Ախուրյանում բիովառելիքի արտադրամաս է հիմնվել

Ախուրյանում ներդրվել է բիովառելիքի՝ բրիկետի արտադրություն: Սա ՄԱԿ-ի զարգացման ծրագրերի գլոբալ էկոլոգիական հիմնադրամի և համայնքի համատեղ ծրագիրն է: ՄԱԿ-ը հատկացրել է 111 հազար դոլար, 10 մլն դրամ էլ կազմում է համայնքի ներդրումը: Հատկացվել է տարածք, ձեռք են բերվել սարքավորումներ, որոնցով վառելիքի է վերածվում հացքաղից հետո մնացած ծղոտը: Սա Շիրակի մարզում բիովառելիքի արտադրություն հիմնելու առաջին փորձը չէ: Մինչ այս նույն ծրագրով վառելահատիկների փոքր արտադրամաս էր հիմնվել Բասեն գյուղում: Հիմա բրիկետների արտադրությունն ավելի բարձր արտադրողականությամբ է ու ավելի մեծ ծավալներով:

Հացքաղից հետո դաշտերում մնացած ծղոտը սովորաբար գյուղացիներն այրում են: Սա դաշտը մաքրելու և աշնան վարին նախապատրաստելու ամենաարագ ու փորձված միջոցն է: Նույն ծղոտը կարելի է այրել, բայց ոչ թե դաշտում, այլ վառարանում, միայն թե մինչև վառելիք դառնալը տեխնոլոգիական մշակումներ պետք է անցնի:

«Ախուրյանի համայնքային զարգացման կենտրոն» հիմնադրամը նոր արտադրամաս է հիմնել, որի համար հումք ծառայում է բացառապես ծղոտը: Առանձին արտադրամասերում այն մանրացվում է, խտացվում ու վերածվում ծղոտե գլանակի՝ բրիկետի:

Հումքի պակաս Ախուրյանում չկա: Այդ հումքը արտադրամասի համար ձեռք բերելու մի քանի տարբերակ են մշակել: Գյուղացիներին առաջարկում են բրիկետ ծղոտի դիմաց, կամ էլ գյուղացին կարող է ծղոտը բերել, վճարել ծառայության դիմաց ու այն բիովառելիքի վերածել: Սպասում են հացքաղի ավարտին, երբ արտադրությունը սկսեն, այդ ժամանակ էլ գյուղացիների հետ պայմանավորվածությունները գործնական կդառնան:

«Ախուրյանն առաջին համայնքն է, որն ունի կենսավառելիքի արտադրության ռազմավարություն: Առաջին համայնքն է, որ ունի այս հարցի վերաբերյալ ամբողջական վերլուծություն: Սա կարող է զարգացում ունենալ, որովհետև Ախուրյանի հումքն այնքան շատ է, որ խոտածղոտային մասսան կհերիքի Ախուրյանում մի քանի արտադրամաս ունենալու համար: Կառավարությունը ևս շատ մեծ ուշադրություն է դարձնում այս ոլորտին: Պարբերաբար քննարկումներ են լինում, և տեղյակ եմ, որ ներկայումս ՄԱԿ-ի նախաձեռնությամբ մշակվում է ազգային մեծ ռազմավարություն, ուսումնասիրություններ են իրականացվում: Այս տիպի տեխնոլոգիաներ կներդրվեն նաև այլ մարզերում»,- SHANTNEWS-ին ասել է ծրագրի համակարգող Գևորգ Պետրոսյանը:

Մասնագետներն ուսումնասիրել են բրիկետների էներգաարդյունավետությունը և բիովառելիքի շուկան: Ծղոտե բրիկետները վառելիքի շուկայում մրցունակ են, համեմատությունը վառելափայտի գների ու էներգաարդյունավետության հետ է: Շիրակի մարզում՝ Բասեն գյուղում,  2014-ից գործում է վառելահատիկների արտադրամաս: Պահանջարկը կա, բայց արտադրության հզորություններն են փոքր:

Բրիկետի և վառելահատիկների արտադրությունները ոչ թե փոխարինելու, այլ լրացնելու են իրար:

Իսկ Ախուրյանում մինչև 420 կգ/ժ արտադրողականություն է ապահովվում: Սա, ըստ մասնագետների, լավ սկիզբ է, բայց անցումը բիովառելիքին ժամանակ է պահանջում: Այն մարդկանց կենցաղ միանգամից մտնել, գազին ու փայտին փոխարինել դեռ չի կարողանա:

Հացքաղից հետո Ախուրյանում բրիկետի արտադրամասը կսկսի արտադրանք թողարկել: Բրիկետի մեկ տոննայի պատրաստման ինքնարժեքը հաշվարկել են ու վաճառքի գին սահմանել 80-85 հազար դրամը: Ծրագրի պահանջն է, որ բիովառելիքի արտադրությունից ստացված հասույթը հատկացվի խոշորացված համայնքի բնակավայրերում նոր ծրագրերի ֆինանսավորմանը: