փողոցից Տերյան փող․)՝ 383մ
✅ Պուշկինի փողոց (Հաղթանակի պողոտայից Մուսաելյան փող․)՝ 708մ
✅ Թումանյան փողոց (Հաղթանակի պողոտայից Մուսաելյան փող․)՝ 720մ
✅ Մայակովսկի փողոց (Աթարբեկյան փողոցից Մուսաելյան փող)՝ 650մ

Այս փուլի աշխատանքները կներառեն 9830 գծային մետր երկարություն և 118206 մ², որից՝ 85913 մ² երթևեկելի ու 32293մ² մայթային մաս։

SHANTNEWS.am-ի հետ զրույցում Մխչյանը նշել է, որ ՎԶԵԲ ծրագրով նախորդ փուլի թերություններն այս փուլում չեն կրկնվելու․

«Փողոցաշինական ծրագրի ժամկետը սահմանված է 7 ամիս, իսկ հաշվարկը տարվում է՝ սկսած մրցույթի արդյունքների գնահատման արձանագրությունը կազմելու օրվանից։ Մինչև չորեքշաբթի գնահատումը տեղի կունենա։ Աշխատելու ենք այս տարի ավարտել աշխատանքները։ Նախորդ տարվա նման, կոմունիկացիաների խնդիր, այս փուլում չենք ունենալու, որովհետև այս փուլում ընդգրկված փողոցներում կոմունիկացիաները վերգետնյա են, իսկ անձրևաջրերի հոսքը՝ մակերևութային։

Աշխատուժի խնդրին դեռ չենք անդրադարձել, քանի որ կապալառու կազմակերպությունների հետ դեռ չենք քննարկել, բայց կարծում եմ, որ, ի տարբերություն անցած տարվա, այս անգամ աշխատուժի պակաս չենք ունենա, քանի որ արտագնա աշխատանքի մեկնողները երկրից դուրս գալու հնարավորություն չեն ունեցել և, ցավոք, քաղաքում ազատ աշխատուժ շատ կա։ Հիմա պատրաստվում ենք նաև երրորդ չափաբաժնով մրցույթ հայտարարել, փաստաթղթային ձևակերպումների փուլում ենք»:

Նա նաև նշել է, որ ծրագրի այս փուլի արժեքը դեռ հայտնի չէ։ Այն կախված է մրցույթին մասնակցած շինընկերությունների մրցութային գներից, որոնք տարբեր են։