Գյումրիում հրդեհված տնակի բնակիչները հայտնվել են դրսում

Ինչպես SHANTNEWS-ը տեղեկացրել էր, երեկ հրդեհ է բռնկվել Գյումրիի Արցախ թաղամասի բնակելի տներից մեկում: Դեպքի վայր էին մեկնել Գյումրի հրշեջ-փրկարարական ջոկատից երկու մարտական հաշվարկ:

Հրշեջներին 2 ժամից ավելի է պահանջվել կրակը մեկուսացնելու, ապա հանգցնելու համար: Բնակելի տնակն ամբողջությամբ գույքի հետ մոխրի է վերածվել: Այրվել է նաև հարակից գտնվող խորդանոցի մի հատվածը: Ժամանակավոր կացարանը պատկանում է Գրիգորյանների ընտանիքին, այստեղ ապրում է մայրը երկու երեխաների հետ: Անցած գիշերն ընտանիքը անցկացրել է խորդանոցի անվնաս մնացած հատվածում:

Կրակը շատ արագ էր տարածվել ժամանակավոր կացարանում : Հրշեջ-փրկարարական ջոկատները նախ շտապել են մեկուսացնել կրակը՝ հարակից տնակներն ապահովագրելու համար: Այս հատվածում մի քանի ժամանակավոր կացարաններ են, որոնք իրար մոտ են: Տանտերերն այդ պահին տնակում չեն եղել: Նրանց աշխատավայրը հարակից կրպակն է, որտեղից էլ նախ ծխի հոտ են զգացել, ապա՝ նկատել կրակը:

Տնակը գազաֆիկացված չէ, կենցաղում գազաբալոն են օգտագործել։ Այն, ըստ տանտիրոջ, չէր կարող հրդեհի պատճառ դառնալ, քանի որ գրեթե դատարկ է եղել: Սոսե Գրիգորյանը կարծում է, որ ամենայն հավանականությամբ, հոսանքալարերի կարճ միացում է եղել:

«Գյումրիում հուլիսի 13-ին տեղի ունեցած հեղեղի ժամանակ մեր տնակում ուժեղ կաթոցներ էին: Երևի հոսանքալարերը թրջվեցին, չորացան, մաշվեցին: Միացված որևէ բան տնակում չկար: Պարզապես ենթադրում եմ, որ պատճառը կարող էր համակարգիչը լինել, որը միշտ հոսանքին միացված էր: Որպեսզի հաշվարկների հետևից չընկնենք, պարզապես ասեմ, որ այրվել է ամբողջ տնակը՝ գույքի հետ: 20 տարվա մեր աշխատանքի արդյունքն է: Կատարվել է այն, որ ոչ մեկից ոչինչ չես կարող պահանջել: Եթե բարեգութ մարդիկ գտնվեն, սիրով կընդունենք նրանց առաջարկը, բայց որևէ մեկից ոչինչ չեն պահանջում»,- SHANTNEWS-ի հետ զրույցում ասել է այրված տնակի բնակիչ Սոսե Գրիգորյանը:

Հրդեհի առաջացման պատճառները պարզելու համար տեխնիկական անվտանգության ազգային կենտրոնի աշխատակիցները հետաքննություն են կատարում: Մասնագետին արձանագրություն կազմելու համար տանտերերը փոքրիկ կրպակի տարածք էին հատկացրել: Այլ տեղ գնալու, մնալու ընտանիքը չունի: Հրդեհը սկսվել է բնակելի հատվածից ու հասել մինչև խորդանոց: Դրա մի  հատվածն էլ է տուժել հրդեհից: Խորդանոցի անվնաս մնացած հատվածում են գիշերել Գրիգորյանները:

Այրված տնակից ոչինչ դուրս բերել չեն կարողացել: Հագուստը, կահույքը, սպասքն, ամեն ինչ մոխրի է վերածվել: Վնասի չափը գնահատել անգամ տանտերը դժվարանում է:

Հիմա սպասում են տեխնիկական անվտանգության կենտրոնի մասնագետների եզրակացությանը: Այն հիմք է հանդիսանալու քաղաքապետարան դիմելու և աջակցություն ակնկալելու համար: Իսկ մինչ այդ, Գրիգորյանները շարունակելու են խորդանոցում ապրել: Անօթևանի կարգավիճակ չունեն: Կիսված ընտանիքների ցանկում են: Մի քանի տարի առաջ բնակարան ստացել են, բայց միայն մի մասն է տեղափոխվել: