1 օրում կորոնավիրուսի դեպքերի կտրուկ աճը, այդ աճի «մեղավորները». կորոնավիրուսի դեմ պայքարը շարունակվում է

Աշխարհում կորոնավիրուսի դեպքերի թիվն արդեն հատել է 5 միլիոնի շեմը: Մի շարք երկրներում հիվանդության տարածումը զսպելու ջանքերը, կարծես, հաջող են ընթանում: Ինտենսիվ թերապիայի բաժանմունքում բուժվողների թիվն աստիճանաբար պակասում է, սահմանափակումները մեղմանում են, մարդիկ աստիճանաբար վերադառնում են կյանքի նորմալ հունին, իհարկե, պահպանելով սահմանված կանոնները: Սակայն ընդհանուր պատկերն առայժմ այնքան էլ խոստումնալից չէ:

Առողջապահության համաշխարհային կազմակերպությունը հերթական առցանց ճեպազրույցի ժամանակ հայտարարել է աշխարհում կորոնավիրուսի դեպքերի կտրուկ աճի մասին: Մայիսի 20-ի դրությամբ վերջին 1 օրում արձանագրված դեպքերի թիվն ավելին է եղել, քան 24 ժամում գրանցվել էր համավարակի սկզբից մինչև օրս:

«Վերջին 24 ժամվա ընթացքում ԱՀԿ-ին զեկուցել են 106 հազար դեպքի մասին: Դա համավարակի սկզբից մեկ օրում արձանագրված ամենամեծ թիվն է: Այդ դեպքերի գրեթե 2/3-րդը բաժին է ընկնում ընդամենը չորս երկրի»,- ասել է ԱՀԿ-ի գլխավոր տնօրեն Թեդրոս Ադհանոմ Գեբրեյեսուսը:

Այդ չորս երկրներն են ԱՄՆ-ն, ՌԴ-ն, Բրազիլիան և Հնդկաստանը: Ինչպես հաղորդում է CNBC լրատվամիջոցը, մայիսի 20-ի դրությամբ՝ 24 ժամում ԱՄՆ-ում նոր դեպքերի թիվը գերազանցել է 45 հազարը:

CNN-ը հաղորդում է, որ Բրազիլիայում գրանցվել է երկրի համար ռեկորդային՝ գրեթե 20 հազար դեպք, Հնդկաստանում՝ ավելի քան 5600, Ռուսաստանում՝ գրեթե 9000:

Միացյալ Նահանգներ

ԱՄՆ-ն շարունակում է մնալ կորոնավիրուսի հաստատված դեպքերի քանակով աշխարհում առաջատարը: Մինչ օրս վիրուս է հայտնաբերվել 1,5 միլիոնից ավելի մարդու մոտ: Չնայած դրան՝ ԱՄՆ-ի բոլոր 50 նահանգները, թեկուզ մասնակիորեն, մեղմացրել են ձեռնարկությունների նկատմամբ կիրառվող սահմանափակումները:

Խիստ սահմանափակումներ պահպանում են միայն ամերիկյան մի շարք քաղաքներում, որտեղ նոր դեպքերի թիվը չի դադարում աճել:

Սահմանափակումները մեղմել-չմեղմելու որոշումը կայացնում են նահանգապետերը կամ տեղի իշխանությունները՝ փորձելով գտնել ոսկե միջինը տնտեսական վնասը նվազեցնելու և մարդկանց առողջությունը պահպանելու միջև:

Ինչպես հաղորդում է National Public Radio լրատվամիջոցը, կարանտինային ռեժիմի սահմանումից ի վեր ԱՄՆ-ում 36,5 մլն մարդ դիմել է պետությանը գործազրկության նպաստի համար:

Ռուսաստան

Կորոնավիրուսի դեպքերի թվով աշխարհում երկրորդ հորիզոնականը զբաղեցնում է Ռուսաստանը: Այնտեղ այսօր գրանցվել է 8800-ից ավելի դեպք, իսկ ընդհանուր դեպքերի թիվը գերազանցել է 300 հազարը: Մոսկվային բաժին է ընկնում հիվանդների 50 տոկոսը:

Միևնույն ժամանակ, TASS գործակալության փոխանցմամբ, արդեն երկու օր շարունակ Մոսկվայում հիվանդանոցից դուրս գրվածների թիվը գերազանցում է հայտնաբերված նոր դեպքերի թիվը:

Բրազիլիա

Բրազիլիան կորոնավիրուսի հաստատված դեպքերի թվով գտնվում է երրորդ տեղում՝ առաջ անցնելով եվրոպական երկրներից Իսպանիայից, Մեծ Բրիտանիայից և Իտալիայից:

Հիվանդության տարածումը, սակայն, չի հանդարտեցնում ցուցարարներին, որոնք բողոքում են կարանտինային ռեժիմի դեմ: Այս անգամ ցույցի են դուրս եկել հարյուրավոր մոտոցիկլիստներ՝ կոչ անելով բացել երկրի սահմանները:

Հնդկաստան

Հնդկաստանում կորոնավիրուսի հաստատված դեպքերի թիվը գերազանցում է 112 հազարը: Չնայած դրան՝ երկիրը որոշել է մայիսի 25-ից վերսկսել ներքին ավիահաղորդակցությունը, որը լիովին դադարեցվել էր 2 ամիս առաջ:

Business Today ամսագրի փոխանցմամբ՝ Հնդկաստանում շուրջ 50 մլն մարդ զրկված է ձեռքերը լվանալու հնարավորությունից, ինչն ավելի է մեծացնում կորոնավիրուսով վարակվելու և այն փոխանցելու վտանգը:

Եվրոպական երկրներ

Ինչ վերաբերում է եվրոպական երկրներին, այնտեղ այսօր Համբարձման տոնի պատճառով կրկին որոշ սահմանափակումներ են կիրառվել, հաղորդում է BBC-ն: Որպեսզի տոնական տրամադրությունը չվերածվի նոր դեպքերի աճի, Ֆրանսիայի մի շարք նահանգներում փակվել են լողափերը, Գերմանիայի իշխանությունները փակել են բազմաթիվ խանութներ, Նիդեռլանդները փակել է երկրի սահմանամերձ ճանապարհները, որպեսզի Համբարձման տոնի առթիվ ճանապարհորդել ցանկացողները չհատեն սահմանը: