Ինչպես են վերսկսելու աշխատանքը թանգարաններն ու գրադարանները. քննարկում Գյումրիում

Կառավարությունն անցած շաբաթ արտակարգ դրությունը ևս մեկ ամսով երկարաձգելու որոշում կայացրեց, միևնույն ժամանակ հանվեցին ու մեղմացվեցին մի շարք սահմանափակումներ: Դրանք մասնավորապես վերաբերեցին անձնական մեքենաներում դիմակ կրելուն, միջոցառումների անցկացմանը, թանգարանների և գրադարանների վերաբացմանը: Երբ և ինչպիսի պայմանների ապահովման դեպքում են աշխատանքը վերսկսելու թանգարաններն ու գրադարանները, պարետատունը դեռ մանրամասներ չի ներկայացրել: Գրադարանների ու թանգարանների տնօրենները այսօր ներկայացրել են մի շարք տարբերակներ և խոսել հնարավոր խնդիրներից:

5 ամիս գրադարաններն ու թանգարանները հարկադիր պարապուրդում են: Աշխատանքային գործունեությունն այլ հարթություն են տեղափոխել: Օնլայն հարթակում են ներկայացնում ցուցանմուշներն ու վիրտուալ էքսկուրսիաներ են կազմակերպում: Համավարակի պայմաններում սա միակ դրական փոփոխությունն է, որ նշում են:

Հիմա արդեն թանգարաններն ու գրադարանները պատրաստվում են վերադառնալ բնականոն աշխատանքի, թեև դեռ հայտնի չէ, թե երբ են վերսկսելու գործունեությունը: Սպասում են պարետատան հրահանգներին:

Համավարակի պայմաններում աշխատանքը վերսկսելը իր նրբություններն ունի։ Միայն ախտահանիչ նյութերի ու ջերմաչափման ապահովումը բավարար չէ: Գրադարաններում վարակի աղբյուր կարող են դառնալ գրքերը, թանգարաններում մարդկանց կուտակումները:

«Գրադարաններում գրքերի վերադարձման խնդիրը կա: Իսկ գիրքը միկրոբների կուտակիչ է համարվում: Ամենաշատը 4 օր է անհրաժեշտ, որ գրքերի վերադարձից հետո այդ վտանգը չեզոքացվի: Գրքերի ախտահանման սարքեր գոյություն ունեն, որոնք Հայաստանում չկա: Իսկ եթե այդպիսի մեթոդներ չեն կիրառվելու, ուրեմն գրքերի 4 օրվա պահեստավորման խնդիր կլինի»,- նշեց Շիրակի մարզային գրադարանի տնօրեն Գևորգ Ամիրյանը:

Թանգարանների ներսում գծանշումներն են պարտադիր լինելու: Էքսկուրսավարի ուղեկցությամբ մեծ խմբերով գտնվել չի թույլատրվելու: Սա էլ, ըստ թանգարանների տնօրենների, դառնալու է բակում կուտակումների պատճառ:

«Բակում կարող են լինել մոտավորապես 50-100 հոգի սպասելիս, որովհետև մենք չենք կարող 25-30 հոգու սպասարկել միաժամանակ, այլ կկարողանանք սպասարկել 7-8 հոգու միաժամանակ: Թեպետ գծանշումներ կլինեն բակում, բայց չենք կարող հսկողություն իրականացնել բակում: Թանգարանի ներսում դա կարող ենք անել, բայց դրսում կամ կամավորներ պետք կլինեն կամ ինչ-որ կառույց է պետք կամ իրավապահները օգնեն, որ մարդիկ իրարից հեռու կանգնեն, ոչ բերեն վարակը թանգարան, ոչ էլ տանեն էնտեղից»,- ասաց Հովհ. Շիրազի հուշատուն-թանգարանի տնօրեն Արա Պապանյանը:

Թանգարանների պահանջարկը մեծ է: Ներքին տուրիզմը Գյումրիում շատ ակտիվ չէ հենց թանգարանների փակ լինելու պատճառով: Հնգամսյա պարապուրդը թանգարանների համար նաև ֆինանսական մեծ կորուստներ է առաջացրել: Տեղական բյուջե թանգարաններից գումար չի մուտքագրվել։ Բացի աշխատավարձից, այլ ծախսերի համար քաղաքային բյուջեից համեստ գումարներ են խնդրելու:

Ինչքան գումար կպահանջվի թանգարանների ու գրադարանների աշխատանքը համավարակի պայմաններում վերսկսելու համար, կախված է նրանից, թե պարետատունն ինչ որոշում կկայացնի: Համենայնդեպս, մինչև սեպտեմբերի կեսը զբոսաշրջային հոսքը Գյումրի շարունակվելու է, ու թանգարան այցելությունները պահանջված են լինելու: