Քոչարյանի պաշտպանները կրկին Սահմանադրական դատարան դիմելու միջնորդություն են ներկայացրել

Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի դեմ հարուցված քրեական գործի դատաքննությունն այսօր սկսվեց տուժողների իրավահաջորդների դժգոհություններով:

Նիստի սկզբում տուժողների շահերի պաշտպան Սեդա Սաֆարյանը դատարանին խնդրեց տուժողների իրավահաջորդներին թույլատրել գտնվել նիստերի դահլիճի հիմնական հատվածում։ Բանն այն է, որ նրանք արդեն երկրորդ  դատական նիստն է՝ գտնվում են ապակիներից այն կողմ՝ սոցիալական հեռավորությունը պահպանելու համար։

Դատավոր Աննա Դանիբեկյանը հարցրեց տուժողներին՝ ո՞րն է պատճառը, որ ցանկանում են տեղափոխվել դահլիճի հիմնական հատված: Մարտի 1-ի զոհերից Գոռ Քլոյանի հայրը՝ Սարգիս Քլոյանը, պատասխանեց.

«Մոտ 70 տարեկան մարդ ենք, լսողությունից վատ ենք, տեսնում ենք ազատ տեղ՝ ուր կարող ենք նստել, բոլորը քիփ-քիփ նստած են, իսկ մենք երեք հոգի մարդ ենք, ինչո՞ւ չենք կարող տեղավորվել այդտեղ»:

Ամբաստանյալ Արմեն Գևորգյանի պաշտպան Էրիկ Ալեքսանյանն առարկեց՝ համաձայն չեն:

«Առաջին պատճառն այն է, որ 1․5 մետր հեռավորությունը հնարավոր չի լինելու ապահովել, երկրորդը՝ այն, որ տուժողի իրավահաջորդներից մեկը բազմաթիվ անգամներ խանգարել է գործի քննության բնականոն ընթացքը, և ես գտնում եմ, որ երբ նա տեղ զբաղեցնի մեր կողքին, հնարավորություն չենք ունենալու պատշաճ կերպով աշխատելու»:

Պետական մեղադրող Գևորգ Բաղդասարյանն էլ նշեց, որ եթե տուժողները խնդիր ունեն մասնակցելու, պետք է ապահովել այդ պայմանները։

Մեղադրողի այդ առաջարկին արձագանքեց պաշտպան Ալեքսանյանը.

«Ես կառաջարկեմ, որ պարոն Բաղդասարյանը գա, այստեղ տեղ զբաղեցնի և տեսնի՝ հնարավո՞ր է, թե՞ ոչ․ աթոռները ջարդած են, եկեք, փորձեք, գուցե Ձեզ մոտ ստացվի»։

Դատական նիստի հենց սկզբից շատ վատ էր լսվում, թե ինչ էին խոսում կողմերը: Թեժացող վիճաբանությունը կանխեց դատավորը: Նա  որոշեց, որ մեկ հոգի կարող է տեղափոխվել դահլիճի հիմնական հատված՝ պահպանելով սոցիալական հեռավորություն:

Դատական նիստը շարունակվեց պաշտպանական խմբի հերթական միջնորդությամբ: Պաշտպան Կարեն Մեժլումյանը, Հովհաննես  Խուդոյանը, Արամ Վարդևանյանը դատարանին միջնորդեցին կասեցնել գործի վարույթը և դիմել Սահմանադրական դատարան՝ Քրեական օրենսգրքի 300 հոդվածի սահմանադրականությունը  և այդ հոդվածի համապատասխանությունը Սահմանադրության 78, 79, 72, 73 հոդվածներին պարզելու համար: