Թարմացվում են Գյումրիի հեռուստաաշտարակի գույները

Թարմացվում են Գյումրիի հեռուստաաշտարակի գույները: «Հայաստանի հեռուստատեսային և ռադիոհաղորդիչ ցանցեր» ընկերությունը պետբյուջեից մոտ 20 մլն դրամ ֆինանսավորում է ստացել հեռուստաաշտարակի ընթացիկ նորոգման համար: Մոտ երեք ամիս է ընթանում են ներկման աշխատանքները։ Թարմացնում են ոչ միայն հեռտուստաաշտարակի գույները նաև պաշտպանում են  կոռոզիայից: Վերջին անգամ Գյումրիի հեռուստաաշտարակը ներկվել էր մոտ 30 տարի առաջ: Գործը վստահվել է տեխնիկական ալպինիզմով զբաղվող մասնագետներին, որոնք համարձակություն և տեխնիկական հնարավորութուն ունեն աշխատել 180 մետր բարձրության վրա: Ճիշտ այսքան է Գյումրիի հեռուստաաշտարակի բարձրությունը:

Սևակը տեխնիկական ալպինիզմով զբաղվող խմբի համարձակներից մեկն է, ում աշխատանքային օրը սկսվում ու ավարտվում է տարբեր բարձրությունների վրա: Վերջին երեք ամիսներին նրա ու ընկերների աշխատավայրը Գյումրիի հեռուստաաշտարակն է: Նախ ցույց է տալիս անվտանգության միջոցները, որոնք թույլ են տալիս բարձրանալ հեռուստաաշտարակի վրա ու աշխատել ապահով: Գործը սկսել են Գյումրիի ամենաբարձր կետից՝ հեռուստաաշտարակի գագաթից: 180 մետր բարձրության վրա ներկում են աշտարակը այն գույներով, ինչը նախկինում է ունեցել՝ սպիտակ ու կարմիր:

«Օդում կախված կողմնորոշվելը շատ դժվար է, դժվար է հավասարակշռություն պահել: Պետք է կարողանաս ոչ վախենաս, ոչ էլ շատ չվախենաս: Օգտագործում ենք ալպինիստական գույք, ստուգված է, պարանները մարդու զանգվածից 7 անգամ ավելի ծանր զանգվածին կարող են դիմանալ: Մեր աշխատանքը եղանակից է կախված: Ուժեղ քամիների ժամանակ  ալպինիստական աշխատանք կատարել չի թույլատրվում ,այլապես ամբողջ քաղաքն ավելի շատ է ներկվում, քան այն օբյեկտը, որն ուզում ես ներկես»,-shantnews-ին պատմում  է տեխնիկական ալպինիստ Սևակ Խանդիլյանը:

Հեռուստաաշտարակի բարձր տեղամասերում աշխատողները գրեթե չեն էլ երևում,միայն ներկի շիթերից կարելի է հասկանալ, թե աշխատանքներն ուր են հասել: Իսկ երբ ներկարար-ալպինիստները ներքև են իջնում  պարզ է դառնում, թե այդ օրը որ գույնով են աշխատել:

Գյումրիի հեռուստաաշտարակը 64 տարեկան է: Այն կառուցվել  է 1956-ին ու մինչև 1974 թվականը հեռուստահաղորդումների անխափան եթերն ապահովել է մայրաքաղաքում: Իսկ երբ Երևանն արդեն նոր աշտարակ է ունեցել, հինը Գյումրի է տեղափոխվել: Առանձին տեղամասերում այն արդեն գունաթափվել էր, ժանգոտվել: Ներկման աշխատանքները անհրաժեշտություն էին արդեն: Ներկմանը զուգահեռ «Հայաստանի հեռուստատեսային ու ռադիոհաղորդիչ ցանցեր»  ընկերությունը նաև լուսավորության հնարավորություններն է քննարկել։

«Սա աշտարակների հետագա սպասարկման, կյանքը երկարացնելու համար արվող աշխատանք է: Աշտարակները կարևոր դեր են կատարում հեռուստատեսային ցանցի, հանրային մուլտիպլեքսի համար: : Գյումրիի հեռուստաաշտարակը նաև  ունի քաղաքի առումով երևացող դիրք և շատ կարևոր է , որպեսզի աշտարակի տեսքը համահունչ լինի քաղաքին: Մենք նաև քաղաքապետարանին ենք դիմել, որ ճիշտ կլինի, եթե հնարավորություն ունեն, լուսավորության հարցերով իրենց օգնեն: Տրամադրեն լուսավորության համակարգեր, մենք տեղադրենք: Սակայն քաղաքապետարանից մեզ պատասխանեցին, որ ներկա պահին այդ հնարավորությունը չունեն:Այս տարի մենք ներկման աշխատանքները կավարտենք, լուսավորության համար կհասկանանք, եթե մեր վրա է մնալու , արդյոք մեր հնարավորությունները կներեն , որ լուսավորություն անենք կամ համատեղ ուժերով փորձենք այդ հարցը լուծել »,-shantnews-ին ասել է «Հայաստանի հեռուստատեսային և ռադիոհաղորդիչ ցանցեր» ընկերության տնօրեն Մուշեղ Միլիտոնյանը:

Այսինքն լուսավորություն Գյումրիի հեռուստաաշտարակը դեռ չի ունենալու: Առայժմ միայն ներկման աշխատանքները բավարար են այն շահագործելի վիճակի բերելու համար: Աշխատանքների նախապես հայտարարված վերջնաժամկետները  խախտվել են:

Ներկի շիթերը հարակից թաղամասերին էլ են հասել, հետք թողել ավտոմեքենաների վրա: Մասնագետը նշում է՝ եթե եղանակները թույլ տան, մի քանի օրից ներկման աշխատանքները կավարտեն: Հայաստանում 213 հեռուստաաշտարակներ կան: Դրանց բարձրությունը կազմում է 6-ից մինչև 308 մետր:«Հայաստանի հեռուստատեսային ու ռադիոհաղորդիչ ցանցեր »ընկերությունը աշտարակները հերթի է դրել ու տարեկան պլան կազմել,թե որտեղ ու որ աշտարակն է ներկվելու:  Ամենաբարձրը մայրաքաղաքինն է: Այն ներկվել է 2018-ին: