Գործը «գլուխ է գալիս» այն ժամանակ, երբ ստեղծագործող կազմ է լինում. Սոնա Եսայանը՝ «Երեկոն Շանթում Գրիգի հետ» հաղորդման մասին

«Շանթ»-ի հեռուստադիտողի երեկոն այլևս առաջվանը չի լինի, իհարկե, դրական իմաստով: Այդպես է ասում երգիծաբան, հաղորդավար Գրիգ Գևորգյանը:  «Երեկոն Շանթում Գրիգի հետ». ահա թե ինչի մասին է խոսքը: Նոր ձևաչափով, հումորի նոր չափաբաժնով ու ասելիքով հաղորդումը շուտով կլինի «Շանթ» հեռուստաընկերության եթերում: Առաջին եթերը նախատեսված է մայիսի 29-ին:

Ասում են՝ քնելուց առաջ տրամադրությունը պետք է, ժողովրդական լեզվով ասած, «տեղը տեղին» լինի՝ լավ երազներ տեսնելու համար: Եվ ահա՝ կդիտեք, կծիծաղեք, կլիցքավորվեք դրական էներգիայով, իսկ առավոտյան կարթնանաք հաջորդ հաղորդման սպասումով: Մի բան էլ պարային շոուների սիրահարների համար՝  ձեր մասին էլ չեն մոռացել:

«Հաղորդման մեջ պարային մասը կարևոր դիրքերում է: Բացումն ու փակումը պարային շոուով է արվելու: Աշխատելու եմ իմ պարային դասարանների արհեստավարժ աշակերտուհիների հետ: Բոլորն իմ ստուդիայի սաներն են, դրսից հրավիրվածներ չկան: Իմ շոուների պարագայում չեք տեսնի այն, ինչը տեսել եք նախորդ նախագծերի շրջանակում: Մեր պարերը զարմացնելու են ոչ միայն պարարվեստի ներկայացուցիչներին, այլև բոլորին: Այստեղ չենք պարելու, այստեղ շոու ենք անելու: «Շանթը» ամեն հնարավորություն ապահովել է, որ կարողանամ ինձ լիարժեք զգալ իմ գործում ու չսահմանափակվեմ»,- SHANTNEWS.am-ին պատմեց նախագծի շոուների ղեկավար Սոնա Եսայանը:

«Լate night» կամ երեկոյան շոու. «Երեկոն Շանթում Գրիգի հետ» հաղորդման ֆորմատն է: Սա համաշխարհային ֆորմատ է, որը, սակայն, հաղորդման շրջանակում դասական չափանիշների շրջանակից դուրս է բերվել: Սոնան ասում է.

«Նախագծի պրոդյուսերը՝ Գրիգը, փորձել է ավելի հետաքրքիր լուծումներ տալ, ոչ թե «հայկականացված», այլ առհասարակ հետաքրքիր լուծումներ»:

Ահա թե ինչպես է «խմբագրվել». Սոնայի խոսքերով՝ պարային շոուներ այդ ֆորմատում ընդհանրապես չկան, իսկ այս դեպքում դրանք ներառված են: Բացի դրանից՝ ընդգրկված է նաև «սթենդ ափ» ասվածը, որը երեկոյան շոուներում շատ դեպքերում չի լինում:

Սցենարի վրա աշխատում են փորձառուներ՝ Գրիգի գլխավորությամբ: Ընդհանրապես, հաղորդման «շուրջբոլորը» արհեստավարժ մասնագետներ են: Խոսքը դիմա-վարսահարդարումից մինչև հագուստի ստեղծման, ձևավորման և մյուս աշխատանքների մասին է:

«Գործը «գլուխ է գալիս» այն ժամանակ, երբ հետաքրքիր ու ստեղծագործող կազմ է լինում»,- նշում է Սոնա Եսայանը՝ ավելացնելով, որ հաղորդումը նախատեսված է լսարանի բոլոր խմբերի համար: