Կապսի ջրամբարը կկառուցվի, Ջրաձոր գյուղը կվերաբնակեցվի. կառավարությունը որոշում է կայացրել

Կառավարության այսօրվա նիստի օրակարգում ընդգրկված էր Ջրային ռեսուրսների համատեղված կառավարում/Ախուրյան գետ, փուլ 1 ծրագրի շրջանակներում հողերի ձեռքբերման և վերաբնակեցման գործողությունների պլանը հաստատելու մասին հարցը:

Ծրագրով նախատեսվում է վերակառուցել Կապսի կիսակառույց ջրամբարը, որը գտնվում է Շիրակի մարզում՝ Գյումրի քաղաքից դեպի հյուսիս 22 կմ հեռավորության վրա գտնվող Ախուրյանի գետահովտում։ Ծրագիրն ընդգրկում է Կապսի պատվարի կայունացում և վերականգնում, 1-ին փուլով նախատեսվում է 25 մլն մ³ ծավալով ջրամբարի կառուցում՝  հետագա ընդլայնման հնարավորությամբ՝ մինչև 60 մլն մ³:

Ծրագիրն ունի համապետական կարևոր նշանակություն, քանի որ դրա իրականացման արդյունքում կապահովվի Շիրակի մարզում Ախուրյան գետի սահմանափակ ջրային ռեսուրսների կայուն օգտագործումը՝ հաշվի առնելով տարբեր ջրօգտագործողների շահերը:

ՀՀ ՏԿԵ փոխնախարար Վաչե Տերտերյանը նշեց, որ 1988թ. երկրաշարժը և դեպքերի հետագա զարգացումը բերեցին նրան, որ շինարարությունը կասեցվեց, արդյունքում կա քիչ չափով կառուցված պատվար, շրջանցիկ թունել: Տերտերյանի խոսքերով՝ ջրամբարի կիսատ  վիճակում գոյությունը վտանգավորության աստիճան ունի:

Նա նաև տեղեկացրեց, որ ծրագրի իրականացման նպատակով՝ 2014 թվականի դեկտեմբերի 19-ին Հայաստանի Հանրապետության և Վերականգնման վարկերի բանկի միջև վարկային համաձայնագիր է կնքվել:

Նշվեց նաև, որ Կապսի ջրամբարի և ոռոգման ինքնահոս համակարգի կառուցման մանրամասն աշխատանքային նախագծման փուլի ընթացքում խորհրդատուի կողմից իրականացվել է Շիրակի մարզի Ջրաձոր բնակավայրի լանջի կայունության մանրամասն հաշվարկ, ըստ որի՝ դրա հետագա սողանքակայունությունը գնահատվել է ռիսկային և հետագա հնարավոր փլուզումներից խուսափելու համար անհրաժեշտ է համարվել Ամասիա համայնքի Ջրաձոր բնակավայրը վերաբնակեցնել ամբողջությամբ, իսկ Ամասիա համայնքի Արեգնադեմ, Գտաշեն և Բյուրակն բնակավայրերում, ինչպես նաև Մարմաշեն համայնքի Կապս և Սարապատ համայնքի Հողմիկ բնակավայրերում իրականացնել ազդակիր հողերի օտարում:

«Հետազոտությունը ցույց տվեց, որ Ջրաձորի վերաբնակեցումը պետք է արվի հենց առաջին փուլի ժամանակ: Հետազոտությամբ ամբողջությամբ գնահատվել է ամբողջ գույքը: 72 և ավելի տնտեսություն, շուրջ 350 բնակչի հնարավոր կլինի վերաբնակեցնել նոր տեղում: Տեղը նախնական ընտրված է: Ամբողջ վերաբնակեցման ծրագիրը նախատեսում ենք իրականացնել պետության հաշվին, սա պետական ծրագիր է»,- նշեց փոխնախարարը:

«Երրորդ հանրապետության պատմության մեջ առաջին դեպքն է լինելու, երբ մենք զրոյից գյուղ ենք կառուցելու: Այս ծրագիրը շատ կարևոր է ոչ միայն Ջրաձորի բնակիչների համար, այլև 21-րդ դարի հայկական գյուղի վերաբերյալ մեր պատկերացումները կոնկրետացնելու առումով»,- նշեց վարչապետ Փաշինյանը:

Կառավարությունն օրակարգային հարցի վերաբերյալ դրական որոշում կայացրեց: