Գյումրիում կբացվի Ֆրիդ Սողոյանի թանգարանը, ռադիոգործարանի նախկին հանրակացարաններն էլ կդառնան արհեստագործական համալիրներ

Պատմական արժեք ներկայացնող ևս մեկ շենք էլ կվերածվի թանգարանի, որտեղ կներկայացվեն ևս մեկ գյումրեցի քանդակագործի՝ Ֆրիդ Սողոյանի գործերը։ Թանգարան կդառնա քաղաքային գրադարանի նախկին շենքը։

«Մեր քաղաքը շատ է համաշխարհային արվեստագետներ տվել, մեկն էլ Ֆրիդ Սողոյանն էր: Մենք ծրագիր ունենք, որ նրա ստեղծագործությունները տեղափոխենք Գյումրի: Ժառանգների հետ արդեն նախնական պայմանավորվածություն կա, և այդ նպատակով մենք  առաջարկում ենք հատկացնել Համբարձումյան փողոցի 35 հասցեի շենքը, նախկին գրադարանի շենքը, որը տեղափոխումից հետո մնացել էր դատարկ»,- ավագանու նիստին զեկուցել է Գյումրիի գլխավոր ճարտարապետ Հենրիկ Գասպարյանը:

Նախկին ռադիոգործարանի հանրակացարանային մեկ մասնաշենքն էլ վերադարձվեց «Ֆրանկ Մյուլեր» ընկերությանը։ Մինչ այս, մեկ անգամ  շենքը հատկացվել էր նույն ընկերության սեփականատեր Վարդան Սրմաքեշին, բայց մեկ տարի անց կրկին ավագանու որոշմամբ հետո հետ վերցվել ու կառուցապատման նպատակով տրամադրվել «Հայաստան» համահայկական հիմնադրամին։ Այսօրվա նիստում նախկին որոշումը  չեղյալ համարվեց և ռադիոգործարանի հանրակացարանային մասնաշենքը կրկին տրամադրվեց «Ֆրանկ Մյուլերին»:

«Ծրագիր է ներկայացվել, որ էնտեղ ստեղծվի իր բոլոր հարմարություններով ու ենթակառուցվածքներով բազմապրոֆիլ արհեստագործական համալիր, նաև ցանկություն կա հարակից տարածքում հետագայում բնակելի շինություն կառուցել»,- ներկայացրեց ծրագրի մանրամասները Հենրիկ Գասպարյանը:

Ավագանու անդամ Լևոն Բարսեղյանը հետաքրքրվեց՝ արդյո՞ք հստակ ժամկետներ նշված են ծրագրում կառուցապատման համար, թե հնարավոր է նախկին սցենարի կրկնություն, երբ տրամադրվելուց հետո նույն ընկերությունն այդ տարածքում ոչ մի աշխատանք այդպես էլ չկատարեց:

«Ժամանակային ինչ սահմաններ ունենք, թե մարդը կվերցնի տարածքն ու, ասենք, 49-րդ տարում նոր կկառուցապատի: Հիմա ինչ է ասում, մենք էդտեղ երբ կունենանք ինչ-որ աշխատանք, ինչ էր փուլի ավարտը»- հարց ուղղեց զեկուցողին Լևոն Բարսեղյանը:

«Հիմա սպասում են էս որոշմանը, երբ լինի, կտեղեկացնենք իրենց, իրենք նաև երկրորդ մասնաշենքն են ուզում վերցնեն, դա մեր համայնքի ենթակայության կառույց չէ, այլ պետությանն է, հենց երկրորդ շենքն էլ իրենց տրամադրեցին, արդեն նախագիծը կսկսեն»,- զեկուցողի փոխարեն պարզաբանեց Գյումրիի քաղաքապետ Սամվել Բալասանյանը:

Անշարժ գույքի անհատույց հատկացումներից բացի, նիստում քննարկվեցին նաև աճուրդային կարգով հողհատկացումների նոր կարգն ու դրույքաչափերը։